Niheyo ko hi Listra asafo ɔ mi nɛ a tsɛɛ lɛ ke Timoteo. Hela no ji e papaa, nɛ Yuda no ji e mami. A tsɛɛ Timoteo mami ke Yunis, nɛ a tsɛɛ e maa ke Lɔis. E mami kɛ e maa tsɔɔ lɛ Yehowa he ní kɛ je e jokuɛ mi.

Benɛ Paulo hia blɔ enyɔne kɛ ya fiɛɛ sane kpakpa a, e ya Listra. Benɛ e ya lejɛ ɔ, e na kaa Timoteo suɔ nyɛmimɛ ɔmɛ wawɛɛ, nɛ e suɔ kaa e maa ye bua mɛ. Paulo ha nɛ Timoteo piɛɛ e he ngɛ e blɔ hiami ɔ mi. Bɔɔbɔɔbɔɔ ɔ, Paulo ye bua Timoteo nɛ e ba pee sane kpakpa fiɛɛlɔ nɛ́ e le ní tsɔɔmi.

He fɛɛ he nɛ Paulo kɛ Timoteo ya a, mumi klɔuklɔu ɔ tsɔɔ mɛ blɔ. Ligbi ko nyɔ mi ɔ, Paulo na nina ko. Nyumu ko de lɛ ngɛ nina a mi ke e ba Makedonia nɛ e ba ye bua mɛ. Enɛ ɔ he ɔ, Paulo, Timoteo, Silas, kɛ Luka ya fiɛɛ ngɛ lejɛ ɔ, nɛ a to asafohi fuu sisi.

Ma ko ngɛ Makedonia nɛ a tsɛɛ ke Tɛsalonika. Nyumuhi kɛ yihi fuu ba plɛ Kristofohi ngɛ lejɛ ɔ. Se Yuda bi komɛ a bua jɔɛ ní tsumi nɛ Paulo kɛ e huɛmɛ ɔmɛ ngɛ tsue ɔ he. A ha nɛ ni komɛ ya nuu nyɛmimɛ ɔmɛ kɛ ho nɔ yeli ɔmɛ a ngɔ ya. Ni ɔmɛ kɛ abofu de ke: ‘Nyumu nɛ ɔmɛ sume Roma nɔ yemi ɔ!’ Paulo kɛ Timoteo na kaa ni ɔmɛ ma nyɛ maa gbe mɛ, enɛ ɔ he ɔ, benɛ je jɔ ɔ, a tu fo kɛ ya Beroya.

Hela bi kɛ Yuda bi, kɛ ni kpahi nɛ a ngɛ Beroya a bu sane kpakpa a tue, nɛ a ba pee kaseli. Se benɛ Yuda bi komɛ je Tɛsalonika kɛ ba a ma a mi ɔ, a ha nɛ ma a mi pee gidigidi. Enɛ ɔ he ɔ, Paulo je kɛ ho Atene ya. Timoteo kɛ Silas tlɔ Beroya nɛ a wo nyɛmimɛ ɔmɛ he wami. Pee se ɔ, Paulo tsɔ Timoteo kaa e ya Tɛsalonika nɛ e ya ye bua nyɛmimɛ ɔmɛ, ejakaa a ngɛ mɛ  yi mi wae wawɛɛ. Lɔ ɔ se ɔ, e kpale tsɔ lɛ kɛ ya asafo kpahi fuu a mi, konɛ e ya wo mɛ he wami.

Paulo de Timoteo ke: ‘A maa wa nihi nɛ a suɔ kaa a ma sɔmɔ Yehowa a yi mi.’ A wa Timoteo yi mi, nɛ a wo lɛ tsu ngɛ e hemi kɛ yemi ɔ he je. Se ngɛ enɛ ɔ tsuo se ɔ, e bua jɔ kaa e ye Yehowa anɔkuale.

Paulo de nyɛmimɛ nɛ a ngɛ Filipi ɔ ke: ‘Ma tsɔ Timoteo kɛ ba nyɛ ngɔ. E maa tsɔɔ nyɛ bɔ nɛ nyɛ maa nyɛɛ ngɛ anɔkuale ɔ nya ha. E ma tsɔse nyɛ ngɛ fiɛɛmi ní tsumi ɔ mi.’ Paulo le kaa e ma nyɛ maa ngɔ e hɛ kɛ fɔ Timoteo nɔ. A hi si kaa huɛmɛ, nɛ a pee kake kɛ sɔmɔ jehahi fuu.