BLEMA NILE MUNYU NƐ MA NYƐ MAA YE BUA WƆ MWƆNƐ Ɔ
Koo Pee Yeyeeye
BAIBLO SISI TOMI MLAA: “Nyɛ ko hao ngɛ nyɛ wami he.”—Mateo 6:25.
Mɛni munyu nɛ ɔ tsɔɔ? Yesu tu munyu nɛ ɔ ngɛ e Yoku ɔ Nɔ Fiɛɛmi ɔ mi. Baiblo munyuhi a sisi tsɔɔmi womi ko tsɔɔ kaa, Hela munyu nɛ ji “yeyeeye peemi” ɔ ma nyɛ maa tsɔɔ “bɔ nɛ nɔ ko peeɔ e ní ha ke hwɔ loo ohia ngɛ lɛ yee.” Behi fuu ɔ, yeyeeye peemi kɔɔ he nɛ a haoɔ ngɛ hwɔɔ se he. Tɔmi ko be he kaa wa ma susu wa suɔli a hiami níhi, loo a hwɔɔ se si himi he. (Filipi Bi 2:20) Se benɛ Yesu de e se nyɛɛli ɔmɛ kaa a “ko hao” ɔ, nɔ́ nɛ e ngɛ tsɔɔe ji kaa e sɛ nɛ a hao tsɔ ngɛ hwɔɔ se he, konɛ lɔ ɔ kó ba puɛ bua jɔmi nɛ a ngɛ mwɔnɛ ɔ.—Mateo 6:31, 34.
Anɛ ga womi nɛ ɔ ma nyɛ maa ye bua wɔ mwɔnɛ ɔ lo? Nile ngɛ mi kaa waa kɛ Yesu ga womi ɔ ma tsu ní. Mɛni he je? Níhi a mi hlami tsɔɔ kaa ke nɔ ko ngɛ haoe kpamisa a, e tsui maa fia mlamlaamla pe bɔ nɛ e sa nɛ e fia a. Ke e hyɛ we nɛ hi ɔ, “e mi mi ma nyɛ maa pee pa, nɛ e ma nyɛ ma ná tsui hiɔ loo hoha.”
Yesu tsɔɔ kaa e sɛ nɛ waa hao ngɛ ní komɛ a he ejakaa se nami be he. Yesu bi ke: “Nyɛ ti mɛnɔ kɛ yeyeeye peemi ma nyɛ tsɔ e kami nya nine kpɔ mi kami kake?” (Mateo 6:27) Ke wa peeɔ yeyeeye ɔ, lɔ ɔ be nyɛe maa ngɔ tsuifia kake po kɛ piɛɛ wa wami he, nɛ e be wa haomi ɔmɛ hu jee kɛ je. Behi fuu ɔ, níhi ya bɛ kaa bɔ nɛ wa susuɔ ɔ po. Ní lelɔ ko de ke: “Ke wa haoɔ ngɛ hwɔɔ se he ɔ, e ji be puɛmi, ejakaa behi fuu ɔ, níhi puɛ we kaa bɔ nɛ wa susu kaa e maa pee ɔ.”
Mɛni maa ye bua wɔ nɛ wa be yeyeeye pee? Kekleekle ɔ, mo ná hemi kɛ yemi ngɛ Mawu mi. Ke Mawu haa lohwe pɛlitsɛmɛ niye ní, nɛ e haa nɛ mɔmɔhi peeɔ fɛu ɔ, anɛ e be adesahi nɛ a jaa lɛ ngɛ anɔkuale yemi mi ɔ a hiami níhi hae lo? (Mateo 6:25, 26, 28-30) Nɔ́ nɛ ji enyɔ ɔ, koo hao o he ngɛ hwɔɔ he. Yesu de ke: “Nyɛ ko hao nyɛ he ha hwɔɔ; ejakaa hwɔɔ hu ma kɛ lɛ nitsɛ e haomihi babauu.” Anɛ o kplɛɛ we nɔ kaa ‘haomihi nɛ baa daa ligbi ɔ, e hia we kaa waa ngɔ ekpa ko kɛ ba piɛɛ ligbi ko nɔ́ he’ lo?—Mateo 6:34.
Ke waa kɛ Yesu ga womi ɔ tsu ní ɔ, wa maa ye wa he ngɛ hiɔ komɛ a he, nɛ wa he mi maa jɔ wɔ, loo kaa bɔ nɛ Baiblo ɔ de ɔ, wa ma ná “Mawu he jɔmi” ɔ.—Filipi Bi 4:6, 7.
Eko ɔ, O Bua Maa Jɔ Enɛ ɔ Hu He
BAIBLO TSƆƆMIHI NƐ A HE HIA
Jije Wa Maa Na Sane Bimihi Nɛ A He Hia Amɛ A Heto Ngɛ?
Anɛ o ngɛ sane bimihi nɛ kɔɔ wami, gbenɔ aloo hwɔɔ se he lo? Wa ma nyɛ maa na heto nɛ sa kɛ ha sane bimi nɛ ɔmɛ kɛ e kpahi! Se jije wa maa na heto ɔmɛ ngɛ?
WA HE SANEHI
Mo Bi Nɛ A Ba Slaa Mo
Nyɛ ma nyɛ ma susu Baiblo mi sane bimi ko he, aloo nyɛ ma nyɛ maa kase Yehowa Odasefohi a he ní.
