OZUMALƐDƖYƐ 5
Mɩnla Adwɩnɩ Yɛ Nyamɩnlɩ Ɩwɔ Yɩ Wɔ Azɩlɛ Yɩ Nwʋ a?
1. Mɩnla ti mɔɔ Nyamɩnlɩ ɩwɔlɩ azɩlɛ yɩ a?
Gyehova ɩvalɩ azɩlɛ yɩ ɩmanlɩ mmenyia nɩɩ mmaalɛ. Ɩdɩ yɛ awudo. Meti, bɛábɔ Adamɩ nɩɩ Yifi, mmenii mɔɔ belili bɔmʋnlɩ bɔwɔlɩ bɛ nɩ kɛɛ bɔwʋ bɛhyɛ sʋlɔ manlɩ—nɩ Nyamɩnlɩ ɩwɔ awɔvʋlɔ dadaada kɛɛ bɔwʋwa sʋlɔ. (Job 38:4, 7, NW) Mfomi, Nyamɩnlɩ ɩvalɩ benyia mɔɔ ili bɔmʋnlɩ yɩ nɩ ɩwʋwalɩ paladayɩsɩ kɩnlɩma be mɔɔ bɔfʋlɛ yɩ kɛɛ Ɛdɩnɩ toolo. (Genesis 2:15-17, NW) Gyehova ɩmanlɩ Adamɩ nɩɩ ɩtʋmaa mɔɔ bɛkɛɣa aɣinzi nɩ anyɩnlɩlazʋ kɛɛ bɔkɔwʋwa azɩlɛ yɩ zʋ eɣile bela.—Kɩnga Egyima 17:26; 1 Dwɔɔnʋ 2:17.
Bɔmʋnlɩ nɩ, nɩ Ɛdɩnɩ toolo nɩ la yɛ ɩdɩ paladayɩsɩ a. Nɩ ɩsɛ kɛɛ Adamɩ nɩ Yɩfi bɔwʋ na bɛfa bɔtʋmaa nɩ bɛhyɛ azɩlɛ yɩ zʋ manlɩ. Mmɩlɩ ɩkɔ ɔzʋlɔ nɩ, nɩ ɩsɛ kɛɛ bedi azɩlɛ yɩ munwatĩĩ zʋ na bɛayɛ yɩ paladayɩsɩ. (Genesis 1:28, NW) Bɛlɛ́sɩkɛ azɩlɛ yɩ kyɩ̃. Ɩkɛyɛ desanii yɩ awudo eɣile bela.—Kɩnga Matiyu 5:5.
Kilá vidiyo mɔɔ ise Mɩnla Ti Mɔɔ Nyamɩnlɩ Ɩwɔlɩ Azɩlɛ Yɩ a?
2. Mɩnla ti mɔɔ azɩlɛ yɩ ɩ́dɩ paladayɩsɩ sikalɛpɛyɩ a?
Adamɩ nɩɩ Yɩfi bɛátiye Nyamɩnlɩ odwokɔ, meti Gyehova iduduli bɛ wɔ toolo yɩ nu. Paladayɩsɩ yɩ iminlinli, na enii bela íni ɛkɛnɩ mɔɔ ɩhʋla izia ɩva ɩɣa. Bayɩbʋlʋ ɩkã kɛɛ: “Na amumuyɛmaa nɩɩ nahɩlɩbɛmaa bɛbahɔlɩ ɔzʋlɔ bɛkɛyɛ tanɩ ma ɩkɔwʋlʋ zʋ.”—2 Timoti 3:13.
Asʋ̃ Gyehova iyiaki itile nu pɔkɔ mɔɔ ɩwɔ ɩma enii yɩ nu a? Anhã! Ɩdɩ tumivʋlɔ. Ɩlɔ́kʋla ikeli awohwi. (Isaiah 45:18, NW) Sa isia ɩma itile nu adwɩnɩ mɔɔ ɩwɔ ɩma adasamaa nɩ ɩba numɔ.—Kɩnga Wulomimaa 8:21.
3. Kɛ ɩkɛyɛ na Paladayɩsɩ nɩ iazia ɩaɣa?
Paladayɩsɩ nɩ ikezia ɩkɛɣa azɩlɛ yɩ zʋ mmɩlɩ mɔɔ Gyisɛsɩ idi tumi kɛɛ Nyamɩnlɩ yɩ Bolumbunli nɩ. Wɔ kʋnɛ be mɔɔ bɔfʋlɛ yɩ Amagadɔnʋ yɩ nu nɩ, Gyisɛsɩ ikeli Nyamɩnlɩ yɩ awɔvʋlɔ yɩ bɛayunu na bazɩkɛ mmenii mɔɔ botwodwu betiyia Nyamɩnlɩ nɩ. Akʋ̃, Gyisɛsɩ ɩkɛva Setanɩ ikediã fiyiadɩ alʋbɔ abʋmɩ (1,000). Nyamɩnlɩ yɩ mmenii bekenyia beti bekelili numɔ wɔ ɛzɩkɛlɛ yɩ nu iluwakɛɛ, Gyisɛsɩ ikehile ɔhʋanɩ bɛ na ɩawɔ bɔnwʋ banɩ. Bekenyia nnwʋanlɩ mɔɔ íni awielɩyɛ wɔ Paladayɩsɩ azɩlɛ yɩ zʋ.—Kɩnga Yikile 20:1-3; 21:3, 4.
4. Eɣile sina yɛɛ amanɩyɛnwʋnlɛ ɩtʋ ikodua a?
Eɣile sina yɛɛ Nyamɩnlɩ ɩkɛva tanɩyɛlɛ ɩkɛɣa awielɩyɛ wɔ azɩlɛ yɩ zʋ a? Gyisɛsɩ ihileli “sɛnkyɩlɛdɩ” mɔɔ ikehile kɛɛ awielɩyɛ nɩ iɣike. Nninyeni mɔɔ isizi nnɛ yɩ nɩ ɩma yɛnwʋ yɩ kɛɛ “oyuwadɩ eyi ɩbaa awielɩyɛ.”—Kɩnga Matiyu 24:3, 7-14, 21, 22.
Wɔ Gyisɛsɩ yɩ alʋbɔ abʋmɩ (1,000) tumi mɔɔ ɩzʋ̃ sʋlɔ ikeli wɔ azɩlɛ yɩ zʋ nɩ, ɩkɛva amanɩyɛnwʋnlɛ munwatĩĩ ɩkɛɣa awielɩyɛ. (Isaiah 9:6, 7; 11:9, NW) Sɛ yɛfa Bulombunli mɔɔ idii nɩ yetiã ahanlɩ a, Gyisɛsɩ ɩkɛyɛ egyima kɛɛ Ɔsɔfʋ Ebani na ɩabɩba mmenii mɔɔ bɔdɔ Nyamɩnlɩ nɩ bɛ tanɩ. Meti iluwa Gyisɛsɩ zʋ nɩ, Nyamɩnlɩ ɩbɛayɩ adimakɛlɛ, mmɩlɩɣayɛlɛ, nɩɩ owulo wɔ ɛkɛnɩ.—Kɩnga Matiyu 9:35; Yikile 7:17; 1 Kɔlɛntɩmaa 15:26.
5. Aninyiammɔ yɛɛ bɔkɔwʋwa eɣile be Paladayɩsɩ yɩ nu a?
Wɔ Bulombunli Ayiyialɩyɛ Aliyia nu nɩ, ekeyiyia mmenii mɔɔ bɔdɔ Gyehova na bɛpɛyɩ kɛɛ bosuma kezimɔ bɔkɔzɔ ɩanyɩ
Mmenii mɔɔ bɛyɛ sutiye bɛma Nyamɩnlɩ nɩ yɛ bɔkɔwʋwa Paladayɩsɩ yɩ nu a. (1 Dwɔɔnʋ 2:17) Gyisɛsɩ ɩzʋ̃manlɩ yɩ adʋwavʋlɔ yɩ kɛɛ bɔhɔ́ bɛbɩbɛ mmenii mɔɔ bɛkã bɔnwʋ azɩ na behilehile bɛ kezimɔ bɔkɔzɔ Nyamɩnlɩ anyɩ. Nnɛ, Gyehova isiyeziyee mmenii mbɩmmbɩɩ ma bekenyia nnwʋanlɩ wɔ eɣile be Paladayɩsɩ azɩlɛ yɩ zʋ. (Zephaniah 2:3, NW) Wɔ Gyehova Dasɩvʋlɔmaa bɛ Bulombunli Ayiyialɩyɛ Nniyia nu nɩ, mmenii suma kezimɔ bɛkɛyɛ ohunɛ, ɛzɩlɛ, ɛyɩlɛ nɩɩ enlilɛmaa baaba. Nnwuakula nɩɩ awʋvʋlɔ bɔbɔ numɔ bɔsʋ̃mɩ na bosuma kezimɔ bekenyia odwokɔba nɩ yɩ zʋ mfasʋ.—Kɩnga Yikile 15:4.
