NÍ KASEMI 3
Rahab He Yehowa Ye
Moo ngɔ lɛ kaa wa ngɛ Yeriko ma a mi. Yeriko ma a ngɛ Kanaan zugba a nɔ, nɛ nihi nɛ a ngɛ lejɛ ɔ be hemi kɛ yemi ngɛ Yehowa mi. Yo ko nɛ a tsɛɛ lɛ Rahab ngɛ Yeriko ma a mi.
Benɛ Rahab ji yoyo ɔ, e nu munyuhi fuu kɛ kɔ bɔnɛ Mose ha nɛ Wo Tsu ɔ mi gba nɛ e je Israelbi ɔmɛ kɛ je Egipt ɔ he. E nu bɔnɛ Yehowa ye bua Israelbi ɔmɛ nɛ a ye a he nyɛli a nɔ kunimi ngɛ tahi nɛ a hwu ɔmɛ a mi ɔ hu he. Se jehanɛ lɛɛ, e nu kaa Israelbi ɔmɛ ba bua a he nya ngɛ Yeriko kasa nya!
Rahab bu nyumuhi enyɔ ɔmɛ a he ejakaa e he Yehowa ye
Gbɔkuɛ ko ɔ, Israelbi ɔmɛ a kpɛti nyumuhi enyɔ ho Yeriko ma a mi ya konɛ a ya hyɛ bɔnɛ ma a ngɛ ha. A ba Rahab we ɔ mi. Rahab kplɛɛ nɔ kaa a ba hi e ngɔ. Nyɔ ɔ mi ɔ, Yeriko matsɛ ɔ nu he kaa nibwɔ komɛ ba ma a mi nɛ a ngɛ Rahab we ɔ mi. Enɛ ɔ he ɔ, matsɛ ɔ tsɔ konɛ a ya nuu nyumuhi enyɔ ɔmɛ. Rahab ngɔ nyumuhi enyɔ ɔmɛ kɛ laa ngɛ e tsu ɔ yi mi, nɛ e de matsɛ ɔ tsɔli ɔmɛ ke: ‘Nibwɔ ɔmɛ ba hiɛ ɔ, se a je ma a mi momo. Ke nyɛ nyɛɛ a se piɔ ɔ, nyɛ ma ya nu mɛ!’ O le nɔ́ heje nɛ Rahab ngɛ nyumuhi enyɔ ɔmɛ a he bue ɔ lo?— Ejakaa e ngɛ hemi kɛ yemi ngɛ Yehowa mi nɛ e le kaa Yehowa maa ngɔ Kanaan zugba a kɛ ha Israelbi ɔmɛ.
Loko nyumuhi enyɔ ɔmɛ maa je Rahab we ɔ mi ɔ, a wo lɛ si kaa ke a ma Yeriko hɛ mi kpatami ɔ, a maa baa e kɛ e weku ɔ a yi. O le nɔ́ nɛ a de lɛ ke e pee lo?— A de lɛ ke: ‘Ngɔɔ kpa tsutsu nɛ ɔ, nɛ o fĩ kɛ kpla o saflɛ ɔ nya. Ke o pee jã a, nɔ tsuaa nɔ ngɛ o we ɔ mi ɔ yi ma ná wami.’ Rahab pee kaa bɔnɛ nyumuhi enyɔ ɔmɛ de kaa e pee ɔ pɛpɛɛpɛ. O le nɔ́ nɛ ba lo?—
Yehowa baa Rahab kɛ e weku ɔ a yi
Be bɔɔ se ɔ, Israelbi ɔmɛ nyɛɛ kɛ bɔle ma a se a kpa we ngmla. A nyɛɛ kɛ bɔle maa ligbi ekpa, si kake daa ligbi. Se ngɛ ligbi nɛ ji kpaago ɔ nɔ ɔ, a nyɛɛ kɛ bɔle ma a si kpaago. Lɔɔ se ɔ, a kpa ngmlaa wawɛɛ. Kɛkɛ nɛ Yehowa ha nɛ gbogbo ɔ nɛ bɔle ma a he ɔ hule kɛ pue si. Se we ɔ nɛ kpa tsutsu ɔ kpla si ngɛ e saflɛ ɔ he ɔ lɛɛ e maa si nɛ e hule we! O na ngɛ foni ɔ mi lo?— A he Rahab kɛ e weku ɔ a yi wami!
Mɛni o ma nyɛ maa kase ngɛ Rahab he?— Rahab he Yehowa ye ejakaa e kase nyakpɛ níhi nɛ Yehowa pee ɔmɛ a he ní. Mo hu o ngɛ nyakpɛ níhi nɛ Yehowa pee ɔmɛ a he ní kasee. O he Yehowa ye kaa bɔnɛ Rahab he lɛ ye ɔ lo?— Wa le kaa o heɔ Yehowa ye jã a nɔuu!
