NÍ KASEMI 25
Mɛni He Je Nɛ E He Hia Kaa A Ma Matsɛ Yemi Asahi, Nɛ Mɛni Blɔ Nɔ A Guu Kɛ Maa?
Bolivia
Nigeria, loko a maa ma, kɛ benɛ a ma ta
Tahiti
Kaa bɔ nɛ biɛ Matsɛ Yemi Asa a tsɔɔ ɔ, Baiblo mi munyu titli nɛ a susuɔ he ngɛ lejɛ ɔ kɔɔ Mawu Matsɛ Yemi ɔ, nɛ ji munyu titli nɛ Yesu fiɛɛ ɔ he.
A ji hehi ngɛ ma a mi nɛ a kaseɔ anɔkuale jami he ní ngɛ. Lejɛ ɔmɛ ji hehi nɛ a toɔ Matsɛ Yemi ɔ he sane kpakpa a fiɛɛmi he blɔ nya ngɛ. (Mateo 24:14) E slo Matsɛ Yemi Asa tsuaa Matsɛ Yemi Asa klemi, kɛ bɔ nɛ a ma eko tsuaa eko ha mohu, se a kle bɔ nɛ sa, nɛ a be kɛ̃tsɛ̃ɛ, nɛ asafohi nɛ hiɛ pe kake kpeɔ ngɛ fuu mi. Akɛnɛ fiɛɛli a he ngɛ hiɛe fuu ngɛ asafo ɔmɛ a mi he je ɔ, lingmi nɛ ɔ, wa ma Matsɛ Yemi Asa akpe nyɔngmahi abɔ (ke a bua Matsɛ Yemi Asahi nɛ a ma a tsuo nya nɛ a gba mi ɔ, daa ligbi ɔ, a maa Matsɛ Yemi Asahi maa pee enuɔ) konɛ asafo ɔmɛ nɛ a ná he ko nɛ a kpe ngɛ. Mɛni blɔ nɔ a guu kɛ peeɔ enɛ ɔ?
A kɛ yemi kɛ buami nɛ nyɛmimɛ nɛ a ngɛ je kɛ wɛ ɔ haa a nɛ maa. A kɛ sika a maneɔ asafo ɔ ní tsumi kɔni ɔ, nɛ a kɛ haa asafohi nɛ a ngɛ hlae nɛ a ma Matsɛ Yemi Asahi aloo a dla a Matsɛ Yemi Asahi ɔ.
Nihi nɛ a je he slɔɔtoslɔɔtohi ngɔɔ a he kɛ haa faa nɛ a maa nɛ a wui mɛ hiɔ. A to Matsɛ Yemi Asa Mami Kuuhi ngɛ mahi fuu a nɔ. Nihi nɛ a sɔmɔɔ ngɛ kuu nɛ ɔmɛ a mi kɛ ni kpahi nɛ mɛ hu a kɛ a he ha faa a hiaa blɔ kɛ yaa asafo kpahi kɛ kɔpehi po a mi. A ya yeɔ bua asafohi kɛ maa Matsɛ Yemi Asahi. Ngɛ ma kpahi a nɔ ɔ, a hla Odasefohi nɛ a le tsu mami he ga konɛ a hyɛ Matsɛ Yemi Asahi a mami kɛ a dlami nɔ ngɛ kpokpa ko nɛ a kɛ wo a dɛ ɔ mi. E ngɛ mi kaa nihi nɛ a le nine nya ní tsumihi ngɛ kpokpa a mi ɔ hu jeɔ a tsui mi kɛ yeɔ bua mohu lɛɛ, se ngɛ he tsuaa he ko nɛ a ya maa tsu ɔ ngɛ ɔ, asafo ɔ mi bimɛ ɔmɛ nɛ a ngɛ lejɛ ɔ a ti nihi hiɛhiɛɛ kɛ a he woɔ ní tsumi ɔ mi. Yehowa mumi ɔ, kɛ mɔde nɛ Yehowa we bi jeɔ a tsui mi nɛ a bɔɔ ɔ nɛ ha nɛ ní tsumi nɛ ɔ ngɛ nɔ yae ɔ nɛ.
-
Mɛni he je nɛ a tsɛɔ hehi nɛ wa jaa ngɛ ɔ ke Matsɛ Yemi Asahi ɔ?
-
Mɛni ha a nyɛɔ maa Matsɛ Yemi Asahi ngɛ je kɛ wɛ?
