Gyehova ɩpɛ kɛɛ ɔnwʋ yɩ bʋwɔ. Mɩnla ti a? Ikilaa ɔhʋanɩ kɛɛ sɛ osuma yɩ subanɩ azʋlɔtʋ nɩ nwʋ dɩyɛ, kezimɔ ɩyɛ yɩ dɩyɛ, nɩɩ mɔɔ ɩpɛ kɛɛ ɩyɛ ɩma wʋ nɩ nwʋ dɩyɛ sʋ̃maa a, ekenyia ɛpɛ kɛɛ ɛkɛva yɩ ɔhɔnwʋ. Ede edi kɛɛ ɔkɔhʋla ɛkɛyɛ Nyamɩnlɩ yɩ ɔhɔnwʋ ma ɩkɛyɛ bʋwɔ a? (Kɩnga Ndwomi 25:​14.) Mɩnla yɛ ɔkɔhʋla ɛkɛyɛ na wʋayɛ yɩ ɔhɔnwʋ a? Bayɩbʋlʋ nɩ ɩma ɔzɔ ndwokɔɣizialɛ nɩ nwʋ munwalɩyɛ na ɩma yɛnwʋ kɛɛ Gyehova mɔɔ ɛkɛva yɩ ɔhɔnwʋ nɩ ɩtʋ bʋlɔ ɩtɛla ɔhɔnwʋvalɛ bela.

1. Mɩnla yɛ Gyehova ɩpɛ kɛɛ ɛyɛ a?

“Mʋnlʋmmɔ bɔhwɩ̃ beɣike Nyamɩnlɩ na yɩzayɩ sʋ̃ ɩkɔhwɩ̃ ikeɣike mʋnlʋmmɔ.” (Gyemisi 4:8) Mɩnla yɛ eyi ikile a? Gyehova ɩpɛ kɛɛ ɛba ɛyɛ yɩ ɔhɔnwʋ. Ɩyɛ sɩ ɩma abiyemmɔ kɛɛ bekele bekeli kɛɛ sa bɔkʋla bɛfa Nyamɩnlɩ yɩ ɔhɔnwʋ iluwakɛɛ bɛánwʋ yɩ nɩ ti. Naasʋ̃ wɔ yɩ odwokɔ Bayɩbʋlʋ yi nu nɩ, Gyehova ɩla dɩyɛ bela mɔɔ ɩsɛ kɛɛ yɛnwʋ yɛfalɩ yɩ subanɩ azʋlɔtʋ nwʋ nɩ ali na ama yɛahʋla yɛaɣike yi. Sɛ yɛkɩnga Nyamɩnlɩ yɩ odwokɔ mɔɔ ɩva ɩma yɛ wɔ Bayɩbʋlʋ yi nu a, ɩkɛma yɛ nɩɩ Gyehova ɔhɔnwʋvalɛ nɩ numɔ kɛyɛ sɩ ɩávalɩ ɔnwʋmɔ kɛɛ yɛlɔ́nwʋnlɩ yɩ kyɩ̃ nɩ.

2. Mɩnla ti mɔɔ Gyehova yɛ ɩdɩ Ɔhɔnwʋ mɔɔ ɩtɛla abiyela mɔɔ ɔkɔhʋla ekenyia a?

Abiyela íni ɛkɛnɩ mɔɔ ɩdɔ wʋ ɩtɛla Gyehova. Ɩpɛ kɛɛ wʋ anyɩ ide na ɔkɔ yɩ pɛ mmɩlɩ bela mɔ ekehyinyia mmʋwalɩyɛ nɩ. Sa ɔkʋla ‘ɛfa wʋ adwɩnɩndwɩnɩ munwatĩĩ okua yɩ zʋ, iluwakɛɛ ɩdwɩnɩ wʋ nwʋ.’ (1 Pita 5:7) Gyehova ɩwɔ ɛpɛ eɣile bela kɛɛ ɩkɔwʋwa yɩ ɔhɔnwʋmmɔ, ɩkɛyɩkyɩ bɛ ɛɣɛɛlɛ, na iadiye bɛ.​—Kɩnga Ndwomi 94:​18, 19.

3. Mɩnla yɛ Gyehova ɩpɛ kɛɛ yɩ ɔhɔnwʋmmɔ bɛyɛ a?

Gyehova ɩdɔ abiyela, “naasʋ̃ ɛdɩnɣɛlɛmaa yɛ bɛdɩ Yɩ ɔhɔnwʋmmɔ paa.” (Ɛɣɛlɛwulɛ 3:​32) Gyehova ɩpɛ kɛɛ yɩ ɔhɔnwʋmmɔ bɔbɔ mmɔdɩnɩ bɛyɛ nninyeni mɔɔ ɩnwʋ yɩ kɛɛ ɩdɩ baaba, na bekyí mɔɔ ɩnwʋ yɩ kɛɛ ɩdɩ tanɩ nɩ. Abiyemmɔ bɛtɩ nɣanlɩ kɛɛ bɔlɔ́kʋla bɛkɛyɛ dɩyɛ bela mɔɔ Gyehova ɩpɛ kɛɛ bɛyɛ nɩ. Naasʋ̃, Gyehova ɩdɩ ngokɛnwʋnlɛvʋlɔ. Ide abiyela mɔɔ ɩdɔ Yɩ na ɩbɔ mmɔdɩnɩ kɛɛ ɩkɛyɛ mɔɔ ɩsɔ Yɩ anyɩ nɩ itiã numɔ.​—Ndwomi 147:​11; Egyima 10:​34, 35.

 SUMÁ SƲ̃MAA

4. Nɩ Abilehamɩ ɩdɩ Gyehova yɩ ɔhɔnwʋ

Abilehamɩ (mɔɔ besia bɔfʋlɔ yɩ Abilamɩ) nwʋ odwokɔ mɔɔ ɩwɔ Bayɩbʋlʋ yi nu nɩ, ɩma yɛtɩ Nyamɩnlɩ mɔɔ yɛkɛva yɩ ɔhɔnwʋ nɩ tʋ. Kɩnga Abilehamɩ nwʋ odwokɔ wɔ Gyɛnɛsɩsɩ 12:​1-4. Na bozunzú ndwokɔɣizialɛ eyimmɔ nwʋ:

• Mɩnla yɛ Gyehova ɩhanlɩ kɛɛ Abilehamɩ ɩyɛ́ a?

• Mɩnla anʋhʋba yɛ Gyehova ɩwɔlɩ yɩ a?

• Mɩnla yɛ Abilehamɩ ɩyɛlɩ wɔ mɔɔ Gyehova ɩhanlɩ kɛɛ ɩyɛ́ nɩ nwʋ a?

5. Mɔɔ Gyehova ɩpɛ kɛɛ yɩ ɔhɔnwʋmmɔ bɛyɛ

Mbɔmɩ sʋ̃maa nɩ, yekila ɔhʋanɩ kɛɛ yɛ ɔhɔnwʋmmɔ bɛkɛyɛ nninyeni be bɛkɛma yɛ.

• Mɩnla nninyeni zɛ yɛ ɛpɛ kɛɛ wʋ ɔhɔnwʋmmɔ bɛyɛ bɛma wʋ a?

Kɩnga 1 Dwɔɔnʋ 5:​3, na akʋ̃ bozunzú odwokɔɣizialɛ eyi nwʋ:

• Mɩnla yɛ Gyehova ɩpɛ kɛɛ yɩ ɔhɔnwʋmmɔ bɛyɛ a?

Sutiye mɔɔ yɛkɛyɛ yɛkɛma Gyehova nɩ, ɩpɩbɛ kɛɛ yɛkɛyɛ nzɩnzanlɩyɛ wɔ yɛ nyɛlɩyɛ nɩɩ yɛ subanɩ nu. Kɩnga Ayɩzaya 48:​17, 18, na akʋ̃ bozunzú odwokɔɣizialɛ eyi nwʋ:

• Mɩnla ti yɛ Gyehova ɩpɛ kɛɛ yɩ ɔhɔnwʋmmɔ bɛyɛ nzɩnzanlɩyɛ a?

 6. Mɔɔ Gyehova ɩyɛ ɩfa ɩbʋwa yɩ ɔhɔnwʋmmɔ

 YƖ DƆKƆWƆLƐ

Gyehova ɩpɛ kɛɛ ɩfa wʋ ɔhɔnwʋ, na ɩkɔwʋwa wʋ ma ekeɣike yi.

Kɛ Okowuwa Ekeze a?

• Kɛ Gyehova ɩbʋwa yɩ ɔhɔnwʋmmɔ ise a?

• Mɩnla ti yɛ Gyehova ɩkã kɛɛ yɩ ɔhɔnwʋmmɔ bɛyɛ́ nzɩnzanlɩyɛ a?

• Osunzu kɛɛ Gyehova yɩ ɔhɔnwʋvalɛ ɩyɛ sɩ sʋ̃maa anzɛnyɩɩ? Mɩnla ti a, anzɛnyɩɩ mɩnla ti mɔɔ ɩ́dɩ ɔzɔ a?