OZUMALƐDƖYƐ 11
Bɛhɛlɛlɩ Gyisɛsɩ Ɩnwʋ Ndwokɔ
Ɔnwʋ mmenyia nɩ mɔɔ bɔwɔ mfonyini yi nu yɩ a?— Bɔnlʋmmɔ yɛ lɛ Matiyu, Maakɩ, Luuku, Dwɔɔnʋ, Pita, Gyemisi, Dwuudu nɩɩ Pɔɔlʋ. Ɔzɔ mmenyia eyimmɔ munwala bɔwʋwalɩ azɩ wɔ mmɩlɩ mɔɔ nɩ Gyisɛsɩ ɩwɔ azɩlɛ yɩ zʋ nɩ, na bɛhɛlɛlɩ Gyisɛsɩ ɩnwʋ ndwokɔ. Ma yezuma bɔnwʋ ndwokɔ sʋ̃maa.
Mɩnla yɛɛ ezi wɔ ɔzɔ mmenyia eyimmɔ bɔnwʋ a?
Nɩ bonu asã bɛdɩ asʋ̃mavʋlɔ mɔɔ bɛ nɩɩ Gyisɛsɩ bɛhanlɩ odwokɔba nɩ. Ezi ɔzɔ mmenyia asã yɩ nɩ a?— Bɔnlʋmmɔ yɛ lɛ Matiyu, Dwɔɔnʋ, nɩɩ Pita. Nɩ asʋ̃mavʋlɔ Matiyu nɩɩ Dwɔɔnʋ bezi Gyisɛsɩ bʋwɔ baaba, na bonu bela ɩhɛlɛlɩ buuku mɔɔ ɩfalɩ Gyisɛsɩ yɩ azɩwʋwalɛ nwʋ. Ɔzʋ̃mavʋlɔ Dwɔɔnʋ ɩhɛlɛlɩ Yikile buuku yi nɩɩ ahɛlɛta asã mɔɔ mɛyɩ yɛ lɛ Dwɔɔnʋ yɩ kɛlɛta nɩ mɔɔ ili bɔmʋnlɩ, Dwɔɔnʋ yɩ kɛlɛta nɩ mɔɔ ɩtɔ ɔzʋlɔ anwɩ̃, nɩɩ Dwɔɔnʋ yɩ kɛlɛta nɩ mɔɔ ɩtɔ ɔzʋlɔ asã. Ɔzʋ̃mavʋlɔ Pita sʋ̃ ɩhɛlɛlɩ ahɛlɛta anwɩ̃ mɔɔ ɩwɔ Bayɩbʋlʋ yi nu. Bɔfʋlɔ yɩ Pita yɩ kɛlɛta nɩ mɔɔ ili bɔmʋnlɩ nɩɩ Pita yɩ kɛlɛta nɩ mɔɔ ɩtɔ ɔzʋlɔ anwɩ̃. Wɔ yɩ kɛlɛta nɩ mɔɔ ɩtɔ ɔzʋlɔ anwɩ̃ yi nu nɩ, Pita ɩhɛlɛlɩ ɩvalɩ mmɩlɩ be mɔɔ Gyehova ɩzʋ̃ sʋlɔ ɩdɩndɛnlɩ, na ɩhanlɩ ɩvalɩ Gyisɛsɩ ɩnwʋ kɛɛ: “Eyi yɛ ɩdɩ mɩzamɩ mʋ ɔdɔɣalɛ nɩ a. Mɩ anyɩ ideli yɩ nwʋ.”
Mmenyia mvʋlɔ sʋ̃ mɔɔ bɔwɔ mfonyini yi nu nɩ, bekilehile yɛ Gyisɛsɩ ɩnwʋ ndwokɔ wɔ awuuku mɔɔ bɛhɛlɛlɩ yi nu sʋ̃. Bonu ɔkʋ̃ yɛ lɛ Maakɩ. Ɩkɛyɛ kɛɛ, nɩ ɩwɔ ɛkɛnɩ mmɩlɩ mɔɔ bɛhyɩlɩ Gyisɛsɩ nɩ, na ɩnwʋnlɩ dɩyɛ bela mɔɔ izili. Enii fʋlɔ sʋ̃ yɛ lɛ Luuku. Nɩ ɩdɩ dɔkɩta, na ebiye a, ɩɣa ɩyɛlɩ Kilisinyianii wɔ Gyisɛsɩ yi owulo mɛda.
Bayɩbʋlʋ ɛhɛlɛlɛmaa mvʋlɔ anwɩ̃ mɔɔ ɔnwʋ bɛ wɔ mfonyini yi nu nɩ, bɛdɩ Gyisɛsɩ yɩ mmenlima nnwuakula. Ezi be dima a?— Be dima yɛ lɛ Gyemisi nɩɩ Dwuudu. Ahyɛasɩ nɩ, nɩ bɛále Gyisɛsɩ bedi. Nɩ bɔdwɩnɩ po kɛɛ yi ti ɩzɩkɛ. Naasʋ̃ aɣinzi nɩ, bɛɣa beleli Gyisɛsɩ belili na bɛɣa bɛyɛlɩ Ahilisinyiamaa.
Bayɩbʋlʋ ɛhɛlɛlɛmaa mɔɔ ɔnwʋ bɛ wɔ mfonyini yi nu nɩ, mɔɔ ili awielɩyɛ yɛ lɛ Pɔɔlʋ. Ansaana ɩbɛayɛ Kilisinyianii nɩ, nɩ bɔfʋlɔ yɩ Sɔɔlʋ. Nɩ ikyi Kilisinyiamaa nɩ mmɔ na ɩ nɩɩ bɛ lili wɔ atinuzɩzɩbɛ ɔhʋanɩ zʋ. Ezi mɔɔ ɩmanlɩ Pɔɔlʋ ɩɣa ɩyɛlɩ Kilisinyianii a?— Eɣile ɔkʋ̃ be mɔɔ nɩ Pɔɔlʋ iluwa ɔhʋanɩ zʋ itu ɔhʋanɩ nɩ, aɣilevinle nu la yɛ ɩdɩlɩ kɛɛ abiye ɩzʋ̃ sʋlɔ ɩtɩndɛɛ ikile yɩ a. Nɩ ɩdɩ Gyisɛsɩ! Iɣizialɩ Pɔɔlʋ kɛɛ: ‘Mɩnla ti mɔ ɛ nɩɩ mmenii mɔ bede mɩ bedi nɩ di wɔ atinuzɩzɩbɛ ɔhʋanɩ zʋ ɛzɛ yɩ a?’ Mɛyɩ mɛda nɩ, Pɔɔlʋ ɩzɩnzanlɩ na ɩɣa ɩyɛlɩ Kilisinyianii. Pɔɔlʋ ɩhɛlɛlɩ awuuku 14 wɔ Bayɩbʋlʋ yi nu, ɔzʋmɩ Wulomimaa kɔbʋmɩ Hibulumaa.
Yɛkɩnga Bayɩbʋlʋ yɩ eɣile bela, ɩ́dɩ ɔzɔ a?— Iluwa Bayɩbʋlʋ mɔɔ yɛkɩnga zʋ nɩ, yesuma nninyeni sʋ̃maa mɔɔ ɩfalɩ Gyisɛsɩ nwʋ. Asʋ̃ ɛkɛbɛyɩ kɛɛ okozuma Gyisɛsɩ ɩnwʋ dɩyɛ sʋ̃maa?—
