Yesaya 60:1 NW, kaneɔ ke: “Oo yo, tee si nɛ o kpɛ kaa la, ejakaa o la a ba. Yehowa hɛ mi nyami ɔ ngɛ kpɛe ngɛ o nɔ.” Bɔ nɛ a kɛ munyu nɛ ji “yo” ɔ tsu ní ha a tsɔɔ kaa e daa si ha Zion loo Yerusalem nɛ ji Yuda ma ngua nɛ ngɛ jamɛ a be ɔ mi ɔ. (Yes. 60:14; 62:​1, 2) Yerusalem daa si ha Israel ma a tsuo. Munyuhi nɛ Yesaya tu ɔ tle sane bimi enyɔ komɛ si: Kekleekle nɔ́ ɔ ji, mɛni be nɛ Yerusalem “te si” nɛ e kpɛ kaa la ngɛ okadi peemi mi, nɛ ngɛ mɛni blɔ nɔ? Enyɔne, anɛ munyuhi nɛ Yesaya tu ɔ ngɛ mi bae wawɛɛ ngɛ wa be nɛ ɔ mi lo?

Mɛni be nɛ Yerusalem “te si” nɛ e kpɛ kaa la ngɛ okadi peemi mi, nɛ ngɛ mɛni blɔ nɔ? A kpata Yerusalem ma a kɛ sɔlemi we ɔ hɛ mi, nɛ a nuu Yudabi ɔmɛ kɛ ho nyɔguɛ tso mi ya ngɛ Babilon jeha 70. Se benɛ Mediabi kɛ Persiabi ɔmɛ kpata Babilon hɛ mi ɔ, Israelbi tsuo nɛ a ngɛ Babilon Nɔ Yemi ɔ sisi ɔ kpale a se kɛ ba Yerusalem, nɛ a ba to anɔkuale jami sisi ekohu. (Ezra 1:​1-4) Jeha 537 loko a fɔ Kristo ɔ, anɔkualetsɛmɛ komɛ nɛ a je Israel wɛtso 12 ɔ mi tsuo kpale kɛ ho Yerusalem ya. (Yes. 60:4) A sã afɔlehi ha Yehowa, a ye gbijlɔhi, nɛ a ma sɔlemi we ɔ ekohu. (Ezra 3:​1-4, 7-11; 6:​16-22) Si kake ekohu ɔ, Yehowa hɛ mi nyami ɔ bɔni kpɛmi ekohu ngɛ Mawu we bi a nɔ ngɛ Yerusalem. Ngɛ blɔ ko nɔ ɔ, enɛ ɔ ha nɛ a ba pee la nɛ ngɛ kpɛe kɛ ha mahi nɛ a li Yehowa a.

Ngɛ anɔkuale mi ɔ, gbamihi nɛ Yesaya gba a fã ko pɛ lɛ ba mi ngɛ jamɛ a be ɔ mi. Israelbi fuu yi Mawu anɔkuale kɛ ya si nyagbe. (Neh. 13:27; Mal. 1:​6-8; 2:​13, 14; Mat. 15:​7-9) Pee se ɔ, a kua Yesu Kristo nɛ ji Mesia a hulɔ. (Mat. 27:​1, 2) A kpata Yerusalem ma a kɛ sɔlemi we ɔ hɛ mi ekohu ngɛ jeha 70 ɔ mi.

Enɛ ɔ ji nɔ́ ko nɛ Yehowa de kɛ fɔ si kaa e maa ba mi. (Dan. 9:​24-27) Ngɛ anɔkuale mi ɔ, pi Yehowa yi mi tomi ji kaa Yerusalem nɛ ngɛ zugba a nɔ ɔ nɛ ha nɛ gbamihi tsuo nɛ ngɛ Yesaya 60 nɛ ba mi ngɛ jamɛ a be ɔ.

Anɛ Yesaya munyu ɔmɛ ngɛ mi bae wawɛɛ ngɛ wa be nɛ ɔ mi lo? Ee, se e ngɛ mi bae ngɛ okadi peemi yo kpa ko nɛ ji “Yerusalɛm nɛ ngɛ hiɔwe ɔ” blɔ fa mi. Bɔfo Paulo ngma ngɛ Yerusalem nɛ ngɛ hiɔwe ɔ he ke: “Lɛ ji wa nyɛ.” (Gal. 4:26) Yerusalem nɛ ngɛ hiɔwe ɔ ji Mawu blɔ nya tomi ɔ fã nɛ ngɛ hiɔwe, nɛ nihi nɛ a ngɛ blɔ nya tomi nɛ ɔ mi ɔ ji mumi mi bɔ níhi nɛ a yeɔ lɛ anɔkuale. Yesu kɛ Kristofohi 144,000 nɛ a kɛ mumi ɔ pɔ mɛ nu ɔ piɛɛ Yerusalem nɛ ngɛ hiɔwe ɔ bimɛ ɔmɛ a he, nɛ a ngɛ hɛnɔkami kaa a maa ya hiɔwe kaa bɔ nɛ e ji ngɛ Paulo hu blɔ fã mi ɔ. Kristofohi nɛ a pɔ mɛ nu ɔ ba peeɔ “ma klɔuklɔu,” nɛ ji “Mawu Israel.”—1 Pet. 2:9; Gal. 6:16.

Kɛ Yerusalem nɛ ngɛ hiɔwe ɔ plɛ kɛ ‘te si nɛ e kpɛ kaa la’ ha kɛɛ? E pee jã kɛ gu e bimɛ nɛ a pɔ mɛ nu ngɛ zugba a nɔ ɔ nɔ. A nɔ hyɛmi nɔ́ ɔ ngɛ kaa gbami nɛ a gba kɛ fɔ si ngɛ Yesaya yi 60.

Benɛ hemi kɛ yemi kuali a he ba hiɛ ngɛ bɔfo ɔmɛ a gbenɔ se ɔ, e pee kaa nɔ́ nɛ Kristofo ɔmɛ ngɛ okadi peemi diblii mi. Enɛ he ɔ, e he ba hia nɛ Kristofohi nɛ a pɔ mɛ nu ɔ nɛ a “te si” kɛ je diblii nɛ ɔ mi. (Mat. 13:​37-43) Ngɛ jamɛ a be ɔ mi ɔ, lakpa jami nɛ ji Babilon Ngua a ngɔ mɛ nyɔguɛ. Nihi nɛ a pɔ mɛ nu ɔ ya nɔ nɛ a hi nyɔguɛ yemi sisi kɛ ya si benɛ “níhi a blɔ nya tomi ɔ nyagbe be ɔ” je sisi ngɛ jeha 1914 ɔ mi. (Mat. 13:​39, 40) Ngɛ jeha 1919 ɔ sisije ɔ, a ye a he kɛ je nyɔguɛ yemi mi. Oya nɔuu nɛ a bɔni kpɛmi kaa la ngɛ okadi peemi blɔ nɔ kɛ gu a he nɛ a kɛ wo  fiɛɛmi ní tsumi ɔ mi ɔ nɔ. a Jehahi babauu ji nɛ ɔ, nihi nɛ a je jemahi tsuo a mi, nɛ Mawu Israel nɛ a ji “matsɛmɛ” nɛ a wo a ta ngɛ Yesaya 60:3 ɔ hu piɛɛ he ɔ ba na la nɛ ɔ.—Kpoj. 5:​9, 10.

Ngɛ je ehe ɔ mi ɔ, Kristofohi nɛ a pɔ mɛ nu ɔ ma ha nɛ la a ma kpɛ kɛ ha nihi babauu ngɛ blɔ ngua nɔ. Mɛni blɔ nɔ a maa gu kɛ pee jã? Ke a ho hiɔwe ya a, a ma ya piɛɛ “Yerusalem Ehe ɔ” loo Kristo ayɛflo nɛ ji nimli 144,000 ɔ a kpɛti nihi nɛ a ngɛ hiɔwe ɔ a he kɛ ye nɔ kaa matsɛmɛ kɛ osɔfohi.—Kpoj. 14:1; 21:​1, 2, 24; 22:​3-5.

Yerusalem Ehe ɔ ma tsu ní tsumi ko nɛ e he hia wawɛɛ kɛ ha nɛ gbami nɛ ngɛ Yesaya 60:1 ɔ nɛ ba mi. (Ngɔɔ Yesaya 60:​1, 1, 3, 5, 11, 19, 20 ɔ kɛ to Kpo Jemi 21:​2, 9-11, 22-26 he.) Akɛnɛ Yerusalem ma a ji he nɛ matsɛmɛ ɔmɛ ye nɔ ngɛ ngɛ blema Israel he je ɔ, Yerusalem Ehe ɔ hu kɛ Kristo maa ye matsɛ ngɛ je ehe ɔ mi. Ngɛ mɛni blɔ nɔ nɛ Yerusalem Ehe ɔ ‘kple si kɛ je hiɔwe ngɛ Mawu ngɔ’? E pee jã kɛ gu e juɛmi nɛ e kɛ ma zugba a nɔ ɔ nɔ. Nihi nɛ a yeɔ Mawu gbeye ngɛ je ɔ mi tsuo ɔ maa “nyɛɛ ngɛ e la a nya.” Enɛ ɔ ma ha nɛ a maa ye a he ngɛ yayami kɛ gbenɔ he. (Kpoj. 21:​3, 4, 24) Nyagbe ɔ, “a maa pee níhi tsuo ehe” kaa bɔ nɛ Yesaya kɛ gbali kpa amɛ gba kɛ fɔ si ɔ. (Níts. 3:21) Tsakemi ngua nɛ ɔ je sisi benɛ Kristo bɔni matsɛ yemi ɔ, nɛ e maa ba nyagbe ngɛ e Jeha Akpe Nɔ Yemi ɔ nyagbe.