Gbalɔ Mose de ke, ke wa ye Mawu kita amɛ a nɔ ɔ, e maa jɔɔ wɔ. (5 Mose 10:13; 11:27) Pi gbeye nɛ wa yeɔ kaa Mawu maa gbla wa tue ɔ he je nɛ wa buɔ lɛ tue. Se mohu ɔ, e su kpakpa amɛ ji nɔ́ nɛ haa nɛ wa buɔ lɛ tue, ejakaa wa suɔ lɛ, nɛ wa sume nɛ wa maa pee nɔ́ ko nɛ maa dɔ lɛ. “Enɛ ɔ ji suɔmi nɛ wa suɔ Mawu ɔ nɛ, kaa wa maa ye e kita amɛ a nɔ.”​—1 Yohane 5:3.

Se mɛni blɔ nɔ nɛ Mawu tue nɛ wa maa bu ɔ ma ha nɛ wa ná jɔɔmi? Ha nɛ wa susu blɔ enyɔ komɛ a he nɛ waa hyɛ.

‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔ nɛ nyɛɛ ba nyɛ je mi ha, konɛ e hi ha nyɛ nitsɛmɛ.’​—YESAYA 48:17.

Yehowa Mawu nɛ ji wa Bɔlɔ ɔ le wɔ, nɛ e haa wɔ blɔ tsɔɔmihi nɛ wa hia. E sa nɛ waa kase níhi nɛ Mawu suɔ kaa waa pee ɔ ngɛ Ngmami Klɔuklɔu ɔmɛ a mi, nɛ́ waa kɛ níhi nɛ wa kase ɔmɛ nɛ tsu ní bɔ nɛ pee nɛ e ye bua wɔ kɛ mwɔ yi mi kpɔhi nɛ da.

“Nihi nɛ a nuɔ Mawu munyu ɔ nɛ a yeɔ nɔ ɔ, mɛ lɛ a ngɛ bua jɔmi!”​—LUKA 11:28.

Mwɔnɛ ɔ, nihi ayɔhi abɔ nɛ a kɛ níhi nɛ ngɛ Mawu Munyu ɔ mi ɔ tsuɔ ní ɔ ngɛ bua jɔmi nitsɛnitsɛ. Mo susu nyumu ko nɛ ngɛ Spain nɛ be ko nɛ be ɔ e mi mi fuɔ mlamlaamla, nɛ́ e kɛ e yo ɔ kɛ ni kpahi hí si saminya a he nɛ o hyɛ. Ligbi ko ɔ, e kane nɔ́ nɛ gbalɔ Mose ngma kɛ kɔ Yakob binyumu Yosef nɛ e he jɔ ɔ he ní. A jua Yosef kaa nyɔguɛ nɛ a wo lɛ tsu be mi nɛ e pee we yayami ko. Se e mi mi fu we, e kɛ nihi hi si ngɛ tue mi jɔmi mi, nɛ e ngɔ a tɔmi kɛ ke mɛ. (1 Mose yi 37-45) Nyumu ɔ nɛ ngɛ Spain ɔ de ke: “Yosef sane ɔ he nɛ i susu ɔ wo mi he wami konɛ ma pee nɔ nɛ he jɔ, nɛ e nuɔ nɔ́ he ha nɔ, nɛ e yeɔ e he nɔ. Enɛ ɔ ye bua mi nɛ i ngɛ bua jɔmi amlɔ nɛ ɔ.”

Ngmami Klɔuklɔu ɔmɛ tsɔɔ wɔ bɔ nɛ e sa kaa waa kɛ nihi nɛ hi si ha. Wa ma susu ekomɛ a he ngɛ munyu nɛ nyɛɛ se ɔ mi.