NÍ KASEMI 13
Mɛni Ji Sane Kpakpa Nɛ Kɔɔ Jami He ɔ?
1. Anɛ jamihi tsuo hi lo?
Nihi nɛ a ngɛ tsui kpakpa ngɛ jamihi tsuo a mi. E ji sane kpakpa kaa Mawu naa nimli nɛ ɔmɛ nɛ e susuɔ a he. Se aywilɛho sane ji kaa, nihi ngɔ jami kɛ ha a hɛ mi nɛ a peeɔ yi wu tso níhi. (2 Korinto Bi 4:3, 4; 11:13-15) Amaniɛ bɔmi tsɔɔ kaa, jami komɛ ngɔ a he kɛ wo awi yemi nɛ a kɛ tua nɔ, wɛtso sisi gumi, ta hwumi, kɛ jokuɛwi nɛ a peeɔ mɛ basabasa a mi. Enɛ ɔ haoɔ nihi nɛ a ngɛ tsui kpakpa nɛ a heɔ Mawu yeɔ ɔ wawɛɛ nitsɛ!—Kane Mateo 24:3-5, 11, 12.
Anɔkuale jami woɔ Mawu hɛ mi nyami, se lakpa jami wui e hɛ mi nyami. Lakpa jami tsɔɔ níhi nɛ be Baiblo ɔ mi, nɛ lakpa munyuhi nɛ kɔɔ Mawu kɛ gbogboehi a he ɔ hu piɛɛ he. Se Yehowa suɔ nɛ nihi nɛ a le anɔkuale nɛ kɔɔ e he ɔ.—Kane Ezekiel 18:4; 1 Timoteo 2:3-5.
2. Mɛni ji sane kpakpa nɛ kɔɔ jami he ɔ?
Bua jɔmi sane ji kaa, jamihi nɛ a deɔ ke a suɔ Mawu, se ngɛ anɔkuale mi ɔ, a suɔ Satan je ɔ be nyɛe maa sisi Mawu. (Yakobo 4:4) Mawu Munyu ɔ tsɛɔ lakpa jamihi tsuo ke ‘Babilon Ngua’ a. Babilon ji blema ma, he nɛ lakpa jami je sisi ngɛ ngɛ Noa Nyu Kpekpemi ɔ se. E be kɛe nɛ Mawu ma kpata jamihi nɛ sisiɔ nihi nɛ a waa nihi a yi mi ɔ a hɛ mi tlukaa.—Kane Kpojemi 17:1, 2, 5, 16, 17; 18:8.
Sane kpakpahi fuu ngɛ. Yehowa hɛ ji nihi nɛ a ngɛ tsui kpakpa nɛ a ngɛ lakpa jamihi a mi ngɛ je ɔ mi tsuo ɔ a nɔ. E ngɛ nimli nɛ ɔmɛ kake pee kɛ gu anɔkuale ɔ nɛ e ngɛ mɛ tsɔɔe ɔ nɔ.—Kane Mika 4:2, 5.
3. Mɛni e sa kaa nihi nɛ a ngɛ tsui kpakpa a nɛ a pee?
Anɔkuale jami ngɛ nihi kake pee
Nihi nɛ a suɔ nɔ́ nɛ ji anɔkuale kɛ nɔ́ kpakpa a, Yehowa susuɔ a he. E ngɛ mɛ dee nɛ a je lakpa jami mi. Nihi nɛ a suɔ Mawu ɔ suɔ kaa a maa pee tsakemihi konɛ a sa e hɛ mi.—Kane Kpojemi 18:4.
Ngɛ kekle jeha lafa a mi ɔ, benɛ nihi nɛ a ngɛ tsui kpakpa a nu sane kpakpa a nɛ kaseli ɔmɛ fiɛɛ ɔ, a kɛ bua jɔmi bu tue. A kase si himi blɔ ehe kɛ je Yehowa ngɔ, nɛ e ha a ná bua jɔmi pe sa a, nɛ a ná yi mi tomi kɛ hɛ nɔ kami hulɔ. A pee nɔ hyɛmi nɔ́ kpakpa kɛ ha wɔ nɛ́ wa ngɛ mwɔnɛ ɔ ejakaa a bu sane kpakpa a tue nɛ a kɛ Yehowa sɔmɔmi pee oti ngɛ a si himi mi. —Kane 1 Tesalonika Bi 1:8, 9; 2:13.
Yehowa heɔ nihi tsuo nɛ a jeɔ lakpa jami mi ɔ atuu kɛ baa e we bi nɛ a jaa lɛ ɔ a kpɛti. Ke o kplɛɛ Yehowa nine fɔmi ɔ nɔ ɔ, o maa pee e huɛ, nɛ o ma ná weku ehe nɛ́ e mi bi jaa Yehowa nɛ́ suɔmi ngɛ a kpɛti, kɛ neneene wami.—Kane Marko 10:29, 30; 2 Korinto Bi 6:17, 18.
4. Mɛni blɔ nɔ Mawu maa gu konɛ e ha bua jɔmi nɛ ba je ɔ mi tsuo?
Kojomi nɛ maa ba lakpa jami nɔ ɔ ji sane kpakpa. E ma ha nihi tsuo ngɛ je ɔ mi ɔ maa ye a he kɛ je yi mi wami sisi. Lakpa jami be adesahi sisie nɛ e be a mi gbae hu. Adesahi tsuo maa pee kake kɛ ja anɔkuale Mawu kake ɔ.—Kane Kpojemi 18:20, 21; 21:3, 4.
