NOVEMBER 1932 ɔ mi nɛ a ngɔ kekleekle traffic light kɛ ba Mexico City. Nihi nɛ a ngɛ ma a mi ɔ hiɛ pe ayɔ kake, nɛ a be deka kulaa. Se otsi kake se pɛ ɔ, pi nɔ ko kɔmɔ ji traffic light ɔ hu. Oposide ní tsuli nɛ a ngɛ ma a mi ɔ ngɔ a juɛmi kɛ ma nɔ́ nɛ maa ya nɔ ngɛ otsi nɛ ɔ mi ɔ nɔ. A pee a foni sami klama amɛ klaalo, nɛ a daa si ngɛ tlee tesia ngɛ nubwɔ klɛdɛɛ ko blɔ hyɛe. Nubwɔ nɛ ɔ ji Joseph F. Rutherford nɛ jamɛ a be ɔ e ji Watch Tower Society ɔ hɛ mi nyɛɛlɔ ɔ. Odasefohi nɛ a ngɛ ma a mi ɔ hu ba bua a he nya, nɛ a kɛ bua jɔmi ngɛ Nyɛminyumu Rutherford blɔ hyɛe konɛ a nya e he. E ma ligbi etɛ kpe ngua ko nɛ a maa pee ngɛ ma a mi ɔ eko.

The Golden Age ɔ de ke: “Atsinyɛ jemi ko be he kaa kpe ngua nɛ ɔ maa pee he nya buami ko nɛ sa kadimi wawɛɛ ngɛ wa yi nɔ sanehi a mi nɛ kɔɔ Anɔkuale ɔ nɛ a maa gbɛ fia ngɛ Mexico ma a mi ɔ he.” Se mɛni ha nɛ kpe nɛ nihi maa pee 150 pɛ nɛ a ya a sa kadimi wawɛɛ ɔ?

Loko a maa pee kpe nɛ ɔ, nyɛmimɛ nɛ a ngɛ Mexico ɔ a he pi. Kɛ je jeha 1919 kɛ ma a, a peeɔ kpɔ mi kpe tsɔwitsɔwihi, se asafohi abɔ nɛ ngɛ ma a mi ɔ a nɔ bɔni gbɔmi ngɛ jehahi nɛ nyɛɛ se ɔmɛ a mi. Benɛ a bli asafo ɔ ní tsumi kɔni ngɛ Mexico City ngɛ jeha 1929 ɔ mi ɔ, e ngɛ kaa nɔ́ nɛ níhi maa ya nɔ saminya, se loloolo ɔ, nyagba komɛ ngɛ nɛ e sa kaa a tsu he ní. Benɛ asafo ɔ kɛ blɔ tsɔɔmi ha kaa blɔ gbali nɛ a ko ngɔ mɛ nitsɛmɛ a ní tsumi kɛ tsaka fiɛɛmi ní tsumi ɔ, blɔ gbalɔ ko mi mi fu nɛ e je asafo ɔ mi, nɛ e ya tsɔ lɛ nitsɛ e Baiblo kasemi kuu. Ngɛ jamɛ a be ɔ mi nɔuu ɔ, nɔ nɛ hyɛɛ asafo ɔ ní tsumi kɔni ɔ nɔ ɔ tɔ̃ tɔmi ko, nɛ e he ba hia nɛ a ngɔ nɔ kpa kɛ da e nane mi. E he ba hia nɛ a wo Odasefohi anɔkualetsɛmɛ nɛ a ngɛ Mexico ɔ he wami wawɛɛ.

Benɛ Nyɛminyumu Rutherford ya slaa anɔkualetsɛmɛ nɛ ɔmɛ ɔ, e wo mɛ he wami wawɛɛ kɛ gu he wami womi munyu enyɔ nɛ e tu ngɛ kpe ɔ sisi, kɛ hleedio nɔ munyu enuɔ nɛ e tu ɔ nɔ. Enɛ ɔ ji kekleekle be nɛ nyɛmimɛ nɛ a ngɛ Mexico ɔ gu hleedio nɔ kɛ fiɛɛ sane kpakpa a ngɛ ma a mi tsuo. Benɛ kpe ɔ ba nyagbe ɔ, a hla nɔ kpa nɛ maa hyɛ asafo ɔ ní tsumi kɔni ɔ nɔ konɛ e to níhi a he blɔ nya saminya. Odasefo ɔmɛ pee kã, nɛ Yehowa ye bua mɛ nɛ a ya nɔ nɛ a fiɛɛ sane kpakpa a.

Ngɛ jeha nɛ nyɛɛ se ɔ mi ɔ, a pee kpe enyɔ ngɛ ma a mi, a pee kake ngɛ Veracruz, nɛ a pee kake hu ngɛ Mexico City. Nyɛmimɛ ɔmɛ kɛ kã fiɛɛ ngɛ zugba kpɔ ɔ mi, nɛ e wo yiblii saminya. Ngɛ jeha 1931 ɔ mi ɔ, a ngɛ fiɛɛli 82. Jeha nyɔngma se ɔ, yibɔ nɛ ɔ bɔ he totoe nyɔngma! Nihi maa pee 1,000 nɛ a ya jeha 1941 Teokrase Kpe nɛ a pee ngɛ Mexico City ɔ.

Ngɛ jeha 1943 ɔ mi ɔ, Odasefo ɔmɛ ngɔ sleetihi nɛ a ngma ní ngɛ nɔ kɛ fia “Free Nation’s” Theocratic Assembly (Mahi Nɛ A Ye A He Teokrase Kpe) nɛ a pee ngɛ mahi kakaaka 12 a nɔ ngɛ Mexico ɔ he  gɔgɔ. * A ngɔɔ womi nguahi enyɔ nɛ a ngma nɔ ní kɛ kplaa a hɛ mi kɛ a se. Odasefo ɔmɛ gu blɔ nɛ ɔ nɔ kɛ fia sane kpakpa a he adafi kɛ je jeha 1936 mi.

Benɛ womi tɛtlɛɛ nɛ a tsɛɛ ke La Nación ɔ ngɛ bɔ nɛ sleeti nɛ a kɛ fia adafi ngɛ Mexico ɔ ye manye ha a he munyu tue ɔ, e de ke: ‘Kekle ligbi nɛ a pee kpe ɔ, a wo Odasefo ɔmɛ he wami kaa a fɔ nihi fuu nine. Ligbi enyɔne ɔ, nihi babauu ba, nɛ kpe he ɔ kpi mɛ.’ E ngɛ mi kaa Katoliki Sɔlemi ɔ bua jɔɛ, nɛ a te si kɛ wo nyɛmimɛ ɔmɛ mohu lɛɛ, se nyɛmimɛ ɔmɛ ya nɔ nɛ a kɛ kã fiɛɛ ngɛ gbejegbɛ ɔmɛ a he. La Nación ɔ kpale de ke: ‘Ma a tsuo na mɛ. Nyumuhi kɛ yihi nɛ a plɛ pee “sleetihi nɛ a ngma nɔ ní.”’ A tɛni nyɛmimɛ ɔmɛ nɛ a ngɛ fiɛɛe ngɛ gbejegbɛ ɔmɛ a he ngɛ Mexico ɔ a foni. A ngma ngɛ foni ɔ sisi ke: “A hyi gbejegbɛ ɔmɛ a nɔ tɔ.”

Ngɛ jamɛ a jeha amɛ a mi ɔ, e he ba hia nɛ Odasefohi fuu nɛ a ngɔ níhi kɛ sã afɔle loko a ma nyɛ maa ya kpehi bɔɔ nɛ a pee ngɛ Mexico ɔ. Nihi fuu jeɔ kɔpehi nɛ a ngɛ tsitsaa kɛ baa. A jeɔ hehi nɛ tlee loo lɔle nyɛ we yami po. Asafo ko de ke, “Tlee blɔ po be he nɛ wa ngɛ ɔ.” Enɛ ɔ he ɔ, e biɔ nɛ nihi nɛ a ma kpe ɔ nɛ a hi teji okpɔngɔhi a nɔ aloo a nyɛɛ ligbihi fuu loko a ma nyɛ ma ya wo tlee nɛ e kɛ mɛ ma ya su kpe he ɔ.

Odasefo ɔmɛ a kpɛti nihi fuu ji ohiatsɛmɛ, nɛ e he waa haa mɛ kaa a ma ná sika nɛ a kɛ ma wo tlee kɛ ya kpe ɔ. Ke a ya su lejɛ ɔ, a kpɛti nihi fuu ya toɔ si ngɛ nyɛmimɛ nɛ a ngɛ lejɛ ɔ a ngɔ. Nyɛmimɛ nɛ ɔmɛ jeɔ a suɔmi mi kɛ peeɔ mɛ nibwɔ. Ni komɛ hu ya toɔ si ngɛ Matsɛ Yemi Asahi a nɔ. Be ko ɔ, nihi maa pee 90 ya to asafo ɔ ní tsumi kɔni nɛ ngɛ lejɛ ɔ. A “to dakahi nɛ womi ngɛ mi nyingmi enyɔɔnyɔ ha mɛ kaa sa konɛ a hwɔ nɔ.” Yearbook ɔ tsɔɔ bɔ nɛ nyɛmimɛ nɛ a ya to lejɛ ɔ bua jɔ a sa a he ha. E de ke: “Sahi nɛ a nɔ ngɛ bɔdɔɔ, nɛ a mi ngɛ kulɔkulɔ pe zugba nɛ a wo lɛ simiti.”

Odasefo nɛ ɔmɛ tsɔɔ kaa a bua jɔ kaa a ngɔ a níhi kɛ sã afɔle konɛ a nyɛ nɛ a ya Kristofohi a kpe nɛ ɔmɛ, ejakaa a ná he se wawɛɛ. Mwɔnɛ ɔ, fiɛɛli nɛ e piɛ bɔɔ nɛ a yibɔ maa su ayɔ kake nɛ a ngɛ Mexico ɔ tsɔɔ kaa a bua jɔ níhi a he jã nɔuu. * Jeha 1949 amaniɛbɔ nɛ je asafo ɔ ní tsumi kɔni nɛ ngɛ Mexico ɔ de ke: “Nyagbahi nɛ a kɛ kpe ɔ ha we nɛ kã nɛ a ngɛ kɛ ha Teokrase ní tsumi ɔ nɛ ba si, ejakaa kpe fɛɛ kpe nɛ a maa pee ɔ, lɔ ɔ he ní sɔuu lɛ a hii sɛɛe be kɛkɛɛ, nɛ sane nɛ a pɔɔ a he bimi ji, Mɛni be wa maa ya kpe ekohu?” Mwɔnɛ ɔ hu ɔ, jã nɔuu nɛ e ji.​—A je ngɛ wa yi nɔ sane womihi nɛ a ngɛ Central America a mi.