1, 2. Kɛ Mawu sɔmɔli nuɔ he ngɛ níhi nɛ ngɛ nɔ yae ngɛ je nɛ ɔ mi ɔ he ha kɛɛ, nɛ jije ji a we loo a hihe?

 ANƐ o nuɔ he kaa o ngɛ slɔkee nɛ o he jɔ mo ngɛ je yaya nɛ ɔ mi kaa nɔ ko nɛ e ngɛ e we mi lo? Ke o be slɔkee nɛ o he jɔɛ mo ɔ, lɛɛ pi mo pɛ nɛ o nuɔ he jã. Yehowa sɔmɔli kpahi hu nuɔ he jã! Kɛ je blema tɔɔ nɛ Yehowa sɔmɔli nuɔ he kaa a ngɛ kaa nibwɔhi aloo blɔ hiali ngɛ je nɛ ɔ mi. Kaa nɔ hyɛmi nɔ́ ɔ, Mawu sɔmɔli anɔkualetsɛmɛ nɛ a hia blɔ kɛ je hehi kɛ ya hehi ngɛ Kanaan zugba a nɔ ɔ, “ye odase ngɛ ma hɛ mi kaa nibwɔhi, kɛ ma se bi kɛkɛ ji mɛ.”—Heb. 11:13.

² Kristo se nyɛɛli nɛ a pɔ mɛ nu, nɛ a ‘ma ngɛ hiɔwe’ ɔ hu naa a he kaa a ji “nibwɔhi, kɛ blɔ hiali ngɛ je nɛ ɔ mi.” (Filip. 3:20; 1 Pet. 2:11) Kristo “to kpa” amɛ hu a ‘pi je ɔ mi bimɛ kaa bɔnɛ Yesu hu ji je ɔ mi ɔ.’ (Yoh. 10:16; 17:16) Se, Mawu webi ngɛ “we” ko. We nɛ ɔ pi we ko nɛ wa ma nyɛ maa na kɛ wa hɛngmɛ, mohu ɔ, e ji he ko nɛ ke wa ngɛ ɔ, wa ma nyɛ maa hi si slɔkee, nɛ wa he maa jɔ wɔ pe kulaa. Mose ngma ke: ‘Nyɔmtsɛ [Yehowa], mo ji wa wesa he ngɛ yi nɔhi tsuo.’ * (La 90:1) Mɛni blɔ nɔ Yehowa gu kɛ pee e he “wesa he” ha e sɔmɔli anɔkualetsɛmɛ nɛ a hi si blema a? Mɛni blɔ nɔ e guu kɛ peeɔ “wesa he” kɛ haa e sɔmɔli nɛ a ngɛ mwɔnɛ ɔ? Nɛ kɛ e ma plɛ kɛ pee wesa he ha e webi hwɔɔ se kɛɛ?

3. Mɛni he a ngɔ Yehowa kɛ to ngɛ La 90:1 ɔ, nɛ mɛni heje?

³ Be komɛ ngɛ nɛ Baiblo ɔ ngɔɔ Yehowa kɛ toɔ níhi nɛ wa ma nyɛ maa na kɛ wa hɛngmɛ ɔ a he,  konɛ waa nu bɔnɛ e ngɛ ha a sisi saminya. Kaa nɔ hyɛmi nɔ́ ɔ, La 90:1 ɔ ngɔ Yehowa kɛ to “wesa he,” aloo we he. We mi ji he ko nɛ suɔmi, tue mi jɔmi kɛ he piɛ pomi ngɛ. Mɛni heje nɛ Baiblo ɔ ngɔ Yehowa kɛ to we he ɔ? Baiblo ɔ de ke Yehowa a, suɔmi ji lɛ. (1 Yoh. 4:8) E ji tue mi jɔmi Mawu nɛ e haa nɛ e sɔmɔli nɛ yeɔ lɛ anɔkuale ɔ, ‘a he mi jɔɔ mɛ.’ (La 4:8) Kaa nɔ hyɛmi nɔ́ ɔ, mo susu bɔnɛ e kɛ e sɔmɔli anɔkualetsɛmɛ nɛ a hi si blema a hi si ha a he nɛ o hyɛ. Wa maa je sisi kɛ je Abraham nɔ.

4, 5. Mɛni blɔ nɔ nɛ Mawu pee “wesa he” kɛ ha Abraham ngɛ?

⁴ Eko ɔ, Abraham be munyu nɛ nyɛɛ se nɛ ɔ nɛ Yehowa tu ɔ sisi nue: “Jee o zugba a nɔ, kɛ o ma a mi, kɛ o weku li a ngɔ kɛ ya zugba nɛ ma tsɔɔ mo ɔ nɔ.” Se eko ɔ, munyu nɛ Yehowa tu kɛ nyɛɛ se ɔ wo Abraham bua. Yehowa de ke: “Ma ha mo nina babauu, nɛ a maa pee je ma agbo. Ma gbaa mo, nɛ ma ha o ma he biɛ, nɛ a maa gu o nɔ kɛ gbaa nihi babauu.” Yehowa de hu ke: “Nihi nɛ gbaa mo ɔ, ma gbaa mɛ. Se ni nɛmɛ nɛ gbiɛɛ mo ɔ, imi hu ma gbiɛ mɛ.”—1 Mose 12:1-3.

⁵ Yehowa wo si kaa e maa bu Abraham kɛ e nina a he, nɛ e ye e si womi ɔ nɔ pɛpɛɛpɛ. (1 Mose 26:1-6) Kaa nɔ hyɛmi nɔ́ ɔ, e tsi Farao nɛ je Egipt ɔ kɛ Matsɛ Abimelek nɛ je Gerar a nya konɛ a ko kpɔ Abraham yo Sara ngɛ e dɛ. E bu Isak kɛ Rebeka hu a he jã nɔuu. (1 Mose 12:14-20; 20:1-14; 26:6-11) Wa kaneɔ ke: ‘Yehowa ngmɛ́ blɔ nɛ nɔ ko nɛ hao mɛ; a he ɔ, e je blɔ de matsɛmɛ ɔmɛ ke, “Ye nihi nɛ i pɔ mɛ nu ji nɛ ɔmɛ nɛ; nyɛ ko ye mɛ awi! Ye gbali ji nɛ ɔmɛ nɛ, nyɛ ko ta a he.”’—La 105:14, 15.

6. Mɛni Isak de Yakob ke e pee, nɛ eko ɔ, kɛ Yakob nu he ha kɛɛ?

⁶ Yehowa hyɛ Abraham bibi Yakob hu nɔ. Benɛ e su be nɛ Yakob maa ngɔ yo ɔ, e papaa Isak de lɛ ke: “Koo ngɔ Kanaan yo. Yaa Mesopotamia, esɔ. Yaa o nɛ̃ Betuel we ɔ mi, nɛ o ya ngɔ o tsɛko Laban biyi ɔmɛ a ti nɔ kake.” (1 Mose 28:1, 2) Yakob bu Isak tue. Eko ɔ, Yakob lɛ nɔ kake too pɛ nɛ e je e weku li a he ngɛ Kanaan nɛ e hia blɔ si tomi lafahi abɔ kɛ ho Haran ya. (1 Mose 28:10) Eko ɔ, e bi e he ke: ‘Be enyɛmɛ ma ya ye ngɛ lejɛ ɔ? Anɛ ye mami nyɛminyumu ɔ bua maa jɔ ye he lo? E ma ha mi yo nɛ yeɔ Mawu gbeye lo?’ Se nɔ́ ko ya nɔ ngɛ Luz nɛ e kɛ Beersheba kɛmi maa pee si tomi 60, nɛ enɛ ɔ ha nɛ Yakob jɔɔ tsui yemi. Mɛni ba ngɛ Luz?

7. Mɛni Mawu de kɛ wo Yakob bua ngɛ nlami mi?

⁷ Yehowa je e he kpo tsɔɔ Yakob ngɛ nlami mi ngɛ Luz, nɛ e de lɛ ke: ‘I kɛ mo  maa hi si. He tsuaa he nɛ o yaa a, ma bu o he, nɛ ma kpale mo kɛ ba zugba nɛ ɔ nɔ ekohu. I be o he jee; ma pee níhi nɛ i wo mo a he si ɔ ha mo kokooko.’ (1 Mose 28:15) Munyu nɛ ɔ nɛ Yehowa je mi mi jɔmi mi nɛ e tu ɔ maa wo Yakob bua wawɛɛ nitsɛ! E ngɛ heii kaa enɛ ɔ se ɔ, Yakob maa suɔ nɛ e na bɔnɛ Yehowa si womi ɔ maa ba mi ha? Ke o je o ma mi ya ngɛ sɔmɔe ngɛ ma se ma ko nɔ ɔ, eko ɔ, mo hu o maa nu he kaa bɔnɛ Yakob nu he ɔ. Se atsinyɛ jemi ko be he kaa o naa kaa Yehowa ngɛ o nɔ hyɛe ngɛ blɔhi fuu a nɔ.

8, 9. Mɛni blɔhi a nɔ Yehowa pee e he “wesa he” kɛ ha Yakob ngɛ, nɛ mɛni wa ma nyɛ maa kase kɛ je mi?

⁸ Benɛ Yakob su Haran ɔ, e mami nyɛminyumu Laban nya e he kɛ bua jɔmi, nɛ pee se ɔ, e ngɔ Lea kɛ Rahel kɛ ha lɛ kaa e yihi. Se pee se ɔ, Laban bɔ mɔde kaa e maa sisi Yakob. E tsake Yakob hiɔwo ɔ si nyɔngma! (1 Mose 31:41, 42) Se kɛ̃ ɔ, Yakob to e tsui si, nɛ e ngɛ nɔ mi mami kaa Yehowa maa ya nɔ maa hyɛ lɛ, nɛ Yehowa hyɛ lɛ niinɛ hulɔ! Ngɛ anɔkuale mi ɔ, benɛ Mawu de Yakob kaa e kpale e se kɛ ho Kanaan ya a, Yakob “ná tohi, nyɔguɛhi, afukpɔngɔhi, kɛ tejihi babauu.” (1 Mose 30:43) Akɛnɛ Yakob bua jɔ nɔ́ nɛ Yehowa pee ha lɛ ɔ he wawɛɛ heje ɔ, e sɔle ke: “Mɔbɔ nami nɛ se pui gblegbleegble nɛ o je kpo ngɔ ha mi ɔ, i sɛ. Benɛ ma po Yordan pa a, dɛma tso pɛ i hɛɛ ngɛ ye dɛ mi; se piɔ lɛɛ i kpale ba kɛ asafo kuu enyɔ nɛ ɔmɛ.”—1 Mose 32:10.

⁹ Niinɛ, nɔ́ nɛ nyɛɛ se nɛ ɔ nɛ Mose de ngɛ sɔlemi mi ɔ ji anɔkuale: “Nyɔmtsɛ [Yehowa], mo ji wa wesa he ngɛ yi nɔhi tsuo.” (La 90:1) Wa ma nyɛ ma de jã nɔuu ngɛ Yehowa he mwɔnɛ ɔ, ejakaa “e tsakee we gblegbleegble.” Loloolo ɔ, e ji wesa he kɛ ha e webi nɛ a yeɔ lɛ anɔkuale ɔ. (Yak. 1:17) Nyɛ ha wa susu bɔnɛ e plɛɔ kɛ peeɔ enɛ ɔ ha a he nɛ waa hyɛ.

10. Mɛni heje nɛ wa ma nyɛ ma ná nɔ mi mami kaa Yehowa maa ya nɔ maa pee wa “wesa he” ɔ?

¹⁰ Mo susu si fɔfɔɛ nɛ ɔ he nɛ o hyɛ: Ngɔɔ lɛ kaa a tsɛ mo kɛ ya kojomi he ko kaa o ya ye odase kɛ si nɔ ko nɛ e le ní nɛ e ngɛ he wami. Nɔ ɔ ji lakpatsɛ kpanaku, kɛ nɔ gbelɔ, nɛ e ngɛ nihi fuu ngɛ je ɔ mi he tsuaa he nɛ a tsuɔ ní ha lɛ. Ke a gbe kojomi ɔ nya nɛ o je kpo kɛ je kojomi he ɔ, kɛ o maa nu he ha kɛɛ? Anɛ o maa nu he kaa o ngɛ slɔkee lo? Dɛbi, o be he nue jã! Ngɛ anɔkuale mi ɔ, o maa suɔ nɛ o bi konɛ a ha mo nihi nɛ a bu o he. Jã kɛ̃ nɛ wɔ Yehowa webi hu wa ngɛ odase yee kɛ ngɛ Yehowa he nyɛlɔ kpanaku nɛ ji Satan ɔ sie! (Kane Kpojemi 12:17.) Se anɛ Satan nyɛ nɛ e tsi Mawu webi a nya lo? Dɛbi! Ngɛ anɔkuale mi ɔ, wa yaa nɔ nɛ wa fiɛɛɔ kɛ haa nihi fuu ngɛ je kɛ wɛ. Mɛni heje nɛ wa nyɛ nɛ wa ngɛ jã pee? Heto ɔ ji, Yehowa ji wa “wesa he.” Yehowa ngɛ e webi a he bue wawɛɛ nitsɛ ngɛ nyagbe ligbi nɛ ɔmɛ a mi. (Kane Yesaya 54:14, 17.) Ke wa ha we nɛ Satan nɛ sisi wɔ ɔ, Yehowa maa ya nɔ maa pee wa wesa he.

11. Mɛni ji nɔ́ kpa ko hu nɛ wa ma nyɛ maa kase ngɛ Abraham, Isak, kɛ Yakob a he?

¹¹ Nyɛ ha nɛ waa kase nɔ́ kpa ko hu ngɛ Abraham, Isak, kɛ Yakob a he. E ngɛ mi kaa a hi Kanaan zugba a nɔ mohu lɛɛ, se a kɛ a he wui níhi nɛ nihi nɛ a ngɛ ma a mi ɔ peeɔ ɔ a mi. A yu a he ngɛ ma mi bimɛ ɔmɛ a ní peepee yaya amɛ a he. (1 Mose 27:46) E he hia we nɛ a wo mɛ mlaahi fuu loko a maa le níhi nɛ hi kɛ níhi nɛ hí. A le níhi nɛ Yehowa suɔ kɛ níhi nɛ Yehowa sume. Akɛnɛ Yehowa ji a wesa he heje ɔ, a sume  nɛ a kɛ a he nɛ wo je ɔ mi. Mohu ɔ, a je a he banee ngɛ je ɔ he. Wa ma nyɛ maa kase a nɔ hyɛmi nɔ́ kpakpa nɛ ɔ! Anɛ o bɔɔ mɔde kaa o maa kase anɔkualetsɛmɛ nɛ a hi si blema a, nɛ o kɛ nimli kpakpahi nɛ bɔ, konɛ o kɛ ní kpakpahi nɛ je o hɛja lo? Dɔmi sane ji kaa ngɛ blɔ ko nɔ ɔ, Kristofoli asafo ɔ mi nyɛmimɛ ɔmɛ ekomɛ a bua jɔ níhi nɛ yaa nɔ ngɛ Satan je ɔ mi ɔ he. Ke mo hu e peeɔ mo jã bɔɔ po ɔ, moo sɔle ngɛ he. Mo kai kaa Satan ji je nɛ ɔ tsɛ. Satan foɔ lɛ pɛ e nɔ́ mi, nɛ e susuu we nihi a he. Enɛ ɔ ji su nɛ pɔhe ngɛ je ɔ mi.—2 Kor. 4:4; Efe. 2:1, 2.

12. (a) Mɛni níhi Yehowa ha e webi konɛ e kɛ ye bua mɛ? (b) Kɛ o buɔ ní nɛ ɔmɛ ha kɛɛ?

¹² Ja waa kɛ Mawu jami mi níhi nɛ Yehowa kɛ haa e webi konɛ a hemi kɛ yemi mi nɛ wa a tsuɔ ní loko wa ma nyɛ maa te si kɛ wo Satan ga tsɔmi ɔmɛ. Ní nɛ ɔmɛ ekomɛ ji Kristofoli a kpehi, weku Mawu jami, kɛ asafo mi nikɔtɔmahi nɛ a woɔ wa bua nɛ a yeɔ bua wɔ konɛ wa nyɛ nɛ waa da haomihi nɛ waa kɛ kpeɔ ɔ a nya. (Efe. 4:8-12) Nyɛminyumu George Gangas, nɛ e kɛ jehahi babauu sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ de ke: “Ke i ngɛ Mawu webi a kpɛti ɔ, ye tsui nɔɔ ye mi.” Anɛ mo hu o nuɔ he jã lo?

13. Mɛni wa ma nyɛ maa kase kɛ je Hebribi 11:13 ɔ mi?

¹³ Wa ma nyɛ maa kase nɔ́ kpa ko hu ngɛ Abraham, Isak, kɛ Yakob a he. A je ekpa ngɛ nihi nɛ a kɛ mɛ hi si ɔ a he. Kaa bɔnɛ wa na ngɛ  kuku 1 ɔ mi ɔ, ‘a ye odase ngɛ ma hɛ mi kaa nibwɔhi, kɛ ma se bi kɛkɛ ji mɛ.’ (Heb. 11:13) Anɛ mo hu o mwɔ o yi mi kpɔ kaa o maa je ekpa ngɛ nihi nɛ a ngɛ je ɔ mi ɔ a he lo? Ngɛ anɔkuale mi ɔ, pi be tsuaa be nɛ jã peemi ngɛ gbɔjɔɔ. Se ke Mawu ye bua mo, nɛ nyɛmimɛ Odasefoli hu ye bua mo ɔ, o ma nyɛ maa pee jã. Mo kai kaa pi mo pɛ nɛ o ngɛ jã pee. Nihi tsuo nɛ a suɔ kaa a sɔmɔ Yehowa a ngɛ ta hwue kɛ ngɛ Satan kɛ e je ɔ sie! (Efe. 6:12) Se ke waa kɛ wa hɛ fɔ Yehowa nɔ nɛ wa sa we ngɛ e ngɔ ɔ, wa ma nyɛ maa ye kunimi.

14. Abraham mlɛ mɛni “ma”?

¹⁴ Nɔ́ kpa ko hu nɛ he hia ji, nɛ́ wa maa kase Abraham, nɛ waa kɛ wa hɛ maa fɔ jɔɔmi nɛ wa ma ná hwɔɔ se ɔ nɔ. (2 Kor. 4:18) Bɔfo Paulo ngma ke, Abraham ‘ngɛ ma nɛ Mawu nitsɛ to sisi nɛ lɛ nɔuu e fia a blɔ hyɛe.’ (Heb. 11:10) Jamɛ a “ma” a ji Mawu Matsɛ Yemi ɔ nɛ. E he ba hia nɛ Abraham nɛ mlɛ “ma” nɛ ɔ. Ngɛ blɔ ko nɔ ɔ, wɔɔ lɛɛ wa mlɛ we ma nɛ ɔ. Amlɔ nɛ ɔ, Matsɛ Yemi ɔ ngɛ nɔ yee ngɛ hiɔwe. Nɛ odase yemihi tsɔɔ kaa e be kɛe nɛ Matsɛ Yemi ɔ maa ye  zugba a tsuo nɔ. Anɛ bɔnɛ o peeɔ o ní ha a tsɔɔ kaa o he ye kaa Matsɛ Yemi ɔ ngɛ nɔ yee ngɛ hiɔwe lo? Anɛ o kɛ Matsɛ Yemi ɔ pee nɔ́ titli ngɛ o si himi mi nɛ o yu o he ngɛ je ɔ he lo?—Kane 2 Petro 3:11, 12.

15. Mɛni maa ba nihi nɛ a kɛ a hɛ fɔ je nɛ ɔ nɔ ɔ, a nɔ hwɔɔ se?

¹⁵ Haomihi nɛ ngɛ nɔ yae ngɛ je ɔ mi ɔ mi maa ya nɔ maa wa loko nyagbe ɔ maa ba. (Mat. 24:7, 8) Ngɛ amanehlu ngua a mi ɔ, níhi a mi maa wa wawɛɛ nitsɛ. Níhi a hɛ mi ma kpata, nɛ nihi a tsui maa po wawɛɛ. (Hab. 3:16, 17) Gbeye sɔuu nɛ nihi maa ye heje ɔ, a ma ya sa we ngɛ “tɛ puɔhi a mi, kɛ tɛ sahi a sisi ngɛ yo ɔmɛ a nɔ.” (Kpoj. 6:15-17) Se yoku nitsɛ ko aloo ma kudɔmi kɛ jua yemi blɔ nya tomihi nɛ a he wa kaa yoku ko be nyɛe maa bu a he.

16. Kɛ e sa kaa waa na Kristofoli asafo ɔ ha kɛɛ, nɛ mɛni heje?

¹⁶ Se Yehowa webi maa ya nɔ maa hi si slɔkee ngɛ a “wesa he” nɛ ji Yehowa Mawu ɔ e ngɔ. ‘A bua maa jɔ, nɛ a ma nya’ kaa bɔnɛ Habakuk pee ɔ, ‘ejakaa Yehowa Mawu ji nɔ nɛ heɔ a yi wami.’ (Hab. 3:18) Ngɛ mɛni blɔhi a nɔ nɛ Yehowa maa pee a “wesa he” ngɛ jamɛ a haomi be ɔ mi? E sa nɛ waa mlɛ nɛ waa hyɛ. Se wa ma nyɛ ma ná nɔ mi mami kaa “nimli asafo ɔ” maa ya nɔ maa pee kake kɛ ngɔ blɔ tsɔɔmi ngɛ Yehowa ngɔ kaa bɔnɛ Israelbi ɔmɛ pee benɛ a kpɔ mɛ kɛ je Egipt ɔ. (Kpoj. 7:9; kane 2 Mose 13:18.) Mɛni blɔ nɔ Yehowa maa gu kɛ ngɔ blɔ tsɔɔmi nɛ ɔ kɛ ha? Eko ɔ, Yehowa maa gu asafo ɔ nɔ kɛ tsɔɔ wɔ nɔ́ nɛ e sa kaa waa pee. Ngɛ anɔkuale mi ɔ, Yesaya 26:20 (kane) ɔ tsɔɔ kaa a maa bu Mawu webi a he ngɛ “we ɔmɛ” aloo se tsuhi a mi. Eko ɔ, we ɔmɛ aloo se tsu ɔmɛ daa si ha asafohi nɛ a ngɛ je kɛ wɛ ɔ. Anɛ o bua jɔ asafo mi kpehi a he lo? Anɛ o kɛ níhi nɛ Yehowa deɔ mo ɔ tsuɔ ní be tsuaa be lo?—Heb. 13:17.

17. Ngɛ mɛni blɔ nɔ nɛ Yehowa ji “wesa he” kɛ ha e sɔmɔli anɔkualetsɛmɛ nɛ a gbo ɔ po?

¹⁷ Yehowa maa pee “wesa he” kɛ ha anɔkualetsɛmɛ nɛ a ma gbo po loko amanehlu ngua a maa je sisi ɔ. Ngɛ mɛni blɔ nɔ? Jeha babauu se benɛ anɔkualetsɛmɛ nɛ a hi si blema a gbo ɔ, Yehowa de Mose ke: “Imi ji o nɛmɛ Abraham, kɛ Isak, kɛ Yakob a Mawu ɔ nɛ!” (2 Mose 3:6) Benɛ Yesu tsɛ munyu nɛ ɔ se gbe nya a, e de hu ke: “Mawu ɔ, hɛ kali a Mawu ji lɛ, se pi ni gbogboehi a Mawu; ejakaa e hɛ mi ɔ, nihi tsuo a hɛ ngɛ.” (Luka 20:38) Niinɛ, ngɛ Yehowa hɛ mi ɔ, e sɔmɔli anɔkualetsɛmɛ nɛ a gbo ɔ a hɛ ngɛ; e ma tle mɛ si kokooko.—Fiɛlɔ 7:1.

18. Mɛni blɔ nɔ Yehowa maa pee “wesa he” ha e webi ngɛ je ehe ɔ mi?

¹⁸ Ngɛ je ehe nɛ e be kɛe nɛ e maa ba a mi ɔ, Yehowa maa pee “wesa he” ha e webi ngɛ blɔ kpa ko hu nɔ. Kpojemi 21:3 ɔ de ke: “Mawu hi he ji nimli a kpɛti! E kɛ mɛ maa hi si.” Kɛ gu Yesu Kristo nɔ ɔ, Yehowa kɛ nihi nɛ a maa hi e nɔ yemi ɔ sisi ngɛ zugba a nɔ ɔ maa hi si. Yesu ma ha nɛ Mawu yi mi tomi kɛ ha zugba a maa ba mi kɛ pi si ngɛ e jeha akpe nɔ yemi ɔ mi. Ke jeha akpe ɔ ba nyagbe ɔ, Yesu maa ngɔ Matsɛ Yemi ɔ kɛ ha e Tsɛ ɔ ekohu. (1 Kor. 15:28) Lɔɔ se ɔ, e he be hiae nɛ Yesu nɛ pee mi dalɔ kɛ ha adesahi nɛ a ye mluku ɔ hu; Yehowa maa ye a nɔ tɛ̃ɛ. Hyɛ bua jɔmi nɛ wa ma ná hwɔɔ se! Se loko jamɛ a be ɔ maa su ɔ, nyɛ ha nɛ waa bɔ mɔde nɛ waa kase anɔkualetsɛmɛ nɛ a hi si blema a, konɛ waa ngɔ Yehowa kɛ pee wa “wesa he.”