Dɛbi. Wa asafo ɔ pee we níhi a mi hlami ngɛ sinihi, womihi, loo la pɔtɛɛ komɛ a he nɛ a wo mlaa ngɛ he kɛ ha nihi nɛ a ngɛ asafo ɔ mi ɔ. Mɛni he je?

Baiblo ɔ woɔ wɔ he wami kaa ‘wa tsɔse wa juɛmi’ nɛ waa le slɔɔto nɛ ngɛ kpakpa kɛ yayami a kpɛti.​—Hebri Bi 5:14.

Blɔ tsɔɔmihi ngɛ Baiblo ɔ mi nɛ maa ye bua Kristofo no ngɛ nɔ́ nɛ e maa hla kɛ je e hɛja a he. a Oti nɛ waa kɛ ma wa hɛ mi ngɛ nɔ́ tsuaa nɔ́ nɛ wa peeɔ ɔ mi ji kaa wa maa “kase Nyɔmtsɛ ɔ suɔmi nya ní.”​—Efeso Bi 5:10.

Baiblo ɔ tsɔɔ kaa wekuyihi a blɔ nya ní tsumi ji kaa a maa tsɔɔ a weku mi bimɛ ɔmɛ hɛja jemihi nɛ sa, kɛ ní nɛmɛ nɛ sɛ. (1 Korinto Bi 11:3; Efeso Bi 6:1-4) Nɔ ko ma nyɛ maa wo mlaa ngɛ sinihi kɛ lahi a he ngɛ e weku ɔ mi, se e be nyɛe maa wo mlaa ngɛ ní nɛ ɔmɛ a he kɛ ha Odasefohi tsuo.​—Galatia Bi 6:5.