Irma nɛ e je Germany ɔ ye maa pee jeha 90. Akɛnɛ e ná oslaa nɛ mi wa si enyɔ nɛ a pee lɛ operation si abɔ hu he je ɔ, e nyɛ we nɛ e tsu we mi kɛ we mi fiɛɛmi ní tsumi ɔ hu kaa bɔ nɛ e peeɔ sa a. Amlɔ nɛ ɔ, Irma guɔ sɛ womi ngmami nɔ nɛ e kɛ e weku li kɛ e huɛmɛ sɛɛɔ e hemi kɛ yemi ɔ he ní. Irma sɛ womi ɔmɛ woɔ ni ɔmɛ he wami wawɛɛ nitsɛ, enɛ ɔ he ɔ, a tsɛɛɔ lɛ ngɛ fon nɔ nɛ a biɔ lɛ ke mɛni be nɛ e maa kpale ngma mɛ sɛ womi ekohu. Ni ɔmɛ hu ngmaa lɛ sɛ womi kɛ naa lɛ si nɛ a deɔ lɛ ke e ngma mɛ sɛ womi ekohu. Irma de ke, “Enɛ ɔmɛ tsuo haa nɛ ye bua jɔɔ, nɛ I yaa nɔ nɛ I fiɛɛɔ.”

 Irma hu ngmaa sɛ womi kɛ haa nihi nɛ a wa ngɛ jeha mi. E de ke: “Yo nɔkɔtɔma ko fia mi ngɛ fon nɔ nɛ e de mi ke sɛ womi nɛ i ngma kɛ mane lɛ benɛ e huno ɔ gbo ɔ wo e bua wawɛɛ. E ngɔ sɛ womi ɔmɛ kɛ wo e Baiblo ɔ mi nɛ daa gbɔkuɛ ɔ, e kaneɔ. Yo ko hu nɛ e huno gbo lingmi nɛ ɔ de ke ye sɛ womi ɔ ye bua lɛ wawɛɛ pe osɔfo ɔmɛ a munyu ɔmɛ. E ngɛ sane bimihi fuu nɛ e suɔ kaa e ná a heto ɔmɛ, nɛ e bi mi ke ji kaa e ma nyɛ ma ba slaa mi lo.

 Yo ko nɛ Irma lɛ le ngɛ a kpɔ ɔ mi, se pee se ɔ e hia kɛ ya hi he kpa a de Irma ke e ngma lɛ sɛ womi. Irma tsɔɔ kaa yo nɛ ɔ ngɔ sɛ womihi tsuo nɛ e ngma ha lɛ ɔ kɛ to. Benɛ yo nɛ ɔ gbo se ɔ, e bi yo ɔ fia Irma nɛ e de lɛ ke, e kane sɛ womihi tsuo nɛ e ngma kɛ ha e yayo ɔ, nɛ e kpa Irma pɛɛ kaa e je mi mi jɔmi mi nɛ e da Baiblo ɔ nɔ kɛ ngma sɛ womihi ha lɛ.

 Irma bua jɔ fiɛɛmi ní tsumi ɔ he wawɛɛ. E de ke, “Daa nɛ ɔ, I kpaa Yehowa pɛɛ kaa e ha mi he wami nɛ ma nyɛ ma kɛ sɔmɔ lɛ. E ngɛ mi kaa I nyɛ we ma tsu we mi kɛ we mi fiɛɛmi ní tsumi ɔ mohu lɛɛ, se I peeɔ nɔ́ nɛ ma nyɛ.”