Mmɩlɩ mɔ asafʋ mɔɔ nɩ ɩwɔ Wulomi nɩ bɛdɩlɩ kɛɛ Pɔɔlʋ ɩbaa nɩ, mmeliyema be bodualɩ ɔhʋanɩ mayɛlɩ 40 bɔhɔ beyiyialɩ yɩ. Ɔlɔlɛ mɔɔ bɔzʋ̃ bɛ ahʋnlɩnɩ nu bɛlalɩ yɩ ali nɩ, kɛ ɩhanlɩ Pɔɔlʋ izeli a? “Mɔ Pɔɔlʋ ɩnwʋnlɩ bɛ nɩ yɩ ɛɣɛɛlɛ ɩyɩkyɩlɩ na ɩlalɩ Nyamɩnlɩ asɩ.” (Egy 28:15) Nɩ bezi Pɔɔlʋ kɛɛ ɩkɔ ɩkyɩkyɩ asafʋ azʋlɔtʋ mɔɔ nɩ ɩkɔ ikyela bɛ nɩ bɛ ɛɣɛɛlɛ, naasʋ̃ wɔ mmɩlɩ eyi nu mɛyɩ nɩ ɩdɩ pilizianii, meti mɛyɩ mfomi yɛ inyianlɩ ɛɣɛɛlɛyɩkyɩlɛ a.—2Kɔl 13:10.

Nnɛ sʋ̃, mansini zʋ ehilalɛmaa bɔkɔ bekyegyela asafʋ azʋlɔtʋ na bɛkyɩkyɩ be mmeliyema nɩ bɛ ɛɣɛɛlɛ. Dɩkɛɛ Nyamɩnlɩ yɩ sʋ̃mɩvʋlɔ bela nɩ, ɩyɛ a bɛtɩ nɣanlɩ kɛɛ bɛvɛ, adwɩnɩndwɩnɩ ɩhyɛ bɔ zʋ, na bɛ ɛɣɛɛlɛ ɩbɔ. Mmɩlɩ fʋlɔ mɔ mansini zʋ ehilalɛvʋlɔ nɩɩ yɩ yɩ bɛkɛɣa bekegyela wʋ asafʋ yɩ nɩ, mɩnla yɛ ɔkɔhʋla ɛkɛyɛ na wʋava wʋawʋwa bɛ ma beanyia akɛnɣasi na ama ‘bo munwatĩĩ bɛ ɛɣɛɛlɛ yɛayɩkyɩ’ a?—Wul 1:11, 12.

• Kɔ́ dasɩlɛlilɛ ayiyialɩyɛ. Sɛ ɛlawulowɔlɛmaa nɩ bɛfa nninyeni bɔbɔ afɔlɩ na bɛfa bɔ nwʋ bowula yɩ dapɛnɩ egyimalilɛ titili eyi munwala nu a, ɩhyɛ mansini zʋ ehilalɛvʋlɔ nɩ ɛzɩzɩbɛ baaba. (1Tɛs 1:2, 3; 2:20) Sunzu ɔnwʋmɔ kɛɛ sɛ ɔkɔhʋla ɛkɛyɛ ɔhʋanɩbukolɛ bʋwavʋlɔ wɔ eziyianɩ mɔɔ ibagyela bɛ nɩ nu a. Asʋ̃ ɔkɔhʋla ɛkɛyɛ nhyɩhyɛlɩyɛ na ɛ nɩɩ yɩzayɩ anzɛnyɩɩ yɩ yɩ bɛahɔ dasɩlɛlilɛ anzɛnyɩɩ bɛahɔ bɛayɛ wʋ Bayɩbʋlʋ dɩyɛzumanlɛ be a? Bɛ anyɩ ideli ɔnwʋmɔ kɛɛ bɛ nɩɩ ɛlawulowɔlɛmaa azʋlɔtʋ kɛyɛ egyima, mɔɔ bɛzabɛ mɔɔ bɛdɩ mvʋlɔ nɩɩ bɛzabɛ mɔɔ bɛtɩ nɣanlɩ kɛɛ bézi kilehile nɩ kɩnla ɔnwʋmɔ.

• Dá ngyɛvʋlɔyɛlɛ ali. Sa ɔkʋla ɛma alɩyɛ bɛ ma bedi anzɛnyɩɩ dɩka be bɛ ma bɛda a? Ɛyɛ ɔzɔ a, ɩkɛma mansini zʋ ehilalɛvʋlɔ nɩɩ yɩ yɩ bɛkɛdɩ nɣanlɩ kɛɛ ɔdɔ bɛ. Bɛáhila nninyeni nɣezile ɔhʋanɩ.—Lk 10:38-42.

• Tiyé na fa yɩ ɔhʋanɩhilelɛ nɩɩ fʋlɔdulɛ yɛ egyima. Mansini zʋ ehilalɛvʋlɔ nɩ ɩzʋ̃ ɔlɔlɛ nu ɩbʋwa yɛ ma yɛnwʋ kezimɔ yekodu mpʋnɩ wɔ Gyehova yɩ ɔzʋ̃mɩnlɛ nu. Ɩyɛ sʋ̃ a, sa ɩkʋla ɩfa fʋlɔdulɛ mɔɔ anyɩnlɩbʋlʋ wɔ numɔ ɩma yɛ. (1Kɔl 5:1-5) Sɛ yetiye na yɛfa yɛyɛ egyima a, ɩma yɩ anyɩ ide.—Hib 13:17.

• Dá anyɩnlɩzɔlɛ ali. Kã kezimɔ enyia mfasʋ wɔ mansini zʋ ehilalɛvʋlɔ yɩ nɩɩ yɩ yɩ bɛ mmɔdɩnɩwɔlɛ nɩ zʋ kile bɛ. Sa wʋzawʋ ɔkʋla ɛkã ekile bɛ, ɛma kaadɩ bɛ, anzɛnyɩɩ ɛkɛlɛ kɛlɛta ɛma bɛ.—Kol 3:15.