DON nɛ e ji Yehowa Odasefo no nɛ e ngɛ Canada a bɔɔ mɔde kaa e maa fiɛɛ ha nihi ngɛ gbɛjegbɛ he. Don tu a kpɛti nɔ kake he munyu. E de ke: “Nyumu ko nɛ a tsɛɛ lɛ ke Peter a be hwɔ he, nɛ e ji nyumuhi nɛ i na ngɛ gbɛjegbɛ he nɛ a he sɛ mu pe nɔ fɛɛ nɔ ɔ a kpɛti nɔ kake. E he ngɛ gbeye, nɛ e fieɔ nihi nɛ a suɔ kaa a maa su e he ɔ. E kplɛɛ we nɛ nihi peeɔ lɛ kpakpa.” Jeha 14 sɔuu nɛ e ha we Don hɛ mi, se kɛ̃ ɔ, Don ya nɔ nɛ e to e tsui si nɛ e je mi mi himi kpo kɛ ha nyumu nɛ e be hwɔ he nɛ ɔ.

Ligbi ko ɔ, Peter bi Don ke: “Mɛni he je nɛ o gbaa o he nya ngɛ ye he ɔ? Nɔ fɛɛ nɔ ngmɛɛ ye jemi he ha mi. Mɛni he je nɛ o gbaa o he nya ngɛ ye he ɔ?” Don kɛ hɛ si kami tsu ní, nɛ e kɛ Peter susu ngmami etɛ komɛ a he konɛ e kɛ su Peter tsui he. Kekleekle ɔ, e bi Peter ke ji e le Mawu biɛ nitsɛnitsɛ lo, nɛ e ha nɛ Peter kane kɛ je Baiblo ɔ mi tɛɛ ngɛ La 83:18. Lɔ ɔ se ɔ, Don ha nɛ Peter kane Roma Bi 10:13, 14 ɔ, kɛ tsɔɔ lɛ nɔ́ he je nɛ e susuɔ e he. Lejɛ ɔ de ke: ‘Nɔ tsuaa nɔ nɛ ma kpa ngmlaa kɛ tsɛ Yehowa biɛ ɔ, a ma he e yi wami.’ Nyagbenyagbe ɔ, Don kane Mateo 9:36, nɛ e ha nɛ Peter nitsɛ hu kane. A ngma ngɛ lejɛ ɔ ke: “Benɛ [Yesu] na ma kpekpemi ɔ, e mi mi sã lɛ ngɛ ni ɔmɛ a he, ejakaa pɔ tɔ mɛ, nɛ a dɛ yaa kaa tohi nɛ be hyɛlɔ.” Benɛ Peter kane ngmami ɔ nɔuu ɔ, e hɛngmɛ nɔ da nyu, nɛ e bi ke: “Imi hu i piɛɛ to ɔmɛ a he lo?”

Peter bɔni tsakemi peemi ngɛ e si himi mi. E du e he, e sɛ e kpɛni ɔ saminyayoo, nɛ e wo tadehi nɛ a he tsɔ nɛ Don kɛ ha lɛ ɔ. Kɛ je jamɛ a be ɔ, be fɛɛ be nɛ o maa na Peter a, e he tsɔ.

Peter ngɛ womi nyafii ko nɛ e ngmaa níhi nɛ yaa nɔ ngɛ ligbi ɔ mi ɔ kɛ woɔ mi. Ní momohi nɛ e ngma ngɛ womi ɔ mi ɔ ngɛ aywilɛho, se níhi nɛ e ngma ngɛ mi pee se ɔ je kpa kulaa. Níhi nɛ e ngma a eko ji: “I kase Mawu biɛ mwɔnɛ ɔ. Amlɔ nɛ ɔ, ma nyɛ ma sɔle kɛ ha  Yehowa. Ye bua jɔ kaa i ba le e biɛ. Don tsɔɔ mi kaa Yehowa ma nyɛ maa pee ye Huɛ, nɛ i kɛ lɛ ma nyɛ maa sɛɛ ní be fɛɛ be, nɛ ma nyɛ ma de lɛ nɔ́ tsuaa nɔ́.”

Loko Peter ma gbo ɔ, e ngma sɛ womi kɛ ya ha e nyɛmimɛ. E ngma ke:

“Ye nɔ tsɔ we mi mwɔnɛ ɔ. I yɔse kaa i ngɛ gbenɔ muɔ nya. Se ke je be ye yi nae po, i le kaa i kɛ ye huɛ [Don] maa kpe ekohu ngɛ Paradeiso. Ke nyɛ ngɛ womi nɛ ɔ kanee ɔ, nyɛ ná nɛ nyɛɛ le kaa i be hu. Se ke nyɛ na nyumu ko nɛ nyɛ li lɛ ngɛ ye ya a sisi ɔ, nyɛɛ kɛ lɛ nɛ tu munyu, nɛ i kpa nyɛ pɛɛ nɛ nyɛɛ kane womi bluu nɛ ɔ [e ngɛ Baiblo kasemi womi nɛ ji “The Truth That Leads to Eternal Life” ɔ nɛ a ha lɛ jeha komɛ nɛ be ɔ he munyu tue]. * Womi ɔ tsɔɔ kaa ma kpale na ye huɛ ɔ ekohu ngɛ Paradeiso. I he munyu nɛ ɔ ye kɛ ye tsui tsuo. Nyɛ nyɛminyumu nɛ nyɛ suɔ, Peter.”

Benɛ a gbe ya a nya a, Peter nyɛmiyo Ummi de ke: “Maa pee jeha enyɔ nɛ be ɔ i kɛ Peter kpe. Jamɛ a ligbi ɔ ji kekleekle ligbi nɛ i na kaa Peter bua jɔ. E muɔ hɛlii po ngɛ e nya he.” Ummi de Don ke: “Ma kase womi nɛ ɔ, ejakaa nɔ́ nɛ ma nyɛ ma tsake ye nyɛminyumu nɛ ɔ maa pee nɔ́ ko nɛ se be.” Jehanɛ hu ɔ, Ummi kplɛɛ nɔ kaa Yehowa Odasefo no ko kɛ lɛ nɛ ba kase womi nɛ ji Mɛni Tutuutu Ji Baiblo ɔ Tsɔɔmi? nɛ a pee lingmi nɛ ɔ.

Wɔ hu wa ma nyɛ ma kua nihi a hɛ mi hyɛmi, konɛ wa je suɔmi nitsɛnitsɛ kpo kɛ tsɔɔ nɔ fɛɛ nɔ, nɛ wa ná a he tsui. (1 Tim. 2:3, 4) Ke wa pee jã a, wa ma nyɛ maa ye bua tsui kpakpatsɛmɛ kaa Peter nɛ eko ɔ, e yeɔ ha nihi kaa a maa su a he ɔ. Wa ma nyɛ ma ná nɔ mi mami kaa Mawu nɛ e ‘hyɛɛ nɔ tsui mi’ ɔ, ma ha nɛ anɔkuale ɔ nɛ wa ngɛ tsui kpakpatsɛmɛ a tsui mi.​—1 Sam. 16:7; Yoh. 6:44.