SIANTI MƆƆ IHYINYIA: Mmenii sʋ̃maa bo kunlu itu kɛɛ bokowuko bɛ ayɩnkɛ bɛkɛma ngyɛvʋlɔ iluwa amumuyɛ ti. Wɔ twonwa nɣezile nu nɩ, mmenii ɛgyɩkɩ̃ɩ̃ be la yɛ ebiye a, bɛlɛ kamɩla wɔ bɛ awudo mɔɔ sɛ ɛtɩndɛɛ wɔ bɛ anyɩnkɛ mɛda a, bɔnwʋ wʋ na bɛtɩ a. Eyi ɩma ɩyɛ mɛlɛkɛ kɛɛ bɔkɔnwʋ na bɛ nɩɩ ngyɛvʋlɔ bɛali nkɔmmɔ mɔɔ ɩlɛ́ma bokowuko bɛ anyɩnkɛ. Ebiye a, sa ɩyɛ sɩ kɛɛ yekeli abiye mɔɔ igyĩ anyɩnkɛ mɛda mɔɔ yɛánwʋ yɩ nɩ dasɩlɛ. Mɔɔ yɛbazunzu nwʋmɔ nɩ ɩkɔwʋwa yɛ ma yɛkɛla anwʋlazʋ ali wɔ mmɩlɩ mɔ yedi abiye mɔɔ ɩánwʋ yɩ anyunu nɩ dasɩlɛ nɩ.

KEZIMƆ ƐKƐYƐ YƖ:

• Nyiá adwɩnɩba. Pika yi diibenyiamaa sʋ̃maa wɔ ɛpɛ kɛɛ bɛ nɩɩ yɛ kɛdɩndɛ ɩávalɩ nwʋmɔ kɛɛ yɛánwʋ bɛ anyunu nɩ

• Kakɛ́ kɛɛ, ansaana ɔkɔwɔ yɩ ayɩnkɛ nu anzɛnyɩɩ bɛɛlɩ mɔɔ ɩwɔ yɩ anyɩnkɛ yɩ anyunu nɩ, nɩ pika yi diibenyia nɩ ɩnwʋ wʋ dada na itiyee wʋ sʋ̃

• Sɛ pika yi diibenyia nɩ ide ɔzʋlɔ a, tɩndɛ kile yi dɩkɛɛ mɔɔ igyĩ wʋ anyunu na ɛtɩndɛ ekile yɩ la. Sɩlɩ na tɩndɛ kɛmɔ ɛyɛ nɩ la. Kã mɔɔ sɛ iwukoli yɩ ayɩnkɛ nɩ a, ankɩ ɛkɛhã ekehile yɩ nɩ la. Sɛ kamɩla ɩwɔ ayɩnkɛ nɩ yɩ anyunu a, áma ɛfa wʋ anyunu ebike yɩ sʋ̃maa

• Sɛ ɛ nɩɩ yɩ tɩndɛ owie a, kakɛ kɛɛ ebiye a, nɩ pika yi diibenyia nɩ ɩla nwʋmɔ la itiyee na ikilaa wʋ sʋ̃. Kilá mɔɔ ɛkɛhã ekehila enii mɔɔ ɛ nɩɩ yɩ boluwa dasɩlɛlilɛ nu nɩ wɔ ayɩnkɛ yɩ anyunu