Hibulu dima Bɛtɩlɩ nɩ, ikile, “Nyamɩnlɩ Awudo.” (Genesis 28:17, 19, NW, azɩ ɛkɛnɩ odwokɔ) Ɩdɩ dima mɔɔ ɩfata ɩma nniyia mɔɔ Gyehova Dasɩvʋlɔmaa begyinagyina wɔ oyuwadɩ yɩ dɩka bela, mɔ bɛfa bɔbʋwa na bekile odwokɔhanlɛ egyima yɩ ɔhʋanɩ. Ɔhʋanɩhilelɛ Okuwu ɩyɛ yɩ egyima wɔ New York State, U.S.A. mɔɔ ɩdɩ yɛ egyimayɛlɛ nnɩka iti, na ɛkɛnɩ yɛ ɩzʋ̃ ikila egyima mɔɔ ɩkɔlɩ ɔzʋlɔ wɔ yɛ egyimayɛlɛ nnɩka mɔɔ ɩwɔ manlɩ azʋlɔtʋ nu nɩ ɩzʋ a. Kɛ okuwu yɩ nɩ, bɔfʋlɛ mmenii mɔɔ bɛyɛ egyima wɔ ɔzɔ nnɩka yɩ kɛɛ Bɛtɩlɩ abusunwa. Dɩkɛ abusunwa nɩ, bɔbʋwa bɔbɔ nu, bɛyɛ egyima bɔbɔ nu, bedi alɩyɛ bɔbɔ nu, na bosuma Bayɩbʋlʋ yɩ sʋ̃ bɔbɔ numɔ wɔ ɔkʋ̃yɛlɛ nu.—Psalm 133:1, NW.

Dɩka sʋnʋnkʋ̃ mɔɔ abusunwa nu enii bela itu yɩ nwʋ ɩma. Wɔ Bɛtɩlɩ egyimayɛlɛ dɩka bela nɩ, yɛwɔ Kilisinyiamaa mmenyia nɩɩ mmaalɛ mɔɔ bodu bɔnwʋ bɛma kɛɛ bɛkɛyɛ Nyamɩnlɩ yɩ apɛdɩ na bɛlɛ bɛ mmɩlɩ munwatĩĩ bɔbʋwa Bulombunlililɛ egyima yɩ nɩ. (Matiyu 6:33) Bonu bela ɩále akatuwa, na mfomi bɛma alɩyɛ nɩɩ nnɩka mɔɔ bɛkɛla nɩɩ ozukua ɛgyɩkɩ̃ɩ̃ mɔɔ bɛfa botudua bɔnwʋ. Abiyela mɔɔ ɩwɔ Bɛtɩlɩ nɩ, ɩwɔ egyima mɔɔ ɩyɛ, bonu be yɛ egyima wɔ ɔfɩsɩ, egyialɩ, anzɛnyɩɩ alɩyɛlilɛ dɩka. Ebiyemmɔ sʋ̃ bɛyɛ egyima wɔ dɩka mɔɔ betindimi anzɛnyɩɩ bɛyɛ awuuku, anzɛnyɩɩ besiyeziye nniyia nu, nninyeni bɩdalɛ dɩka, dɩka mɔɔ besiyeziye nninyeni, anzɛnyɩɩ nninyeni mvʋlɔ.

Dɩka mɔɔ bɛyɛ egyima ɛzɩzɩbɛ bɔbʋwa Bulombunlililɛ odwokɔhanlɛ egyima. Bɛtɩlɩ bela yɩ bʋtayɩ titili yɛ lɛ kɛɛ, ɩkɛma mmenii sʋ̃maa zɛ bɔkɔnwʋ Bayɩbʋlʋ yɩ nu nɔhʋanlɛ odwokɔ. Blohyʋɔ eyi ɩdɩ numɔ ɔkʋ̃. Ɔhʋanɩhilelɛ Okuwu yɩ yɛɛ ihilalɩ ma bɛhɛlɛlɩ a, na bɛvalɩ boluwalɩ kɔmpiyuta zʋ bɛmanlɩ odwokɔtʋhilelɛ okuwu azʋlɔtʋ mɔɔ bɔwɔ oyuwadɩ yɩ dɩka bela nɩ, na behileli yɩ tʋ bowieli nɩ, bɛvalɩ bɔnwʋanlɩ Bɛtɩlɩ egyimayɛlɛ nnɩka mɔɔ betindimi ɔnwʋma ma bɛvalɩ mahyini mɔɔ ɩyɛ egyima ndɛndɛ bedindiminli, na mmɩlɩ mɔɔ bowieli yɩ nɩ, bɛvalɩ awuuku mɔɔ bedindimi nɩ bɔnwʋanlɩ asafʋ̃ azʋlɔtʋ mɔɔ ɩbʋ 110,000. Wɔ egyima eyi yɩ ɔfʋã bela nu nɩ, Bɛtɩlɩ mmusunwa bɛfa mmʋwalɛ mɔɔ ɔnwʋmɔ ihyinyia bɔbʋwa egyima eyi mɔɔ ide ndɛmɩ-bɛlɛ yɩ nɩ—odwokɔba yɩ nwʋ odwokɔhanlɛ yɩ nɩ.—Maakɩ 13:10.

• Aninyiammɔ yɛɛ bɔsʋ̃mɩ wɔ Bɛtɩlɩ a, na mɩnla ɔhʋanɩ zʋ yɛɛ bekila bɛ a?

• Egyima mɔɔ ihyinyia ɛhɩnla dɩyɛ yɛɛ Bɛtɩlɩ bela fa yɩ egyimayɛlɛ ɩbʋwa a?