Yesu kɛ e kaseli ɔmɛ yaa Galilea ekohu. E su gbiɛ be mi, nɛ ngma amɛ wo ní ngɛ ngmɔ ɔmɛ a nɔ. Hwɔ ngɛ Yesu kaseli ɔmɛ yee, lɔ ɔ he ɔ, a ku ngma a eko nɛ a kpe. Se jamɛ a ligbi ɔ, Hejɔɔmi ligbi, nɛ Farisi bi ɔmɛ na mɛ.

Mo kai kaa e kɛ we kulaa nɛ Yuda bi komɛ po Yesu nya ngɛ Yerusalem kaa e tɔ̃ Hejɔɔmi ligbi mlaa a nɔ, nɛ a to kaa a maa gbe lɛ. Amlɔ nɛ ɔ, Farisi bi ɔmɛ a da nɔ́ nɛ e kaseli ɔmɛ a pee ɔ nɔ kɛ po e nya ke: ‘Hyɛ, nɔ́ nɛ o kaseli ɔmɛ ngɛ pee nɛ ɔ, mlaa a ngmɛ́ blɔ kaa a peeɔ ngɛ Hejɔɔmi ligbi ɔ nɔ.’​​—Mateo 12:2.

Farisi bi ɔmɛ deɔ ke, ke nɔ ko ku ngma nɛ e bo ngɛ e dɛ mi ɔ, lɔ ɔ tsɔɔ kaa e kpa ngma nɛ e gbee. (2 Mose 34:21) Jinɛ e sa nɛ Hejɔɔmi ligbi ɔ nɛ pee bua jɔmi ligbi, se akɛnɛ Farisi bi ɔmɛ a pee kpɛii ngɛ Mawu mlaa a he he je ɔ, Hejɔɔmi ligbi ɔ ba pee tloomi ha ni ɔmɛ. Yesu ha mɛ nɔ hyɛmi níhi nɛ tsɔɔ kaa Yehowa Mawu sume nɛ Hejɔɔmi ligbi ɔ nɛ pee tloomi kɛ ha nɔ ko.

Nɔ hyɛmi nɔ́ kake nɛ Yesu ha mɛ ɔ kɔɔ David kɛ nyumuhi nɛ a piɛɛ e he ɔ a he. Benɛ hwɔ ngɛ mɛ yee ɔ, a ya sɔlemi we ɔ, nɛ a ya ye abolo nɛ a kɛ maa Mawu hɛ mi ɔ. Abolo nɛ a ye ɔ ye otsi ngɛ Yehowa hɛ mi momo, nɛ a kɛ ehe ba to nane mi, lɔ ɔ he ɔ, jinɛ osɔfo ɔmɛ lɛ a maa ye abolo momo ɔ. Se ngɛ si fɔfɔɛ nɛ David kɛ e we bi ɔmɛ ya je mi ɔ he je ɔ, ke a ye ɔ, a tɔ we.​​—3 Mose 24:5-9; 1 Samuel 21:1-6.

Ngɛ nɔ hyɛmi nɔ́ enyɔne ɔ mi ɔ, Yesu de ke: “Aloo nyɛ kane we ngɛ Mose mlaa a mi kaa daa Hejɔɔmi ligbi ɔ, osɔfohi nɛ ngɛ sɔlemi we ɔ bleɔ  Hejɔɔmi ligbi ɔ, se kɛ̃ ɔ, a yi fɔ lo?” Nɔ́ nɛ Yesu ngɛ tsɔɔe ji kaa ngɛ Hejɔɔmi ligbi ɔ nɔ po ɔ, osɔfo ɔmɛ gbeɔ lohwehi nɛ a kɛ sãa bɔ, nɛ a tsuɔ ní tsumi kpahi hulɔ ngɛ sɔlemi we ɔ. Yesu ya nɔ nɛ e de ke: “I ngɛ nyɛ dee ke, nɔ́ ko ngɛ hiɛ ɔ nɛ pe sɔlemi we ɔ.”​​—Mateo 12:5, 6; 4 Mose 28:9.

Yesu da Ngmami ɔ nɔ ekohu nɛ e de mɛ nɔ́ nɛ e ngɛ hlae nɛ a nu sisi ɔ. E de mɛ ke: ‘Ngmami ɔ ke, “Mɔbɔ nami i ngɛ hlae, se pi bɔ sami.” Nyɛ le nɔ́ nɛ ɔ sisi jinɛ nihi nɛ yi fɔ ɔ, nyɛ ko bui mɛ fɔ.’ Kɛkɛ nɛ Yesu gbe nya ke: ‘Ejakaa Mawu Bi ɔ, Hejɔɔmi ligbi ɔ tete Nyɔmtsɛ ji lɛ.’ Lɛ nitsɛ e jeha akpe Matsɛ Yemi nɛ kɛ tue mi jɔmi maa ba a he munyu e ngɛ tue ɔ nɛ.​​—Mateo 12:7, 8; Hosea 6:6.

Jeha babauu ji nɛ ɔ, basabasa peemi kɛ ta hwumi nɛ ngɛ nɔ yae ɔ ha nɛ adesahi ngɛ nɔ́ nae ngɛ Satan dɛ mi. Ke Hejɔɔmi ligbi ngua a je sisi nɛ Kristo bɔni tsɛ yemi ɔ, hyɛ bɔ nɛ wa he mi maa jɔ wɔ ha!