ANƐ MO NITSƐ O MA NYƐ MAA HLA BƆ NƐ O SUƆ NƐ O SI HIMI NƐ PEE HA HWƆƆ SE LO? Ni komɛ susu kaa nɔ ko to bɔ nɛ a hwɔɔ se maa pee ha a kɛ fɔ si momo, pi mɛ nɛ a maa hla nɔ́ nɛ a suɔ, aloo a ma kudɔ a si himi. Ke a nyɛ we nɛ a su oti ko he ɔ, a pee we he nɔ́ ko, mohu ɔ, a deɔ ke “e ji a sɛsɛɛ!”

A kpɛti ni komɛ hu ngɛ nɛ ke a na kaa a be nyɛe maa pee je nɛ hyi tɔ kɛ yi wu tso ní nɛ a yi dami sane ngɛ mi nɛ ɔ he nɔ́ ko ɔ, a kɔni mi jɔ̃ɔ. Eko ɔ, a bɔ mɔde kaa a maa pee a si himi ɔ he nɔ́ ko, se e yɛ nya. Níhi nɛ a naa mohu ji ta, awi yemi, adebɔ mi oslaa, kɛ hiɔ nɛ haa nɛ a nine nyɛɔ si. Enɛ ɔ he ɔ, a biɔ ke: ‘Mɛni he je nɛ e sa nɛ ma hao ye he?’

Ngɛ anɔkuale mi ɔ, nyagbahi nɛ waa kɛ kpeɔ ngɛ si himi mi ɔ ma nyɛ maa sa yi mi kpɔhi nɛ wa mwɔɔ he. (Fiɛlɔ 9:11) Se nɔ́ nɛ he hia wawɛɛ nɛ ji neneene wami nɛ o ma ná hwɔɔ se ɔ lɛɛ, e daa si ngɛ o nɔ, e sa nɛ o mwɔ yi mi kpɔ ngɛ he. Ngɛ anɔkuale mi ɔ, Baiblo ɔ tsɔɔ kaa o hwɔɔ se si himi daa si ngɛ nɔ́ nɛ o maa hla mwɔnɛ ɔ nɔ. Mo susu nɔ́ nɛ Baiblo ɔ de ɔ he nɛ o hyɛ.

Benɛ e piɛ bɔɔ nɛ blema Israel bi ɔmɛ maa su si womi zugba a nɔ ɔ, Mose nɛ ji a hɛ mi nyɛɛlɔ ɔ de mɛ ke: ‘I ngɔ wami kɛ gbenɔ kɛ ngɛ nyɛ hɛ mi fɔe; i ngɔ Mawu gbaami kɛ gbiɛmi hu kɛ ngɛ nyɛ hɛ mi fɔe; Nyɛɛ ngɔ wami. Nyɛɛ suɔ Yehowa, nyɛ Mawu ɔ; nyɛɛ bu lɛ tue, nɛ nyɛɛ pee e suɔmi nya ní pɛpɛɛpɛ.’​—5 Mose 30:15, 19, 20.

“I ngɔ wami kɛ gbenɔ kɛ ngɛ nyɛ hɛ mi fɔe; i ngɔ Mawu gbaami kɛ gbiɛmi hu kɛ ngɛ nyɛ hɛ mi fɔe; . . . Nyɛɛ ngɔ wami.”​—5 Mose 30:19.

Niinɛ! Mawu kpɔ̃ Israel bi ɔmɛ kɛ je nyɔguɛ yemi mi ngɛ Ijipt, nɛ e wo mɛ si kaa a maa hi si ngɛ Si Womi Zugba a nɔ ngɛ bua jɔmi kɛ tue mi jɔmi mi. Se ní nɛ ɔmɛ tsuo be nyɛe maa ba mi kɛkɛ. E sa nɛ Israel bi ɔmɛ nitsɛmɛ nɛ a “ngɔ wami” loko a nine maa su jɔɔmi nɛ ɔmɛ a nɔ. Se mɛni blɔ nɔ nɛ a maa gu kɛ pee jã? E sa nɛ ‘a suɔ Mawu, a bu lɛ tue, nɛ a pee e suɔmi nya ní pɛpɛɛpɛ.’

Mwɔnɛ ɔ hu ɔ, nɔ́ nɛ o maa hla a lɛ maa tsɔɔ bɔ nɛ o si himi ma ji ha hwɔ se. Ke o hla kaa o maa suɔ Mawu, o maa pee nɔ́ nɛ Mawu suɔ ɔ, lɔ ɔ maa tsɔɔ kaa o hla wami, nɛ ji neneene wami ngɛ paradeiso mi ngɛ zugba a nɔ. Se mɛni ní nɛ ɔmɛ biɔ nɛ o pee?

Suɔmi ji Mawu su titli. Bɔfo Yohane ngma ke, “Mawu ji suɔmi.” (1 Yohane 4:8) Enɛ ɔ he ɔ, benɛ a bi Yesu nɔ́ nɛ ji mlaa nɛ pe kulaa a, e de ke: “E sa nɛ o suɔ Yehowa o Mawu ɔ kɛ o tsui tsuo kɛ o susuma tsuo kɛ o juɛmi tsuo.” (Mateo 22:37) Ja wa suɔ Yehowa Mawu loko Huɛ bɔmi nitsɛ maa hi waa kɛ lɛ wa kpɛti. E sɛ nɛ waa ye gbeye kaa wa maa hɛ wɔ kɛ su e he, loo e pee kaa nɔ́ nɛ a wa nɔ nyɛe kaa waa bu lɛ tue. Se mɛni he je nɛ e sa nɛ waa hla kaa wa maa suɔ Mawu ɔ?

Suɔmi nɛ Yehowa ngɛ kɛ ha adesahi ɔ ngɛ kaa suɔmi nɛ fɔli ngɛ kɛ ha a bimɛ ɔ. E ngɛ mi kaa fɔli yi mluku mohu lɛɛ, se fɔli nɛ a ngɛ suɔmi ɔ kɛ fami haa a bimɛ, a woɔ mɛ he wami, a yeɔ kɛ buaa mɛ, nɛ a tsɔseɔ mɛ akɛnɛ a suɔ nɛ a ná bua jɔmi nɛ a ná si himi kpakpa a he je. Mɛni fɔli hyɛɛ blɔ kaa a bimɛ ɔmɛ hu nɛ a pee? A suɔ nɛ a bimɛ ɔmɛ hu nɛ a suɔ mɛ, nɛ a ngɔ blɔ tsɔɔmi nɛ a kɛ ha mɛ ɔ kɛ tsu ní konɛ e hi ha mɛ nitsɛmɛ. Ke jã a, lɛɛ anɛ nile be mi kaa wa hiɔwe Tsɛ nɛ e ye mluku ɔ maa hyɛ blɔ kaa wa maa suɔ lɛ nɛ wa je hɛ sa kpo ngɛ níhi nɛ e pee ha wɔ ɔmɛ a he lo?

Ngɛ Hebri munyu nɛ a kɛ ngma Baiblo ɔ mi ɔ, behi fuu ɔ, munyu nɛ ji “bu tue” ɔ hɛɛ sisi numi nɛ ji “bumi kpo nɛ a ma je.” Ke nɔ ko de jokuɛ ko ke, “Moo bu o fɔli tue” ɔ, anɛ pi jã nɛ nɔ ɔ ngɛ tsɔɔe lo? Ngɛ anɔkuale mi ɔ, ke a ke nɔ ko nɛ e bu Mawu tue ɔ, lɔ ɔ tsɔɔ kaa e sa nɛ nɔ ɔ nɛ e kase Mawu he ní, nɛ e pee nɔ́ nɛ Mawu suɔ. Akɛnɛ wa be nyɛe maa nu Mawu gbi nitsɛnitsɛ he je ɔ, ke wa kane e Munyu nɛ ji Baiblo ɔ nɛ waa kɛ tsu ní ɔ, lɔ ɔ tsɔɔ kaa wa ngɛ lɛ tue bue.​— 1 Yohane 5:3.

Ligbi ko benɛ Yesu ngɛ se nami nɛ ngɛ Mawu tue nɛ wa maa bu ɔ mi tsɔɔe ɔ, e de ke: “Pi abolo pɛ nɛ baa nɔmlɔ wami yi, mohu ɔ, munyu fɛɛ munyu nɛ jeɔ Yehowa nya a.” (Mateo 4:4) Niye ní nitsɛ he hia wɔ, se Mawu he anɔkuale nɛ wa maa kase ɔ hu he hia wɔ wawɛɛ po pe jã. Mɛni he je? Matsɛ Solomɔn nɛ e ji ní lelɔ ɔ de ke: “Nile faa nɔ he kaa bɔ nɛ sika faa nɔ he ɔ. Nile haa nɛ nɔ yeɔ e he.” (Fiɛlɔ 7:12) Mawu he nile nɛ wa ma ná a ma nyɛ maa bu wa he mwɔnɛ ɔ, nɛ e maa ye bua wɔ konɛ waa mwɔ yi mi kpɔ nɛ da nɛ ma ha nɛ wa nine nɛ su neneene wami ɔ nɔ hwɔɔ se.

Wa sɛ hlami tu nɔ́ he tomi nɔ́ ko nɛ Yesu kɛ tsu ní he munyu ngɛ munyu nɛ sɛ hlami ɔ mi. Yesu de ke: “Agbo nɛ e ngɛ tokofii, kɛ blɔ nɛ e nɔ nyɛɛmi yee ɔ kɛ nɔ yaa wami mi, nɛ nihi bɔɔ pɛ lɛ a naa jamɛ a blɔ ɔ.” (Mateo 7:13, 14) Ke wa ma nyɛ maa nyɛɛ blɔ nɛ ɔ nɔ ɔ, lɛɛ e sa nɛ be fɛɛ be ɔ, waa hi nɔ ko nɛ e he be nɛ e le blɔ ɔ nɔ nyɛɛmi ɔ kasa nya daa nɛ e tsɔɔ wɔ blɔ. Lɔ ɔ maa ye bua wɔ konɛ wa nyɛ nɛ wa ya su he nɛ wa yaa, nɛ ji neneene wami nami. Ngɛ anɔkuale mi ɔ, wa ngɛ yi mi tomi kpakpa he je nɛ e sa nɛ waa hi Mawu kasa nya haa. (La 16:8) Lɛɛ kɛ wa ma plɛ kɛ pee enɛ ɔ ha kɛɛ?

Daa je nɛ maa na a, níhi fuu ngɛ nɛ e sa nɛ waa pee, nɛ níhi babauu hu ngɛ nɛ wa suɔ nɛ waa pee. Ní nɛ ɔmɛ ma nyɛ ma je wa juɛmi, aloo a maa ngɔ wa be tsuo, nɛ wa be nyɛe ma susu níhi nɛ Mawu suɔ kaa waa pee ɔmɛ a he. Enɛ ɔ he je nɛ Baiblo ɔ deɔ wɔ ke: “Nyɛɛ hyɛ nɛ hi saminya konɛ bɔ nɛ nyɛ nyɛɛɔ ha a nɛ e ko pee kaa nihi nɛ a be juɛmi, se mohu kaa juɛmitsɛmɛ, nyɛɛ kɛ nyɛ be nɛ tsu ní ngɛ blɔ nɛ hi pe kulaa nɔ, ejakaa ligbi ɔmɛ ji ligbi yayamihi.” (Efeso Bi 5:15, 16) Ke wa ha nɛ huɛ bɔmi nɛ maa hi waa kɛ Mawu wa kpɛti ɔ pee nɔ́ titli ngɛ wa si himi mi ɔ, lɔ ɔ ma ha nɛ waa hɛ kɛ su e he haa.​—Mateo 6:33.

E ngɛ mi kaa o be nyɛe ma tsake níhi nɛ o pee kɛ be ɔ mohu lɛɛ, se o ma nyɛ ma kudɔ níhi konɛ o kɛ o suɔli nɛ ná hwɔɔ se si himi kpakpa. Baiblo ɔ tsɔɔ kaa Yehowa Mawu nɛ ji wa hiɔwe Tsɛ ɔ suɔ wɔ wawɛɛ nitsɛ, enɛ ɔ he ɔ, e tsɔɔ wɔ níhi nɛ e ngɛ hlae nɛ waa pee. Mo kadi munyu nɛ gbalɔ Mika tu ɔ. E de ke:

‘Yehowa tsɔɔ wɔ nɔ́ nɛ hi. Nɔ́ nɛ e ngɛ hlae ngɛ wa dɛ kɛkɛ ji kaa waa ye dami sane, nɛ waa na mɔbɔ, nɛ waa ba wa he si ha wa Mawu ɔ.’​—Mika 6:8.

Anɛ o maa kplɛɛ Yehowa nine fɔmi kaa o kɛ lɛ nɛ nyɛɛ konɛ o ná jɔɔmi nɛ ngɛ kɛ yaa neneene nɛ e wo he si ɔ nɔ lo? He blɔ ɔ ngɛ o dɛ!