NIHI nɛ be lɛ ɔ mi ngɛ níhi nɛ a peeɔ daa a pee ja nɔuu. A he we yi kpamisa kaa Nyu Afua ko maa ba. Eko ɔ, a muɔ wawɛɛ pe kekle ɔ po. Se e kɛ we nɛ a muɔmi ɔ se po.

Tlukaa a, hiɔmi bɔni nɛmi. Nyu ɔ je hiɔwe kɛ ngɛ si puee kaa bɔnɛ a plɛɔ nyu ngɛ goga mi kɛ pueɔ si ɔ. Nɔ́ nɛ Noa de ɔ ba mi! Se amlɔ nɛ ɔ, blɔ be nɛ nɔ kpa ko ma nyɛ ma ya sɛ lɛ ɔ mi. Yehowa nga sinya a kpɛii.

E kɛ we nɛ nyu ɔ ha zugba a hɛ mi tsuo. Nɛ e pee kaa pa nguaa ko. Nyu ɔ hia tsohi nɛ e muɔɔ tɛ nguahi kɛ pɛmi hoo. Ni ɔmɛ ye gbeye. A kuɔ kɛ ya yokuhi a nɔ. Ao, a ná jinɛ a bu Noa tue nɛ́ a ya sɛ lɛ ɔ mi benɛ a nga we sinya a lolo ɔ! Se amlɔ nɛ ɔ lɛɛ, be be.

Nyu ɔ nɛ kɛ pue si nyɔ kɛ pia ligbihi 40. Nyu ɔ ya hiɔwe hluu kɛ ya si benɛ e ha yoku nɛ ka pe kulaa a nɔ. Nɛ nimli kɛ lohwehi tsuo nɛ be lɛ ɔ mi ɔ gbo kaa bɔnɛ Mawu de ɔ. Se nihi nɛ ngɛ lɛ ɔ mi ɔ lɛɛ a ngɛ slɔkee.

Noa kɛ e bimɛ ɔmɛ bɔ mɔde nɛ a kpɛ lɛ ɔ saminya. Nyu ɔ wo lɛ ɔ nɔ nɛ lɛ ɔ sile ngɛ nyu ɔ hɛ. Ligbi ko ɔ, hiɔmi ɔ kpa nɛmi kɛkɛ nɛ pu bɔni tsomi. Mɛni nɛ ngɛ gbeye kikɛ! Pa nguaa kake kaa wo ha he tsuaa he. Nɛ nɔ́ pɛ nɛ nɔ ko ma nyɛ maa na ji lɛ ɔ ngɛ nyu ɔ hɛ.

Amlɔ nɛ ɔ oblai ɔmɛ gbo. A be nɛ a maa ye nihi awi hu. Mɛ tsuo, kɛ a nyɛmɛ kɛ nimli yayamihi kpa amɛ kulaa gbo. Se mɛni ba a tsɛmɛ ɔmɛ a nɔ?

Oblai ɔmɛ a tsɛmɛ ɔmɛ pi nimli adesahi nitsɛ kaa wɔ. A ji bɔfohi nɛ ba zugba a nɔ ba hi si kaa adesahi. Lɔɔ he benɛ nyu afua a ba a, mɛɛ a gbo we. A tsake a he kɛ pee bɔfohi ekohu nɛ a kpale kɛ ho hiɔwe ya. Se Mawu ngmɛ́ mɛ blɔ kaa a piɛɛ e bɔfo ɔmɛ a he ekohu. Enɛ ɔ ha a ba plɛ pee Satan bɔfohi. A tsɛɛ mɛ ngɛ Baiblo ɔ mi ke daimoniohi.

Jehanɛ Mawu ha kɔɔhiɔ fia, nɛ nyu ɔ bɔni fãmi. Nyɔhiɔ enuɔ se ɔ, lɛ ɔ ya sa si ngɛ yoku ko yi mi. Ligbihi babauu ba be, nɛ jehanɛ nihi nɛ ngɛ lɛ ɔ mi ɔ nyɛ na yoku ɔmɛ a nɔ. Nyu ɔ mii bɔɔbɔɔ hluu.

Jehanɛ Noa ha lohwe pɛlitsɛ yumu ko nɛ a tsɛɛ lɛ kuakualabite je kpo ngɛ lɛ ɔ mi. E ya po si saii nɛ e kpale kɛ ba, ejakaa e nɛ he ko nɛ e ma si ngɛ. E pee ja si abɔ, nɛ ke e kpale kɛ ba a, kɛkɛ e ba ma lɛ ɔ nɔ.

Noa suɔ nɛ e le keji kaa nyu ɔ ta zugba a nɔ aloo e tɛ, heje ɔ, e kpale ngmɛɛ okpo ko he. Lɛ hu e kpale kɛ ba ejakaa e nɛ he ko nɛ e maa ma. Noa je lɛ kpo ekohu, nɛ benɛ e kpale kɛ ba a, e hɛɛ oliv tso ba ngɛ e nya he. Enɛ ɔ ha Noa na kaa nyu ɔ mii ta. Noa tsɔ okpo ɔ ekohu si etɛne, nɛ jehanɛ lɛɛ e ya na zugba gbigbli nɛ e tlɔ nɔ.

Jehanɛ Mawu kɛ Noa tu munyu. E de lɛ ke: ‘Jee kpo ngɛ lɛ ɔ mi. Ngɔɔ o weku ɔ kɛ lohwe ɔmɛ tsuo kɛ je kpo.’ A ye pe jeha kake ngɛ lɛ ɔ mi. Lɔɔ he ɔ, mo susu he nɛ o hyɛ bɔnɛ a ma ná bua jɔmi ha benɛ a je kpo ngɛ lɛ ɔ mi hɛ ngmengmle ɔ!