Benɛ kaseli 12 ɔmɛ ya fiɛɛ ngɛ Galilea kpokpa a nɔ tsuo ɔ, a bua jɔ wawɛɛ. Enɛ ɔ he ɔ, a ya bɔ Yesu “níhi nɛ a ya pee, kɛ níhi nɛ a ya tsɔɔ ɔ tsuo.” Ngɛ anɔkuale mi ɔ, pɔ tɔ a he wawɛɛ. Se a nɛ́ deka nɛ a kɛ maa ye ní po, ejakaa nihi babauu ngɛ a ngɔ bae. Enɛ ɔ ha nɛ Yesu de e kaseli ɔmɛ ke: “Nyɛ ha nɛ wɔ kɔklɔɔ waa ya he ko banee nɛ nyɛ ya jɔɔ nyɛ he bɔɔ.”​​—Marko 6:30, 31.

A sɛ lɛ mi ngɛ he ko nɛ kɛ Kapernaum kɛ we konɛ a ya jɔɔ a he ngɛ he ko nɛ nɔ ko be mɛ nae. Eko ɔ, jinɛ a yaa Betsaida ní ɔmɛ a mi ngɛ Yordan Pa a se. Se nihi babauu na mɛ, nɛ ni kpahi hu nu kaa a yaa. Benɛ a ke a suu pa a se ɔ, ni ɔmɛ hu su lejɛ ɔ momo nɛ a ngɛ mɛ mlɛe.

Benɛ Yesu je lɛ ɔ mi nɛ e na nimli babauu nɛ a pueɔ si ɔ, e mi mi sa lɛ ngɛ a he, ejakaa a ngɛ kaa tohi nɛ a be hyɛlɔ. Lɔ ɔ he ɔ, Yesu bɔni mɛ Matsɛ Yemi ɔ he “níhi fuu tsɔɔmi.” (Marko 6:34) Lɔ ɔ se ɔ, e tsa “nihi nɛ tsami he hia mɛ ɔ” hulɔ. (Luka 9:11) Benɛ be ho saii ɔ, kaseli ɔmɛ de Yesu ke: “Ngapa ji hiɛ ɔ, nɛ du bu. Wó ni ɔmɛ blɔ kɛ ho kɔpe ɔmɛ a mi ya, nɛ a ya he ní nɛ a ye.”​​—Mateo 14:15.

Se Yesu de mɛ ke: “E hia we kaa a ya; nyɛ nitsɛmɛ nyɛ hla nɔ́ ko ha mɛ nɛ a ye.” (Mateo 14:16) E ngɛ mi kaa Yesu le nɔ́ nɛ e maa pee mohu lɛɛ, se e je blɔ nɛ e bi Filipo ke: “Jije wa ma he niye ní ngɛ nɛ maa su nimli nɛ ɔmɛ a nya?” Filipo ji nɔ nɛ ma nyɛ ma je sane nɛ ɔ nya ejakaa e we mi kɛ Betsaida kɛ we. Se pi niye ní nɛ a ma he ɔ ji sane ɔ. Ejakaa nyumuhi maa pee 5,000 lɛ maa ye ní ɔ. Ke a kane yihi kɛ jokuɛwi kɛ piɛɛ he ɔ, eko ɔ, nihi nɛ a ngɛ lejɛ ɔ maa su 10,000! Filipo ha heto ke: “Sika hiɔ [denario kake nɛ ji ligbi kake hiɔwo ɔ] lafa enyɔ nya abolo po be mɛ sue nya mi bɔ kakaaka.”​​—Yohane 6:5-7.

Eko ɔ, bɔ nɛ pee nɛ a na kaa a be nyɛe maa hyɛ ni ɔmɛ tsuo a nɔ ɔ, Andrea de ke: “Jokuɛ nyumuyo ko ngɛ hiɛ ɔ nɛ hɛɛ abolo bɔbɔɛ enuɔ nɛ a kɛ ngma pee, kɛ lo tsɔwi enyɔ, se lɔ ɔmɛ po tsa sui nɔ́ ko kɛ ha ma kpekpemi nɛ ɔ.”​​—Yohane 6:9.

Jamɛ a be ɔ mi ɔ, e su gbiɛ be, nɛ e piɛ bɔɔ nɛ a maa ye jeha 32 Hetsɔmi ɔ. Enɛ ɔ he ɔ, nga mumu sɔuu lɛ ha yoku ɔmɛ a nɔ. Yesu de e kaseli ɔmɛ kaa a ha nɛ ni ɔmɛ tsuo nɛ a hi si ngɛ nga a nɔ, nɛ́ a bua a he nya nyingminuɔɔnuɔ, loo lafalafa. Kɛkɛ nɛ e kɛ̃ abolo enuɔ ɔ kɛ lo enyɔ ɔ, nɛ e na Mawu si, nɛ e ku abolo ɔ kɛ lo ɔ mi. Lɔ ɔ se ɔ, e ngɔ kɛ ha e kaseli ɔmɛ, nɛ a gba ha ni ɔmɛ. E maa pee mo nyakpɛ kaa ni ɔmɛ tsuo ye ní, nɛ a tɔ!

Benɛ a ye ní ɔ ta a, Yesu de e kaseli ɔmɛ ke: “Nyɛ bua bibliwi nɛ piɛ ɔ nya nɛ eko kó dã.” (Yohane 6:12) A bua bibliwi ɔmɛ a nya, nɛ e hyi kusii 12 tɔtɔɔtɔ!