Ngɛ February 1, 1943 ɔ, a je sukuu klɛdɛɛ ko sisi ngɛ New York yi ti je. Amlɔ nɛ ɔ, a le jamɛ a sukuu ɔ kaa Watchtower Gilead Baiblo Sukuu. Sukuu nɛ ɔ tsɔse nyumuhi kɛ yihi nɛ a he hiɛ pe 8,000. Nihi nɛ a ya sukuu nɛ ɔ je je ɔ mi he slɔɔtohi.

Jonathan nɛ gbe Gilead sukuu ɔ nya lingmi nɛ ɔ de ke: “Tsɔsemi nɛ da Mawu Munyu ɔ nɔ nɛ a kɛ ha wɔ ɔ maa ye bua wɔ saminya ngɛ he tsuaa he nɛ wa ma ya sɔmɔ ngɛ ɔ.” E yo Marnie hu de ke: “Sukuu ɔ ye bua mi nɛ i na kaa e sa nɛ ma ye bua nihi konɛ a na kaa yi mi nɛ wa Bɔlɔ ɔ to kɛ ha wɔ ɔ se be. I ná nɔ mi mami kaa ke i ye bua nihi nɛ a ba le Yehowa a, a si himi maa pee kpakpa.”

Nihi kɛ nyɔhiɔ enuɔ nɛ yaa Gilead sukuu ɔ nɛ a wui he hiɔ. Baiblo ɔ kɛ fiɛɛmi ní tsumi ɔ he ní titli a kaseɔ. Nihi nɛ sukuu nɛ ɔ tsɔseɔ mɛ ɔ woɔ Mawu we bi he wami, nɛ a yeɔ bua a nyɛmimɛ Kristofohi konɛ a ná su kpakpahi nɛ maa ye bua mɛ kɛ da nyagbahi a nya. Jehanɛ ɔ, sukuu bi ɔmɛ náa he blɔ kɛ susuɔ Ngmami ɔ mi sisi tomi mlaahi a he. Enɛ ɔ yeɔ bua mɛ nɛ huɛ bɔmi nɛ ngɛ a kɛ Yehowa Mawu kpɛti ɔ mi waa.

Nihi nɛ a sɛ gba si himi mi nɛ a yaa Gilead sukuu ɔ ji nihi nɛ a kɛ a be tsuo fiɛɛ sane kpakpa a. Ke a gbe sukuu ɔ nya a, a haa nɛ a kpaleɔ kɛ yaa a ma mi, aloo a ya sɔmɔɔ ngɛ ma kpahi a nɔ. Jehanɛ se hu ɔ, a haa nɛ a ti ni komɛ ya sɔmɔɔ ngɛ Yehowa Odasefohi a ní tsumi kɔnihi 90 kɛ se ɔ ekomɛ a mi. A ti nihi fuu ya sɔmɔɔ ngɛ ma nguahi a mi konɛ a fiɛɛ kɛ ha nihi babauu.

A je Gilead sukuu ɔ sisi ngɛ Kingdom Farm, ngɛ South Lansing, New York. Se pee se ngɛ jeha 1961 ɔ mi ɔ, a je sukuu ɔ kɛ je Kingdom Farm kɛ ya Yehowa Odasefohi a ní tsumi yi nɛ ngɛ Brooklyn ngɛ New York ɔ. A pee sukuu nɛ ɔ ngɛ Watchtower Farms, ngɛ Wallkill, New York kɛ je jeha 1988 kɛ ba si jeha 1995. Se ngɛ jeha 1995 ɔ mi ɔ, a kpale je sukuu ɔ kɛ ya Watchtower Educational Center, ngɛ Patterson, New York. Lejɛ ɔ nɛ a peeɔ sukuu ɔ ngɛ kɛ ba si amlɔ nɛ ɔ. Ngɛ March 2013 mi nɛ a gbe sukuu ɔ nɔ́ nɛ to nɔ 134 ɔ nya.

Ngɛ jeha 70 nɛ be ɔ mi ɔ, nihi nɛ a ya Watchtower Gilead Baiblo Sukuu ɔ ye Yehowa he odase kɛ pi si.