1, 2. (a) Mɛni Yehowa ha nɛ wa le? (b) Mɛni nɔ mi mami Yesaya 46:10, 11 kɛ 55:11 ɔ haa nɛ wa naa?

KE O je Baiblo ɔ kanemi sisi pɛ ɔ, o maa na munyu nɛ sisi numi yi se e mi kuɔ nɛ nyɛɛ se nɛ ɔ: ‘Sisije ɔ, Mawu bɔ hiɔwe kɛ zugba.’ (1 Mose 1:1) E ji anɔkuale kaa níhi nɛ Mawu bɔ ɔ fuu ngɛ nɛ wa li a he níhi fuu. Ní nɛ ɔmɛ ekomɛ ji oslami ɔ nɔ, kane, kɛ he wami nɛ gblaa níhi kɛ baa zugba. Níhi nɛ ngɛ je mluku ɔ mi ɔ a kpɛti bɔɔ pɛ nɛ wa le. (Fiɛlɔ 3:11, NW) Se kɛ̃ ɔ, Yehowa ha nɛ wa le yi mi nɛ e to ngɛ zugba a kɛ adesahi a he. Mawu to e yi mi kaa zugba a nɛ e pee adesahi nɛ e bɔ ngɛ e subai nɔ ɔ a we. (1 Mose 1:26) A maa pee Yehowa bimɛ, nɛ e maa pee a Tsɛ.

² Kaa bɔ nɛ Mose Kekleekle Womi ɔ yi etɛ ɔ tsɔɔ ɔ, nɔ ko te si kɛ wo Yehowa yi mi tomi ɔ. (1 Mose 3:1-7) Se Yehowa ma nyɛ ma tsu sane ɔ he ní. Nɔ ko be nyɛe maa tsi Yehowa nya. (Yes. 46:10, 11; 55:11) Enɛ ɔ he ɔ, wa ma nyɛ ma ná nɔ mi mami kaa Yehowa yi mi tomi kɛ ha adesahi kɛ zugba a maa ba mi ngɛ be nya!

3. (a) Mɛni ji sisije anɔkuale komɛ nɛ yeɔ bua wɔ konɛ waa nu sɛ gbi nɛ ngɛ Baiblo ɔ mi ɔ sisi? (b) Mɛni he je wa ngɛ tsɔɔmi nɛ ɔmɛ a he susue amlɔ nɛ ɔ? (d) Mɛni sane bimihi a he wa ma susu?

³ E be nyakpɛ kaa wa le Baiblo ɔ mi anɔkuale nɛ kɔɔ Mawu  yi mi tomi kɛ ha zugba a kɛ adesahi, kɛ níhi nɛ Yesu Kristo ngɛ tsue konɛ Mawu yi mi tomi ɔ nɛ ba mi ɔ a he. Ní nɛ ɔmɛ ji sisije níhi nɛ a he hia, nɛ a piɛɛ sisije anɔkualehi nɛ wa kaseɔ ke wa bɔni Mawu Munyu ɔ kasemi pɛ ɔ a he. Wɔ hu wa suɔ kaa wa maa ye bua tsui kpakpatsɛmɛ konɛ a le tsɔɔmihi nɛ a he hia nɛ ɔmɛ. Amlɔ nɛ ɔ nɛ wa ngɛ munyu nɛ ɔ kasee kaa asafo ɔ, wa ngɛ mɔde bɔe kaa wa maa fɔ nihi fuu nine kɛ ba Kristo gbenɔ Kaimi ɔ sisi. (Luka 22:19, 20) Nihi nɛ a maa ba a maa kase Mawu yi mi tomi ɔ he níhi fuu. Enɛ ɔ he ɔ, e da blɔ kaa ngɛ ligbi bɔɔ nɛ piɛ loko wa maa ye Kaimi nɛ ɔ mi ɔ, wa ma susu sane bimi pɔtɛɛ komɛ nɛ wa ma nyɛ maa ngɔ kɛ tle wa Baiblo kaseli kɛ tsui kpakpatsɛmɛ a bua jɔmi si kɛ ha gbijlɔ klɛdɛɛ nɛ ɔ he. Wa ma susu sane bimi etɛ komɛ a he: Mɛni ji yi mi tomi nɛ Mawu hɛɛ ngɛ zugba a kɛ adesahi a he kɛ je blema? Mɛni lɛ tɔ̃tɔ̃? Nɛ mɛni he je Yesu kpɔmi afɔle sami ɔ bli blɔ konɛ Mawu yi mi tomi ɔ nɛ ba mi ɔ?

4. Mɛni blɔ nɔ nɛ adebɔ woɔ Yehowa hɛ mi nyami ngɛ?

⁴ Yehowa ji Bɔlɔ nɛ e he ngɛ nyakpɛ wawɛɛ. Nɔ́ fɛɛ nɔ́ ko nɛ e bɔ ɔ, ngɛ kaa bɔ nɛ e suɔ nɛ e hi ɔ. (1 Mose 1:31; Yer. 10:12) Mɛni wa ma nyɛ maa kase ngɛ bɔ nɛ Mawu to adebɔ níhi a he blɔ nya nɛ a ngɛ fɛu ɔ he? Ke wa ngɛ adebɔ he susue ɔ, wa naa kaa Yehowa nine nya ní tsumi tsuo tsuɔ yi mi tomi ko he ní, nyafii jio, ngua jio, nɛ enɛ ɔ haa nɛ wa bua jɔɔ. Mɛnɔ ma nyɛ ma de kaa wami yiblii nɛ ngɛ adesahi a mi, kɛ bɔ nɛ bimwɔyo ngɛ ha a pee we lɛ nyakpɛ, aloo bɔ nɛ pu ɔ nɔɔ si ha a pee we lɛ fɛu? Wa bua jɔɔ adebɔ ní nɛ ɔmɛ a he, ejakaa wa ngɛ he numi ko ngɛ wa mi nɛ haa nɛ ke wa na nɔ́ nɛ ngɛ fɛu ɔ wa leɔ.—Kane La 19:1; 104:24.

5. Mɛni blɔ nya Yehowa to konɛ adebɔ níhi tsuo nɛ a pee kake kɛ tsu ní?

⁵ Kaa bɔ nɛ wa naa ngɛ adebɔ mi ɔ, Yehowa je suɔmi mi nɛ e to huzu ha e bɔ níhi tsuo. E wo adebɔ he mlaahi kɛ je mi bami he mlaahi konɛ níhi tsuo nɛ a pee kake kɛ tsu ní saminya. (La 19:7-9) Enɛ ɔ he ɔ, nɔ́ tsuaa nɔ́ nɛ ngɛ je mluku ɔ mi ɔ, yi mi tomi ko he je nɛ Mawu pee, nɛ a ngɛ nɔ́ nɛ a tsuɔ konɛ e yi mi tomi ɔ nɛ ba mi. Yehowa tsɔɔ bɔ nɛ e sa nɛ adebɔ níhi nɛ pee kake kɛ tsu ní ha. Kaa nɔ hyɛmi nɔ́ ɔ, Adebɔ he mlaa ko tsɔɔ kaa ke a fɔ nɔ́ ko kɛ ya hiɔwe ɔ, e ma ba nɔ zugba. Mlaa nɛ ɔ lɛ hɛɛ kɔɔhiɔ nɛ poɔ wa he piɛ ngɛ zugba a nɔ ɔ, e kudɔɔ wo ɔ kɛ bɔ nɛ wo ɔ fiaa ha a, nɛ e yeɔ bua nɛ níhi nɛ wami ngɛ a mi ɔ yaa nɔ nɛ a hii wami mi ngɛ zugba a nɔ. Adebɔ níhi tsuo nɛ adesahi piɛɛ he ɔ yaa nɛ a baa, nɛ a tsuɔ ní pɛpɛɛpɛ. A bi a huzu ɔmɛ a he. E ngɛ heii kaa bɔ nɛ a to adebɔ níhi a he blɔ nya a yeɔ odase kaa Mawu ngɛ yi mi tomi ko kɛ ha zugba a kɛ adesahi. Ke wa ngɛ fiɛɛe ɔ, anɛ wa ma nyɛ maa gbla nihi a juɛmi kɛ ya Nɔ nɛ to ní nɛ ɔmɛ a he blɔ nya saminya a nɔ lo?—Kpoj. 4:11.

6, 7. Mɛni nike ní komɛ nɛ Yehowa ha Adam kɛ Hawa?

⁶ Kɛ je blema a, Yehowa yi mi tomi ji kaa adesahi nɛ a hi si ngɛ zugba a nɔ kɛ ya neneene. (1 Mose 1:28; La 37:29) E je e tsui mi faa nɛ e ha Adam kɛ Hawa nike ní slɔɔtoslɔɔtohi konɛ a bua nɛ jɔ ngɛ si himi mi. (Kane Yakobo 1:17.) Yehowa ha mɛ juɛmi, kɛ he blɔ nɛ a kɛ peeɔ nɔ́ nɛ nɔ suɔ, nɛ e bɔ mɛ konɛ a nyɛ nɛ a je suɔmi kpo, nɛ a bɔ huɛ. Bɔlɔ ɔ kɛ Adam tu munyu, nɛ e tsɔɔ Adam bɔ nɛ e ma plɛ kɛ bu lɛ Mawu ɔ tue ha. E tsɔɔ Adam bɔ nɛ e ma plɛ kɛ hyɛ e he, lohwe ɔmɛ, kɛ  zugba a nɔ ha. (1 Mose 2:15-17, 19, 20) Jehanɛ hu ɔ, Yehowa bɔ Adam kɛ Hawa konɛ a lilɛ nɛ le nɔ́ nɛ ngɔ, a nu nɔ́ he, a hɛngmɛ nɛ hyɛ nɔ́, a tue nɛ nu nɔ́, nɛ a gugwɔ nɛ nu nɔ́ he via. Enɛ ɔ he ɔ, a ma nyɛ maa na níhi fuu nɛ ngɛ a we nɛ ji Paradeiso ɔ mi ɔ, kɛ bɔ nɛ a ngɛ fɛu ha. Ngɛ Adam kɛ Hawa a blɔ fa mi ɔ, jinɛ a ma nyɛ ma tsu ní kɛ bua jɔmi, nɛ a kpa níhi a si kɛ ya daa.

⁷ Mɛni hu lɛ piɛɛ Mawu yi mi tomi ɔ he? Yehowa bɔ Adam kɛ Hawa kaa a nyɛ nɛ a fɔ bimɛ nɛ a ye mluku. Mawu yi mi tomi ji kaa a bimɛ ɔmɛ hu nɛ a fɔ kɛ ya si be nɛ zugba a tsuo nɔ ma hyi tɔ kɛ adesahi. Yehowa suɔ kaa Adam kɛ Hawa kɛ fɔli tsuo nɛ a suɔ a bimɛ kaa bɔ nɛ lɛ Yehowa hu e suɔ Adam kɛ Hawa a. Jinɛ zugba a kɛ níhi nɛ ngɛ nɔ ɔ tsuo maa pee a nɔ́ kɛ ya neneene.—La 115:16.

8. Mlaa nɛ ngɛ 1 Mose 2:16, 17 ɔ tsu mɛni yi mi tomi he ní?

⁸ Níhi yɛ nɔ amlɔ nɔuu kaa bɔ nɛ Mawu to e yi mi ɔ. Mɛni lɛ tɔ̃tɔ̃? Yehowa ha Adam kɛ Hawa he yemi, se huzu ngɛ he, enɛ ɔ he ɔ, e wo mɛ mlaa ko nɛ e nɔ yemi yi konɛ a ko be huzu nɛ ɔ he. E de ke: “Tso ɔmɛ nɛ ngɛ ngmɔ ɔ mi ɔ, o ma nyɛ maa ye eko tsuaa eko yiblii faa, ja tso ɔ nɛ haa nɔ leɔ kpakpa kɛ yayami ɔ pɛ. Koo ye jamɛ a tso ɔ yiblii; ligbi nɛ o maa ye eko ɔ, o ma gbo.” (1 Mose 2:16, 17) E he wɛ ha Adam kɛ Hawa kaa a maa nu mlaa nɛ ɔ sisi nɛ a ye nɔ, ejakaa niye ní fuu ngɛ nɛ a be nyɛe maa ye po.

9, 10. (a) Kɛ Satan po Yehowa nya ha kɛɛ? (b) Mɛni yi mi kpɔ nɛ Adam kɛ Hawa mwɔ? (Moo hyɛ foni nɛ ngɛ ní kasemi ɔ sisije ɔ.)

⁹ Satan Abosiami gu sinɔ ɔ nɔ kɛ sisi Hawa nɛ e gbo e Tsɛ nɛ ji Yehowa a nɔ tue. (Kane 1 Mose 3:1-5; Kpoj. 12:9) Satan ha nɛ adesahi nɛ a ji Mawu bimɛ ɔ susu kaa Mawu sume nɛ a ye ‘tso ɔmɛ nɛ ngɛ ngmɔ ɔ nɔ ɔ ekoeko nɔ yiblii.’ E ngɛ kaa nɔ́ nɛ Satan ngɛ mɛ bie ke: ‘Anɛ nyɛ ngɛ tsɔɔe kaa nyɛ be nyɛe maa pee nɔ́ nɛ nyɛ nitsɛmɛ nyɛ suɔ lo?’ Lɔ ɔ se ɔ, e ye lakpa ngua ko. E de ke: “Oo, nyɛ be gboe!” Kɛkɛ nɛ e bɔ mɔde kaa e maa plɛ Hawa yi mi konɛ e ko bu Mawu tue. E de ke: ‘Mawu le kaa ke nyɛ ye jamɛ a tso ɔ yiblii ɔ, nyɛ hɛngmɛ ma bli.’ Satan tsɔɔ kaa Yehowa sume nɛ Adam kɛ Hawa nɛ a ye tso yiblii ɔ, ejakaa jã peemi ma ha nɛ a le ní. Lɔ ɔ se ɔ, Satan ye mɛ lakpa ke: “Nyɛ maa hi kaa Mawu ɔ nitsɛ; nyɛ maa le kpakpa kɛ yayami.”

¹⁰ Amlɔ nɛ ɔ, e he ba hia nɛ Adam kɛ Hawa nɛ a mwɔ a yi mi kpɔ ngɛ nɔ́ nɛ a maa pee ɔ he. Anɛ a maa bu Yehowa tue, aloo a maa bu sinɔ ɔ tue? A mwɔ a yi mi kpɔ kaa a ma gbo Mawu nɔ tue. Jã nɛ a pee ɔ ha nɛ a kɛ Satan pee kake kɛ tsɔ atua kɛ si Mawu. A kua Yehowa kaa a Tsɛ, nɛ a je a he kɛ je e nɔ yemi nɛ poɔ a he piɛ ɔ sisi.—1 Mose 3:6-13.

11. Mɛni he je Yehowa sume atua tsɔmi ɔ?

¹¹ Adam kɛ Hawa tsɔ atua kɛ si Yehowa, enɛ ɔ he ɔ, a yi mluku hu. Jehanɛ hu ɔ, atua nɛ a tsɔ kɛ si Yehowa a ha nɛ a kɛ lɛ a kpɛti kɛ, ejakaa e ‘hɛngmɛ ngɛ klɔuklɔu, nɛ e hyɛ we nɔ́ yayami.’ Enɛ ɔ he ɔ, e be ‘yiwutsotsɛmɛ hyɛe nɛ e be nɔ́ ko dee.’ (Hab. 1:13) Kaa Yehowa bua jɔ yayami peemi he ɔ, jinɛ adebɔ níhi tsuo nɛ a hɛ ngɛ nɛ a ngɛ hiɔwe kɛ zugba a nɔ ɔ a wami maa je oslaa mi. Nɔ́ nɛ pe kulaa a, kaa Yehowa pee we nɔ́ ko ngɛ yayami nɛ a pee ngɛ Eden abɔɔ ɔ mi ɔ he ɔ, jinɛ e he maa wa kaa nɔ ko ma ná hɛ kɛ nɔ fɔmi ngɛ e mi. Se Yehowa yeɔ anɔkuale, nɛ e kɛ e sisi tomi mlaahi tsuɔ ní be tsuaa be. (La 119:142) Enɛ ɔ he ɔ, he blɔ  nɛ Adam kɛ Hawa ngɛ kaa a peeɔ nɔ́ nɛ a suɔ ɔ tsɔɔ we kaa e sa nɛ a gbo Mawu mlaa a nɔ tue. Akɛnɛ a tsɔ atua kɛ si Yehowa he je ɔ, a gbo nɛ a kpale kɛ ya zu mi ekohu, ejakaa zu a kɛ bɔ mɛ.—1 Mose 3:19.

12. Mɛni ba Adam sisi bimɛ a nɔ?

¹² Tso yiblii ɔ nɛ Adam kɛ Hawa ye ɔ ha nɛ he blɔ nɛ a ngɛ kaa a piɛɛ Mawu weku ɔ he ɔ je a dɛ. Mawu fiee mɛ kɛ je Eden abɔɔ ɔ mi, nɛ a be nyɛe nɛ a kpale a se hu. (1 Mose 3:23, 24) Yehowa yeɔ dami sane, enɛ ɔ he ɔ, e ha nɛ a na a tue gbomi ɔ mi nɔ́. (Kane 5 Mose 32:4, 5.) Akɛnɛ adesahi yi mluku hu he je ɔ, a nyɛ we nɛ a jeɔ Mawu su kpakpa amɛ kpo saminya. Pi Adam pɛ nɛ si himi kpakpa nɛ ɔ bɔ, se e ha nɛ e sisi bimɛ yi mluku, a peeɔ yayami, nɛ a gboɔ. (Rom. 5:12) E ha nɛ e nina nyɛ we nɛ a hi si kɛ ya neneene. Jehanɛ hu ɔ, Adam kɛ Hawa be nyɛe nɛ a fɔ bi ko nɛ ye mluku, nɛ a bimɛ ɔmɛ hu be nyɛe nɛ a pee jã. Satan Abosiami gbla Adam kɛ Hawa kɛ je Yehowa he, nɛ e ngɛ adesahi tsuo sisie kɛ ba si piɔ.—Yoh. 8:44.

13. Mɛni Yehowa suɔ nɛ adesahi nɛ a ná?

¹³ Suɔmi nɛ Mawu ngɛ kɛ ha adesahi ɔ ngɛ daa. E ngɛ mi kaa Adam kɛ Hawa tsɔ atua mohu lɛɛ, se Yehowa suɔ nɛ huɛ bɔmi kpakpa nɛ hi e kɛ adesahi a kpɛti. E sume nɛ nɔ ko nɛ gbo. (2 Pet. 3:9) Lɔ ɔ he ɔ, benɛ a tsɔ atua a nɔuu pɛ nɛ Mawu to blɔ nya konɛ e kɛ dla e kɛ adesahi a kpɛti. Se Yehowa ma we e hɛ ngɔ fɔ e sisi tomi mlaahi nɛ da a nɔ. Mɛni blɔ nɔ Yehowa gu kɛ pee jã?

14. (a) Kaa bɔ nɛ Yohane 3:16 tsɔɔ ɔ, mɛni blɔ nya Mawu to konɛ e kɛ dla e kɛ adesahi a kpɛti? (b) Mɛni sane bimi waa kɛ tsui kpakpatsɛmɛ ma nya maa susu he?

¹⁴ Kane Yohane 3:16. Eko ɔ, nihi nɛ wa fɔɔ mɛ nine kɛ baa Kaimi ɔ a kpɛti ni komɛ le ngmami nɛ ɔ saminya. Se sane bimi ɔ ji, Ngɛ mɛni blɔ nɔ nɛ Yesu afɔle sami ɔ ma ha nɛ wa ná neneene wami? Kaimi ɔ he nine fɔmi, Kaimi ɔ nitsɛ, kɛ slaami nɛ wa kpaleɔ ya slaa nihi nɛ a ba Kaimi ɔ haa nɛ wa náa he blɔ kɛ yeɔ bua tsui kpakpatsɛmɛ nɛ a suɔ anɔkuale ɔ konɛ a le sane bimi nɛ he hia nɛ ɔ heto. Tsui kpakpatsɛmɛ nɛ ɔmɛ a bua jɔɔ wawɛɛ ke a ba ná le bɔ nɛ kpɔmi nɔ́ ɔ nɛ Yehowa to he blɔ nya a tsɔɔ kaa e ngɛ suɔmi kɛ nile. Mɛni sanehi nɛ a he hia nɛ kɔɔ kpɔmi nɔ́ ɔ he nɛ waa kɛ nihi ma nyɛ ma susu he?

15. Ngɛ mɛni blɔ nɔ nɛ Yesu je kpa ngɛ Adam he?

¹⁵ Yehowa je adesa ko nɛ e ye mluku kɛ ha konɛ e ngɔ e wami kɛ ha kaa kpɔmi nɔ́. E he ba hia nɛ adesa nɛ ɔ nɛ e ye Yehowa anɔkuale, nɛ e je e tsui mi nɛ e kɛ e wami nɛ fɔ si ha adesahi. (Rom. 5:17-19) Yehowa ha nɛ e nibɔ níhi a kpɛti tɛte nɛ ngɛ hiɔwe ɔ ba zugba a nɔ kaa adesa. (Yoh. 1:14) Lɔ ɔ he ɔ, Yesu ba pee adesa nɛ ye mluku kaa bɔ nɛ jinɛ Adam hu ye mluku ɔ. Se Yesu lɛɛ e pee we e ní kaa Adam, e ba e jemi kaa bɔ nɛ Yehowa suɔ kaa adesa nɛ ye mluku nɛ ba e je mi ɔ. Ngɛ kahi nɛ a mi wa nɛ Yesu kɛ kpe ɔ tsuo se ɔ, e pee we yayami ko gblee, nɛ e tɔ̃ we Mawu mlaa a eko nɔ hulɔ.

16. Mɛni he je kpɔmi nɔ́ ɔ ji nike ní nɛ se be ɔ?

¹⁶ Yesu ji adesa nɛ e ye mluku, enɛ ɔ he ɔ, e ma nyɛ ma gbo kɛ ha adesahi konɛ e kɛ kpɔ̃ mɛ kɛ je yayami kɛ gbenɔ dɛ mi. Kaa adesa nɛ ye mluku ɔ, Yesu ye Mawu anɔkuale, nɛ e bu lɛ tue kɛ tsɔɔ bɔ nɛ jinɛ e sa kaa Adam ko pee e ni ɔ pɛpɛɛpɛ. (1 Tim. 2:6) Yesu ngɔ e wami kɛ ha kaa kpɔmi nɔ́, nɛ e kɛ bli blɔ konɛ “nihi babauu” nɛ ji nyumuhi, yihi, kɛ jokuɛwi nɛ a ná wami nɛ be nyagbe. (Mat. 20:28) Niinɛ, kpɔmi  nɔ́ ɔ bli blɔ konɛ Mawu yi mi tomi ɔ nɛ ba mi. (2 Kor. 1:19, 20) Kpɔmi nɔ́ ɔ haa nɛ adesahi nɛ a yeɔ anɔkuale ɔ náa hɛ nɔ kami kaa a maa hi si kɛ ya neneene.

17. Mɛni he blɔ nɛ kpɔmi nɔ́ ɔ ha nɛ wa ná?

¹⁷ Yehowa naa kpɔmi nɔ́ ɔ nɛ e ngɔ kɛ ha ngɛ wa he ɔ kaa nɔ́ agbo ko nɛ bɔ lɛ. (1 Pet. 1:19) E suɔ adesahi hluu kaa e ha nɛ e Bi kake ɔ ba gbo ngɛ a he. (1 Yoh. 4:9, 10) Lɔ ɔ he ɔ, Yesu mohu ba pee wa tsɛ se pi Adam. (1 Kor. 15:45) Yesu ha nɛ wa ná he blɔ kaa wa maa hi si kɛ ya neneene, se pi lɔ ɔ kɛkɛ, nyagbenyagbe ɔ, wa ma nyɛ maa kpale kɛ ba Mawu weku ɔ mi ekohu. Niinɛ, kɛ gu Yesu afɔle sami ɔ nɔ ɔ, Yehowa ma nyɛ ma he wɔ atuu kɛ ba e weku ɔ mi nɛ e be e mlaa amɛ a nɔ tɔ̃e. Anɛ o bua jɔɛ kaa be ko maa ba nɛ adesahi nɛ a yeɔ anɔkuale ɔ maa ye mluku ekohu lo? Kake peemi maa hi Mawu weku nɛ ngɛ hiɔwe kɛ nɔ́ nɛ ngɛ zugba a nɔ ɔ a kpɛti wawɛɛ. Enɛ ɔ tsɔɔ kaa wɔ tsuo wa maa pee Mawu bimɛ.—Rom. 8:21.

18. Mɛni be nɛ Yehowa ‘maa ye níhi tsuo a nɔ’?

¹⁸ Atua nɛ Satan tsɔ kɛ si Yehowa a tsi we Yehowa nya ngɛ suɔmi nɛ e ma je kpo kɛ tsɔɔ adesahi ɔ he, nɛ e be nyɛe nɛ e ha nɛ adesahi nɛ a yi mluku ɔ nɛ a kpa Yehowa anɔkuale yemi. Kɛ gu kpɔmi nɔ́ ɔ nɔ ɔ, Yehowa maa ye bua e bimɛ ɔmɛ tsuo konɛ a pee dali kɛ pi si. Mo susu he nɛ o hyɛ bɔ nɛ si himi ɔ maa pee ha ke ji nihi tsuo nɛ a ‘le Bi ɔ mi tso, nɛ a he lɛ ye’ ɔ ná neneene wami ɔ. (Yoh. 6:40) Akɛnɛ Yehowa ngɛ suɔmi kɛ nile he je ɔ, e ma ha nɛ adesa weku ɔ tsuo nɛ ye mluku kaa bɔ nɛ e to e yi mi kɛ je blema a. Kɛkɛ ɔ, Yehowa nɛ ji wa Tsɛ ɔ, ‘maa ye níhi tsuo a nɔ.’—1 Kor. 15:28.

19. (a) Ke wa bua jɔ kpɔmi nɔ́ ɔ he ɔ, mɛni wa maa pee? (Hyɛ daka nɛ ji “ Nyɛ Ha Nɛ Waa Ya Nɔ Nɛ Wa Hla Nihi Nɛ Sa” a.) (b) Ngɛ munyu nɛ nyɛɛ se ɔ mi ɔ, mɛni ji nɔ́ kpa ko hu nɛ kpɔmi nɔ́ ɔ tsu he ní nɛ wa ma susu he?

¹⁹ E sa nɛ bua jɔmi nɛ wa ngɛ ngɛ kpɔmi nɔ́ ɔ he ɔ nɛ wo wɔ he wami nɛ waa pee nɔ́ tsuaa nɔ́ nɛ wa ma nyɛ, konɛ waa ye bua nihi nɛ a na kaa a ma nyɛ ma ná nike ní nɛ he jua wa nɛ ɔ he se. E sa nɛ nihi nɛ́ a le kaa Yehowa je e suɔmi mi nɛ e ha wɔ kpɔmi nɔ́ ɔ konɛ kɛ gu lɔ ɔ nɔ ɔ, adesahi tsuo nɛ a ná hɛ nɔ kami kaa a maa hi si kɛ ya neneene. Se kpɔmi nɔ́ ɔ tsu níhi fuu po pe jã. Munyu nɛ nyɛɛ se ɔ maa ye bua wɔ konɛ waa na bɔ nɛ kpɔmi nɔ́ ɔ tsu anɔkuale yemi he sane ko nɛ Satan tle lɛ si ngɛ Eden abɔɔ mi ɔ he ní ha.