Ni komɛ nɛ a tui a tsui si kɛ kane ngmami nɛ ɔ bi sane nɛ ɔ. Se ngɛ kuku nɛ ɔmɛ a mi ɔ, a tu nihi e nyɔ nɛ a tsɛɛ mɛ ke Mefiboshet a he munyu. Nyɛ ha nɛ wa susu nɔ́ nɛ ya nɔ ɔ he, nɛ waa hyɛ nɔ́ nɛ wa ma nyɛ maa kase ngɛ mi.

Israel matsɛ Saul ngɛ binyumuhi kpaago kɛ biyihi enyɔ. Saul bitɛte ji Yonatan. Pee se ɔ, Saul kɛ e plã nɛ a tsɛɛ lɛ ke Rizpa a fɔ binyumu ko nɛ a tsɛɛ lɛ ke Mefiboshet. E ngɛ nyakpɛ kaa Yonatan hu ngɛ binyumu nɛ a tsɛɛ lɛ ke Mefiboshet. Lɔ ɔ Matsɛ Saul ngɛ bi nɛ a tsɛɛ lɛ Mefiboshet kɛ bibi nɛ a tsɛɛ lɛ Mefiboshet.

Be ko ɔ, Matsɛ Saul te si kɛ wo Gibeon bi nɛ a ngɛ Israel bi ɔmɛ a kpɛti ɔ nɛ e to kaa e ma kpata mɛ tsuo a hɛ mi. Ngɛ anɔkuale mi ɔ, Gibeon bi ɔmɛ a kpɛti nihi babauu gbo. Nɔ́ nɛ e pee ɔ hí kulaa. Mɛni he je? Ejakaa ngɛ Yoshua be ɔ mi ɔ, Israel nimeli ɔmɛ kɛ Gibeon bi ɔmɛ so tue mi jɔmi somi.​—Yosh. 9:3-27.

Jamɛ a somi ɔ ngɛ ní tsue loloolo ngɛ Matsɛ Saul be ɔ mi. Se Matsɛ Saul yi somi nɛ ɔ nɔ, mohu ɔ, e to kaa e ma kpata Gibeon bi ɔmɛ a hɛ mi. Nɔ́ nɛ Saul pee ɔ ha nɛ e “kɛ e we ɔ ye fɔ kaa a pue muɔ si.” (2 Sam. 21:1) Nyagbenyagbe ɔ, David ba pee Matsɛ. Gibeon bi nɛ a piɛ ɔ kɛ David tu munyu ngɛ yayami ngua nɛ Saul pee kɛ si mɛ ɔ he. David bi mɛ nɔ́ nɛ e pee ha mɛ konɛ e kɛ kpata mɛ ngɛ yi wu tso ní nɛ Saul pee kɛ si mɛ ɔ he konɛ Yehowa nɛ jɔɔ Israel zugba a. Gibeon bi ɔmɛ bi we sika, mohu ɔ, a bi konɛ a ha mɛ nyumu ɔ nɛ e ‘to kaa e ma kpata a hɛ mi’ ɔ e bimɛ kpaago nɛ a sɛu mɛ. David kplɛɛ a ní bimi ɔ nɔ.​—2 Sam. 21:2-6; 4 Mose 35:30, 31.

Jamɛ a be ɔ mi ɔ, Saul kɛ Yonatan gbo ngɛ ta mi momo, se Yonatan bi Mefiboshet ngɛ wami mi. Mefiboshet kɛ oslaa ko kpe ngɛ e jokuɛwi a si nɛ lɔ ɔ ha nɛ e pee glɔtsɛ (loo libɔɔ), nɛ e he be nɔ́ nɛ e nɛnɛ ɔ pee kɛ si Gibeon bi ɔmɛ ɔ mi. David kɛ Yonatan so, nɛ Yonatan sisi bimɛ nɛ e bi Mefiboshet hu piɛɛ he ɔ ma ná somi nɛ ɔ he se. (1 Sam. 18:1; 20:42) Ngmami ɔ de ke: “Matsɛ David mi mi sã lɛ ngɛ Mefiboshet Saul binyumu Yonatan binyumu ɔ he ngɛ kita nɛ David kɛ Yonatan nɛ ji Saul binyumu ɔ ka ngɛ Yehowa hɛ mi ɔ he.”​—2 Sam. 21:7, NW.

Se kɛ̃ ɔ, David ye si nɛ e wo Gibeon bi ɔmɛ ɔ nɔ. E ngɔ Saul binyumu enyɔ nɛ a tsɛɛ a kpɛti nɔ kake ke Mefiboshet kɛ Saul bibimɛ enuɔ kɛ ha mɛ. (2 Sam. 21:8, 9) Nɔ́ nɛ David pee ɔ ha nɛ Israel zugba a yi muɔ he fɔ hu.

Sane nɛ ɔ ji nɔ́ ko nɛ ya nɔ nitsɛnitsɛ. Mawu mlaa a de heii ke: “Á ko gbe bimɛ ngɛ a fɔli a tɔmihi a he.” (5 Mose 24:16) Kaa Saul bi enyɔ kɛ e bibi enuɔ a he be nɔ́ nɛ ya nɔ ɔ mi ɔ, jinɛ Yehowa ko kplɛɛ we nɔ́ nɛ David pee ɔ nɔ. Mlaa a kɛ piɛɛ he ke: “A gbe nɔ ngɛ lɛ nitsɛ e tɔmi he pɛ.” E ma nyɛ maa ba kaa Saul sisi bimɛ kpaago nɛ a gbo nɛ ɔ pee nɔ́ ko kɛ fĩ ga yaya nɛ Saul to kaa e maa kpata Gibeon bi ɔmɛ a hɛ mi ɔ se. Lɔ ɔ he ɔ, nimli kpaago nɛ ɔmɛ gbo ngɛ mɛ nitsɛmɛ a tɔmi ɔ he je.

Sane nɛ ɔ ha nɛ wa na kaa nɔ ko be nyɛe maa pee nɔ́ yayami nɛ e ma de ke e ngɛ blɔ tsɔɔmi se nyɛɛe kɛkɛ, lɔ ɔ he ɔ, e sɛ nɛ a pia lɛ ngɛ nɔ́ nɛ e pee ɔ he. Abɛ ko de ke: “Ke o maa pee nɔ́ ko ɔ, susu he saminya. Ja o pee jã loko o blɔhi maa da mo.”​—Abɛ 4:24-27; Efe. 5:15.