LOT kɛ e weku ɔ kɛ Abraham hi he kake ngɛ Kanaan zugba a nɔ. Ligbi ko ɔ, Abraham de Lot ke: ‘Hiɛ ɔ zugba a klee we bɔnɛ maa kpe wa lohwe ɔmɛ tsuo. I kpa mo pɛɛ, ha nɛ wa mi nɛ gbɛ. Ke o ngɔ hiɔ nɔ ɔ, ma ngɔ muɔ nɔ, nɛ ke o ngɔ muɔ nɔ ɔ, ma ngɔ hiɔ nɔ.’

Lot po e hɛ nɛ e hyɛ zugba a tsuo kɛ kpe. E na zugba a he ko nɛ ngɛ fɛu, nɛ́ nyu kɛ nga fuu ngɛ lejɛ ɔ kɛ ha e lohwe ɔmɛ. Lejɛ ɔ ji Yordan Kpokpa a nɛ. Lɔɔ heje ɔ, Lot kɛ e weku ɔ, kɛ e lohwe ɔmɛ tsuo hia kɛ ho lejɛ ɔ ya. Pee se ɔ, a ya hi Sodom ma a mi.

Sodom mabi ɔmɛ ji nimli yayamihi. Enɛ ɔ hao Lot, ejakaa lɛɛ e ji nɔmlɔ kpakpa. Nɛ e hao Mawu hulɔ. Nyagbe ɔ, Mawu tsɔ bɔfohi enyɔ konɛ a ya bɔ Lot kɔkɔ kaa e ma kpata Sodom kɛ ma nɛ́ e ngɛ kasa nya nɛ ji Gomora hɛ mi ngɛ a ní yayami ɔmɛ a heje.

Bɔfo ɔmɛ de Lot ke: ‘Ngɔɔ o yo ɔ kɛ o biyiwi ɔmɛ nɛ́ nyɛɛ je hiɛ ɔ esɔesɔ!’ Lot kɛ e weku ɔ he sɔɛ, heje ɔ bɔfo ɔmɛ nu a kɔni si nɛ a je mɛ kpo kɛ je ma a mi. Kɛkɛ nɛ bɔfo ɔ kake de mɛ ke: ‘Nyɛɛ tu fo kɛ he nyɛ yi wami! Nyɛ ko hyɛ nyɛ se. Nyɛɛ tu fo kɛ ya yoku ɔmɛ a nɔ konɛ nyɛ ko gbo.’

Lot kɛ e biyiwi ɔmɛ bu tue nɛ a tu fo kɛ je Sodom. A dɛ si be kpiti ko po, nɛ a hyɛ we a se hulɔ. Se Lot yo ɔ gbo tue. Benɛ a je Sodom ma a he saii ɔ, e da si nɛ e plɛ kɛ hyɛ e se. Kɛkɛ nɛ Lot yo ɔ plɛ pee ngo kpɔ. Anɛ o na lɛ ngɛ foni ɔ mi lo?

Wa ma nyɛ maa kase ní kɛ je sane nɛ ɔ mi. E tsɔɔ kaa Mawu heɔ nihi nɛ buɔ lɛ tue ɔ yi wami, se nihi nɛ bui lɛ tue ɔ lɛɛ, a hɛ mi kpataa.