NI KOMƐ tsɔɔ kaa e ji tɔmi kaa wa ma bi Mawu sane. Eko ɔ, a susuɔ kaa ke a bi Mawu konɛ e tsɔɔ mɛ nɔ́ heje nɛ e ngmɛɔ blɔ nɛ ní komɛ baa aloo ní komɛ bɛ ɔ, lɔɔ tsɔɔ kaa a bui lɛ. Anɛ mo hu o susuɔ jã lo?

Ke jã ji bɔnɛ o susuɔ ɔ, lɛɛ eko ɔ, e maa pee mo nyakpɛ kaa nimli kpakpahi fuu bi Mawu sanehi. Mo kadi sane komɛ nɛ a bi Mawu.

Nyumu anɔkualetsɛ Hiob bi Mawu ke: “Mɛni heje yayami peeli a se kɛɔ ngɛ je mi? Mɛni heje nɛ a peeɔ nimli nguahi, nɛ a bwɔɔ kotokoto loko a gboɔ ɔ?”—Hiob 21:7.

Gbalɔ anɔkualetsɛ Habakuk bi Mawu ke: “Mo nɛ o hɛngmɛ ngɛ klɔuklɔu, nɛ o hyɛ we nɔ́ yayami, loo nɔ́ nɛ dɛ ɔ, mɛni heje nɛ o ngɛ hyɛe nɛ nimli yayamihi ngɛ dali a hɛ mi kpatae, nɛ o de we nɔ́ ko ɔ?”—Habakuk 1:13.

Yesu Kristo bi Mawu ke: “Ye Mawu, ye Mawu, mɛni heje nɛ o kua mi?”—Mateo 27:46.

Ke o kane ngmamihi nɛ sɛ ngmami nɛ ɔmɛ a hlami kɛ ní nɛmɛ nɛ nyɛɛ ngmami nɛ ɔmɛ a se ɔ, o maa na kaa Yehowa * Mawu mi mi fu we a ti nɔ ko nɔ ko ngɛ sanehi nɛ a je a tsui mi kɛ bi lɛ ɔ he. Ngɛ anɔkuale mi ɔ, e be nyakpɛ kaa Mawu náa wa he tsui. Kaa nɔ hyɛmi nɔ́ ɔ, ke wa bi Mawu kaa e ha wɔ wa helo nya hiami níhi konɛ wa ná nɔmlɔtso mi he wami kpakpa a, e hɛwi lɛ. Mohu ɔ, e kɛ bua jɔmi tsuɔ a he ní kɛ haa wɔ. (Mateo 6:11, 33) Jã nɔuu kɛ̃ nɛ e jeɔ e tsui mi nɛ e tsɔɔ wɔ níhi nɛ ma ha nɛ wa ná juɛmi kpakpa nɛ wa tsui hu nɛ nɔ wa mi. (Filipibi 4:6, 7) Ngɛ anɔkuale mi ɔ, Yesu de e kaseli ɔmɛ ke: “Nyɛ bi, nɛ a ma ha nyɛ.” (Mateo 7:7) Munyu nɛ Yesu tu ɔ tsɔɔ kaa pi helo nya níhi pɛ nɛ́ a ma ha wɔ, se mohu a ma ha wɔ sane bimihi nɛ a he hia a a hetohi hulɔ.

Ke a ha mo he blɔ kaa o bi Mawu sanehi nɛ nyɛɛ se nɛ ɔ a kpɛti eko ɔ, te nɛ lɛ o maa suɔ kaa o ma bi lɛ?

• Anɛ i ngɛ wami mi ngɛ yi mi tomi ko heje lo?

• Ke i gbo ɔ, jije i yaa?

• Mɛni heje nɛ Mawu ha nɛ i ngɛ nɔ́ nae ɔ?

Akɛnɛ “Ngmami tsuaa Ngmami ɔ, Mawu mumi ɔ lɛ ha nɛ nihi ngma” heje ɔ, o maa na hetohi nɛ Mawu kɛ ha a ngɛ e Munyu nɛ ji Baiblo ɔ mi. (2 Timoteo 3:16) Mo susu nɔ́ nɛ ha nɛ ni komɛ bi sanehi nɛ a ngma ngɛ yinɔ ɔ, kɛ hetohi hu nɛ Baiblo ɔ kɛ ha a he nɛ o hyɛ.