1. Mɛni blɔ nɔ Mose Womi Nɛ Ji Etɛ ɔ ma nyɛ maa ye bua wɔ ngɛ?

YEHOWA ngɛ blɔ hyɛe kaa e sɔmɔli tsuo maa pee a he klɔuklɔu. E ngɛ mi kaa a tu klɔuklɔu peemi he munyu ngɛ Baiblo womi ɔmɛ tsuo a mi mohu lɛɛ, se a tu he munyu wawɛɛ ngɛ Mose Womi Nɛ Ji Etɛ ɔ mi. Ke wa bua jɔ Baiblo womi nɛ ɔ he, nɛ wa nu munyuhi nɛ ngɛ mi ɔ sisi saminya a, lɔ ɔ maa ye bua wɔ nɛ wa ma nyɛ maa pee wa he klɔuklɔu.

2. Mɛni wa maa kase ngɛ Mose Womi Nɛ Ji Etɛ ɔ mi?

² Mose lɛ ngma Mose Womi Nɛ Ji Etɛ ɔ nɛ. Womi nɛ ɔ piɛɛ “ngmami tsuaa ngmami” nɛ “e hi kɛ ha ní tsɔɔmi” ɔ he. (2 Timoteo 3:16) A wo Yehowa biɛ ɔ nɔ ta maa pee si nyɔngma ngɛ yi tsuaa yi nɛ ngɛ womi nɛ ɔ mi ɔ mi. Ke wa nu munyuhi nɛ ngɛ Mose Womi Nɛ Ji Etɛ ɔ mi ɔ sisi ɔ, lɔ ɔ maa wo wɔ he wami nɛ wa maa yu wa he ngɛ ní peepeehi nɛ ma nyɛ maa gbe Mawu biɛ ɔ he guɛ ɔ a he. (3 Mose 22:32) A tĩ munyu kpɔ nɛ ji, ‘Imi ji Yehowa’ a mi si abɔ ngɛ womi nɛ ɔ mi. E sa nɛ enɛ ɔ nɛ ha nɛ waa bu Mawu tue. Ngɛ ní kasemi nɛ ɔ kɛ ní kasemi nɛ nyɛɛ enɛ ɔ se ɔ mi ɔ, wa maa kase ní kpakpahi fuu ngɛ Mose Womi Nɛ Ji Etɛ ɔ mi. Lɔ ɔ maa ye bua wɔ nɛ wa maa pee wa he klɔuklɔu kɛ ja Mawu.

3, 4. Mɛni he okadi Aaron kɛ e binyumu ɔmɛ a he nɛ a du ha mɛ ɔ peeɔ? (Moo hyɛ foni nɛ ngɛ ní kasemi ɔ sisije ɔ.)

³ Kane 3 Mose 8:5, 6. Yehowa pɔ Aaron nu konɛ e sɔmɔ kaa osɔfo nɔkɔtɔma ngɛ Israel. E binyumu ɔmɛ hu ma sɔmɔ kaa osɔfohi. Aaron daa si ha Yesu, nɛ Aaron binyumu ɔmɛ hu daa si ha Kristofohi nɛ a pɔ mɛ nu ɔ. Aaron he nɛ a du ha lɛ ɔ peeɔ mɛni he okadi? Anɛ lɔ ɔ tsɔɔ kaa e sa nɛ a tsu Yesu he lo? Ohoo. Yayami kɛ “sé” ko be Yesu he. (Hebri Bi 7:26; 9:14) Se benɛ a du Aaron he ha lɛ ta a, e ba peeɔ Yesu nɛ e he tsɔ, nɛ e ji dalɔ ɔ he okadi. Lɛɛ mɛni Aaron binyumu ɔmɛ a he nɛ a du ha mɛ ɔ tsɔɔ?

⁴ Aaron binyumu ɔmɛ a he nɛ a du ha mɛ ɔ peeɔ nihi nɛ a hla mɛ konɛ a ya sɔmɔ kaa osɔfohi ngɛ hiɔwe ɔ, a he tsumi ɔ he okadi. Anɛ he tsumi nɛ ɔ ji baptisimi nɛ a baptisi mɛ ɔ lo? Ohoo, ejakaa baptisimi fɔ we yayami ngɛ nɔ he. Mohu ɔ, baptisimi ji okadi nɛ tsɔɔ kaa nɔ ko jɔɔ e he nɔ ha Mawu. “Sane kpakpa a,” aloo munyu ɔ ji nɔ́ nɛ a kɛ tsu nihi nɛ a pɔ mɛ nu ɔ a he ɔ nɛ. Enɛ ɔ he ɔ, e sa nɛ a kɛ Kristo tsɔɔmi ɔmɛ nɛ tsu ní saminya ngɛ a si himi mi. (Efeso Bi 5:25-27) Lɔ ɔ ma ha nɛ a maa pee a he klɔuklɔu nɛ a he ma tsɔ. Nɛ “to kpa” amɛ hu nɛɛ?—Yohane 10:16.

5. Mɛni he je nɛ wa ma nyɛ ma de ke a kɛ Mawu Munyu ɔ ngɛ to kpa amɛ a he tsue ɔ?

⁵ Aaron binyumu ɔmɛ dɛ si kɛ ha “nimli asafo” nɛ ji Yesu to kpa amɛ ɔ. (Kpojemi 7:9) Se kɛ̃ ɔ, Mawu Munyu ɔ ha nɛ to kpa amɛ pee a he klɔuklɔu nɛ a he tsɔ. Ke nihi nɛ a ngɛ hɛ nɔ kami kaa a maa hi zugba a nɔ ɔ ná hemi kɛ yemi ngɛ nɔ́ nɛ Baiblo ɔ de ngɛ Yesu  afɔle sami ɔ he ɔ mi ɔ, lɔ ɔ woɔ mɛ he wami nɛ a jaa Yehowa “nyɔ kɛ pia.” (Kpojemi 7:13-15) A ngɛ nihi nɛ a pɔ mɛ nu ɔ kɛ to kpa amɛ a he tsue daa. Enɛ ɔ he ɔ, be tsuaa be ɔ, a je mi bami he tsɔ. (1 Petro 2:12) Ke Yehowa na kaa kake peemi ngɛ e we bi a kpɛti, a he tsɔ, a buɔ lɛ tue, nɛ a kɛ anɔkuale yemi nyɛɛɔ To Hyɛlɔ Yesu se ɔ, e bua jɔɔ wawɛɛ!

6. Mɛni he je nɛ e sa nɛ be tsuaa be ɔ, waa kpa wa mi nɛ waa hyɛ ɔ?

⁶ E sa nɛ osɔfohi nɛ a hi si ngɛ Israel ɔ a he nɛ tsɔ. Mɛni wɔ hu wa ma nyɛ maa kase ngɛ mi? Nihi fuu nɛ waa kɛ mɛ kaseɔ Baiblo ɔ to he hɛ kaa wa he tsɔ, nɛ wa haa nɛ hehi nɛ wa jaa Mawu ngɛ ɔ hu tsɔɔ. Jehanɛ se hu ɔ, e sa nɛ nihi nɛ a suɔ kaa a ma ja Yehowa a, nɛ a ja lɛ kɛ ‘tsui nɛ mi tsɔ.’ (Kane La 24:3, 4; Yesaya 2:2, 3.) Enɛ ɔ he ɔ, e sa nɛ wa sɔmɔ Yehowa kɛ juɛmi kɛ tsui nɛ mi tsɔ, nɛ wa nɔmlɔ tso ɔ hu he nɛ tsɔ. Be tsuaa be ɔ, e sa nɛ waa kpa wa mi nɛ waa hyɛ. Be komɛ ɔ, wa maa na kaa e he hia nɛ waa pee tsakemi komɛ konɛ wa nyɛ nɛ waa pee wa he klɔuklɔu. (2 Korinto Bi 13:5) Kaa nɔ hyɛmi nɔ́ ɔ, ke nyɛmi ko nɛ a baptisi lɛ hyɛɛ ajuama bɔmi he fonihi ɔ, e sa nɛ e bi e he ke, ‘Anɛ i ngɛ ye he pee klɔuklɔu lo?’ Lɔ ɔ se ɔ, e sa nɛ e ha nɛ a ye bua lɛ nɛ e kpa ní peepee yaya nɛ ɔ.—Yakobo 5:14.

7. Mɛni Yesu pee nɛ́ e kɛ nɔ́ nɛ osɔfo ɔmɛ pee ngɛ 3 Mose 8:22-24 ɔ kɔ?

⁷ Benɛ a wo Aaron kɛ e binyumu ɔmɛ osɔfohi ngɛ Israel ɔ, a kɛ agbosu muɔ ɔ sa Aaron nɛ ji Osɔfo Nɔkɔtɔma a kɛ e binyumu ɔmɛ a tue nya lo, a hiɔ nine nguɛ gɔleku, kɛ a hiɔ nane nguɛ gɔleku ɔ he. (Kane 3 Mose 8:22-24.) Bɔ nɛ a kɛ muɔ ɔ tsu ní ha a tsɔɔ kaa e sa nɛ osɔfo ɔmɛ nɛ a pee tue bumi konɛ a tsu a blɔ nya ní tsumi ɔ saminya. Yesu nɛ ji Osɔfo Nɔkɔtɔma a hu pee tue bumi, nɛ e tsu e blɔ nya ní tsumihi pɛpɛɛpɛ. E sa kaa nihi nɛ a pɔ mɛ nu ɔ kɛ to kpa amɛ nɛ a kase lɛ. Yesu bu blɔ tsɔɔmihi nɛ Mawu kɛ ha lɛ ɔ tue, e pee Yehowa suɔmi nya ní, nɛ e pee e he klɔuklɔu hulɔ.—Yohane 4:31-34.

8. Mɛni e sa kaa wɔ tsuo waa pee?

⁸ Yehowa jali ji wɔ, enɛ ɔ he ɔ, e sa nɛ wɔ tsuo waa kase Yesu konɛ waa ye Mawu anɔkuale daa. E sa nɛ waa kɛ Baiblo blɔ tsɔɔmihi nɛ tsu ní sisiisi. Lɔ ɔ be hae nɛ waa “wo Mawu mumi klɔuklɔu ɔ mi mi la.” (Efeso Bi 4:30) Moo fia o pɛɛ si kaa o maa “nyɛɛ blɔ nɛ da nɔ.”—Hebri Bi 12:13.

9. Mɛni nyɛmimɛ nyumu etɛ komɛ nɛ a kɛ Blɔ Tsɔɔmi Ajla Toli ɔmɛ tsuɔ ní ɔ de, nɛ kɛ enɛ ɔ maa ye bua mo konɛ o pee o he klɔuklɔu ha kɛɛ?

⁹ Nyɛmimɛ nyumu etɛ komɛ kɛ Blɔ Tsɔɔmi Ajla Toli ɔmɛ ngɛ ní tsue jehahi babauu ji nɛ ɔ. Nyɛ ha nɛ waa bu a nya mi munyu tue. Nɔ kake de ke: “Enɛ ɔ ji he blɔ ngua nɛ i ná, nɛ akɛnɛ i kɛ mɛ tsuɔ ní he je ɔ, i ba yɔse kaa a kɛ mumi ɔ pɔ mɛ nu mohu lɛɛ, se a yi  mluku. Se i fia ye pɛɛ si kaa be tsuaa be ɔ, ma bu asafo ɔ hɛ mi nyɛɛli ɔmɛ tue.” Nyɛminyumu enyɔne ɔ hu de ke: “Munyu nɛ ngɛ 2 Korinto Bi 10:5 ɔ tsɔɔ kaa e sa nɛ waa ‘pee kaa bɔ nɛ Kristo ngɛ hlae ɔ.’ Enɛ ɔ yeɔ bua mi nɛ i jeɔ ye tsui mi kɛ peeɔ tue bumi kɛ haa nihi nɛ a ngɛ asafo ɔ hɛ mi nyɛɛe ɔ.” Nyɛminyumu etɛne ɔ hu de ke: “Ke i suɔ níhi nɛ Yehowa suɔ, nɛ i yuɔ ye he ngɛ níhi nɛ e sume ɔ a he, nɛ be tsuaa be ɔ, i hlaa e blɔ tsɔɔmi se blɔ, nɛ i peeɔ e suɔmi nya ní ɔ, lɔ ɔ tsɔɔ kaa i peeɔ tue bumi kɛ haa e we asafo ɔ, kɛ nihi nɛ ngɛ asafo ɔ hɛ mi nyɛɛe ɔ.” Nyɛminyumu nɛ ɔ kaiɔ nɔ hyɛmi nɔ́ nɛ Nyɛminyumu Nathan Knorr nɛ pee se ɔ, e sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ pee ɔ. E ngɛ mi kaa Nyɛminyumu Knorr kɛ nyɛmimɛ komɛ nui munyu nɛ ji “Birth of the Nation,” nɛ je kpo ngɛ jeha 1925 Watch Tower a mi ɔ sisi mohu lɛɛ, se Nyɛminyumu Knorr lɛɛ e pɛtɛ he jã. Nyɛminyumu ɔ bua jɔ tue bumi nɛ Nyɛminyumu Knorr pee ɔ he wawɛɛ. Ke mo hu o susu nɔ́ nɛ nyɛmimɛ nyumu etɛ nɛ ɔmɛ de ɔ he ɔ, lɔ ɔ ma ha nɛ o maa pee tue bumi kɛ ha Mawu nɛ o maa pee o he klɔuklɔu daa.

10. Mɛni he je nɛ e he hia nɛ waa kɛ Mawu mlaa nɛ kɔɔ muɔ he ɔ nɛ tsu ní ɔ?

¹⁰ Kane 3 Mose 17:10. Yehowa wo Israel bi ɔmɛ mlaa kaa a ko ye “muɔ.” A wo Kristofohi hu mlaa kaa a yu a he ngɛ nimli kɛ lohwehi a muɔ he. (Bɔfo Ɔmɛ A Ní Tsumi 15:28, 29) Wa sume kaa wa maa pee nɔ́ ko nɛ ma ha nɛ Mawu ma kua wɔ, nɛ e ma je wɔ kɛ je e we asafo ɔ mi. Wa suɔ Yehowa nɛ wa suɔ kaa wa maa bu lɛ tue. Ke wa wami ya je oslaa mi po ɔ, e sɛ nɛ waa bu nihi nɛ a li Yehowa nɛ a bui lɛ ɔ tue kɔkɔɔkɔ. Wa le kaa ni komɛ maa ye wa he fɛu ngɛ muɔ nɛ wa ngɔɛ ɔ he je, se e sa nɛ waa bu Mawu tue. (Yuda 17, 18) Mɛni maa ye bua wɔ konɛ wa ko ye muɔ aloo wa ko kplɛɛ nɛ a ha wɔ muɔ?—5 Mose 12:23.

11. Mɛni he je nɛ wa ma nyɛ ma de ke Kpatami Ligbi ɔ he hia wawɛɛ ɔ?

¹¹ Nɔ́ nɛ Israel osɔfo nɔkɔtɔma a kɛ muɔ tsuɔ ngɛ Kpatami Ligbi ɔ nɔ ɔ ha nɛ wa na bɔ nɛ Mawu buu muɔ ha. A kɛ muɔ tsuɔ nɔ́ klɛdɛɛ ko he ní. A kɛ muɔ kpataa kɛ haa Israel bi ɔmɛ a he yayami pami, konɛ huɛ bɔmi kpakpa nɛ hi a kɛ Mawu a kpɛti. A ngɔɔ na ku kɛ apletsi muɔ kɛ fĩaa somi daka a nya nɔ́ ɔ hɛ mi. (3 Mose 16:14, 15, 19) Mawu daa muɔ nɛ ɔ nɔ nɛ e kɛ Israel bi ɔmɛ a he yayamihi paa mɛ. Yehowa de hu kaa ke nɔ ko ya gbe lohwe ko nɛ e maa ye ɔ, e dɛ muɔ ɔ kɛ pue zugba nɛ e ngɔ zu kɛ pue nɔ, ejakaa “muɔ ji nɔ́ nɛ ha he lo tsuaa he lo wami.” (3 Mose 17:11-14) Mlaa nɛ ɔ he hia wawɛɛ nitsɛ. Jeha lafahi abɔ nɛ sɛ hlami ɔ, Mawu wo Noa kɛ e bimɛ ɔmɛ mlaa kaa a ko ye muɔ. (1 Mose 9:3-6) Mɛni Kristofohi maa kase ngɛ enɛ ɔ mi?

12. Mɛni Paulo de ngɛ muɔ kɛ yayami pami he?

¹² Bɔfo Paulo tsɔɔ kaa muɔ ma nyɛ ma ha nɛ nɔ he nɛ tsɔ. E de ke: “Ngɛ mlaa a nya a, muɔ ji nɔ́ nɛ tsuɔ níhi  tsuo a he; nɛ ke a pue we muɔ si ɔ, a kɛ yayami pɛ.” (Hebri Bi 9:22) Se afɔlehi nɛ a kɛ lohwehi sãa a be si hie daa. Paulo tsɔɔ kaa afɔle nɛ ɔmɛ nɛ a sãa a haa nɛ Israel bi ɔmɛ kaiɔ kaa a ji yayami peeli, nɛ e he hia nɛ a ngɔ nɔ́ ngua ko kɛ sã afɔle kɛ je a he yayami ɔmɛ kulaa. Mlaa a “ngɛ kaa ní kpakpahi nɛ hi kɛ pi si nɛ maa ba hwɔɔ se ɔ a nini kɛkɛ, pi ní ɔmɛ nitsɛmɛ.” (Hebri Bi 10:1-4) Lɛɛ mɛni blɔ nɔ a maa gu kɛ ngɔ nihi a he yayamihi kɛ pa mɛ mɔ?

13. Mɛni se o ma ná ngɛ Yesu muɔ ɔ nɛ e kɛ sã afɔle ɔ nɛ e kɛ ya ha Yehowa a he?

¹³ Kane Efeso Bi 1:7. Yesu ngɔ e wami kɛ sã afɔle kɛ ha adesahi tsuo. Nihi nɛ a ngɛ suɔmi kɛ ha e kɛ e Tsɛ ɔ ma ná he se wawɛɛ nitsɛ. (Galatia Bi 2:20) Ngɛ Yesu si temi ɔ se ɔ, e pee nɔ́ nɛ a peeɔ ngɛ Kpatami Ligbi ɔ nɔ ɔ eko. Enɛ ɔ lɛ ma ha nɛ a kɛ wa yayamihi ma nyɛ maa pa wɔ ɔ nɛ. Ke osɔfo nɔkɔtɔma a ya He Klɔuklɔu Pe Kulaa a, e ngɛ kaa nɔ́ nɛ e ya Mawu hɛ mi. E ngɔɔ lohwe ɔmɛ a muɔ ɔ kɛ ya haa Mawu ngɛ lejɛ ɔ. (3 Mose 16:11-15) Benɛ a tle Yesu si kɛ je gbeje ɔ, e ho hiɔwe ya, nɛ ngɛ blɔ ko nɔ ɔ, e kɛ e muɔ nɛ e kɛ sã afɔle ɔ ya ha Mawu. (Hebri Bi 9:6, 7, 11-14, 24-28) Wa bua jɔ kaa a kɛ wa he yayami ma nyɛ maa pa wɔ, nɛ wa ngɛ he nile kpakpa, ejakaa wa ngɛ hemi kɛ yemi ngɛ Yesu muɔ nɛ e kɛ sã afɔle ɔ mi!

14, 15. Mɛni he je nɛ e he hia nɛ waa nu Yehowa mlaa nɛ e wo ngɛ muɔ he ɔ sisi nɛ wa kɛ tsu ní ɔ?

 ¹⁴ Eko ɔ, amlɔ nɛ ɔ lɛɛ o nu nɔ́ he je nɛ Yehowa wo wɔ mlaa kaa wa ko “ye muɔ” ɔ sisi. (3 Mose 17:10) Anɛ o na nɔ́ he je nɛ muɔ ngɛ klɔuklɔu ha Mawu ɔ lo? Muɔ daa si ha wami. (1 Mose 9:4) E ngɛ heii kaa e sa nɛ waa bu muɔ kaa bɔ nɛ Mawu buu lɛ ɔ, nɛ waa kɛ mlaa nɛ e wo wɔ kaa waa yu wa he ngɛ muɔ he ɔ nɛ tsu ní. Ke wa ngɛ hemi kɛ yemi ngɛ Yesu kpɔmi afɔle sami ɔ mi, nɛ wa le hu kaa muɔ ngɛ klɔuklɔu ha Bɔlɔ ɔ, lɔ ɔ loko waa kɛ Mawu wa kpɛti maa da.—Kolose Bi 1:19, 20.

¹⁵ Hiɔ ko ma nyɛ maa fia wa ti nɔ tsuaa nɔ tlukaa nɛ́ e ma bi nɛ waa mwɔ wa yi mi kpɔ kaa wa maa ngɔ muɔ loo muɔ mi ní nyafinyafi ɔmɛ eko, aloo wa be ngɔe kɛ tsu ní. Enɛ ɔ he ɔ, e he hia nɛ o sɔle kɛ ha Yehowa, nɛ o hla níhi a mi, nɛ o ma o juɛmi nya si kɛ fɔ si loko hiɔ ko nɛ ba fia mo tlukaa. Lɔ ɔ ma ha nɛ o ma ná kã kɛ yu o he ngɛ muɔ he. E sɛ nɛ waa pee nɔ́ ko nɛ Yehowa bua jɔɛ he nɛ e mi mi nɛ ba fu! Mwɔnɛ ɔ, dɔkitahi kɛ nihi fuu woɔ wɔ he wami kaa wa je wa muɔ kɛ he nihi a yi wami. Se akɛnɛ Mawu we bi ji wɔ nɛ wa ngɛ klɔuklɔu he je ɔ, wa le kaa Yehowa ngɛ he blɔ nɛ́ e tsɔɔ nɔ́ nɛ e sa kaa a kɛ muɔ nɛ pee. “Muɔ” ngɛ klɔuklɔu ngɛ e hɛ mi. Enɛ ɔ he ɔ, e sa nɛ waa kɛ mlaa nɛ e wo ngɛ muɔ he ɔ nɛ tsu ní. Ke wa je mi bami hu he tsɔ ɔ, lɔ ɔ ma ha nɛ e maa na kaa wa bua jɔ Yesu muɔ nɛ e kɛ sã afɔle ɔ he. Yehowa ma nyɛ maa da Yesu muɔ ɔ nɔ kɛ ngɔ wa yayamihi kɛ pa wɔ konɛ wa ná neneene wami.—Yohane 3:16.

16. Mɛni he je e sa kaa Yehowa we bi nɛ a pee a he klɔuklɔu ɔ?

¹⁶ Benɛ Yehowa kpɔ Israel bi ɔmɛ kɛ je nyɔguɛ yemi mi ngɛ Egipt ɔ, e de mɛ ke: ‘Imi ji Yehowa. Imi nɛ i je nyɛ kɛ je Egipt zugba a nɔ, konɛ ma ba pee nyɛ Mawu. Lɔ ɔ he ɔ, nyɛɛ pee nyɛ he klɔuklɔu; ejakaa Nɔ Klɔuklɔu ji mi.’ (3 Mose 11:45) Yehowa hyɛ blɔ kaa Israel bi ɔmɛ maa pee a he klɔuklɔu, ejakaa lɛ hu e ngɛ klɔuklɔu. Mwɔnɛ ɔ hu ɔ, Yehowa ngɛ blɔ hyɛe kaa wa maa pee wa he klɔuklɔu. A tsɔɔ enɛ ɔ mi heii ngɛ Mose Womi Nɛ Ji Etɛ ɔ mi.

17. Amlɔ nɛ ɔ, kɛ o naa Mose Womi Nɛ Ji Etɛ ɔ ha kɛɛ?

¹⁷ Atsinyɛ jemi ko be he kaa o ná níhi nɛ wa susu he ngɛ Mose Womi Nɛ Ji Etɛ ɔ mi ɔ he se. E ngɛ heii kaa o bua jɔ Baiblo ɔ mi womi nɛ ɔ he, nɛ o ba nu nɔ́ he je nɛ e sa kaa waa pee wa he klɔuklɔu ɔ sisi saminya. Mɛni hu wa ma nyɛ maa kase ngɛ Mose Womi Nɛ Ji Etɛ ɔ mi? Ngɛ mɛni blɔ nɔ Baiblo ɔ mi womi nɛ ɔ maa ye bua wɔ konɛ wa ja Mawu ngɛ blɔ nɛ he tsɔ nɔ? Wa ma susu sane bimi nɛ ɔmɛ a he ngɛ ní kasemi nɛ nyɛɛ se ɔ mi.