1. Loko o maa je Baiblo ɔ kasemi sisi ɔ, kɛ ji bɔ nɛ o baa o je mi ha kɛɛ?

 LOKO o kɛ Yehowa Odasefohi maa je Baiblo ɔ kasemi sisi ɔ, kɛ o baa o je mi ha kɛɛ? Wa kpɛti nihi fuu be suɔe kaa wa ma susu lɔ ɔ he. Jamɛ a be ɔ mi ɔ, eko ɔ, je ɔ susumi ngɛ nɔ́ nɛ da kɛ nɔ́ nɛ dɛ he ɔ ji nɔ́ nɛ kudɔɔ wa susumi. Ke jã a, lɛɛ jinɛ wa “be hɛ kɛ nɔ fɔmi ko, nɛ [wa] be Mawu ko ngɛ je ɔ mi.” (Efe. 2:12) Se benɛ wa bɔni Baiblo ɔ kasemi ɔ, wa tsake wa je mi bami kɛ wa ní peepee.

2. Benɛ o bɔni Baiblo ɔ kasemi ɔ, mɛni o yɔse?

² Benɛ o ba ngɛ Baiblo ɔ kasee ɔ, o ba na kaa o ngɛ Tsɛ ngɛ hiɔwe nɛ e suɔ o sane wawɛɛ nitsɛ. O kase kaa ke o suɔ nɛ o sa e hɛ mi nɛ o ba piɛɛ e weku ɔ he ɔ, e sa nɛ o pee tsakemi komɛ nɛ a he hia ngɛ o je mi bami kɛ o susumi mi. E sa nɛ o pee níhi nɛ Yehowa suɔ, nɛ o kpa níhi nɛ Yehowa sume ɔ peemi.​—Efe. 5:3-5.

3. Kaa bɔ nɛ Kolose Bi 3: 9, 10 tsɔɔ ɔ, mɛni nɛ Yehowa suɔ nɛ waa pee, nɛ mɛni he wa ma susu ngɛ ní kasemi nɛ ɔ mi?

³ Akɛnɛ Yehowa ji wa Bɔlɔ kɛ wa hiɔwe Tsɛ he je ɔ, e ngɛ he blɔ nɛ e tsɔɔ nihi nɛ a ngɛ e weku ɔ mi ɔ bɔ nɛ e sa nɛ a ba a je mi ha. E ngɛ blɔ hyɛe kaa loko a maa Baptisi wɔ ɔ, e sa nɛ wa “je su momo ɔ kɛ e ní peepee ɔmɛ ngɛ” wa he. * (Kane Kolose Bi 3:9, 10.) Ní kasemi nɛ ɔ maa ye bua nihi nɛ a suɔ kaa a Baptisi mɛ ɔ nɛ a na heto kɛ ha sane bimi nɛ ɔmɛ: (1) Mɛni ji “su momo ɔ”? (2) Mɛni he je nɛ Yehowa ke wa je su momo ɔ kɛ fɔ he ɔ? (3) Mɛni blɔ nɔ wa ma nyɛ maa gu kɛ pee jã? Ke ji kaa a Baptisi mo momo ɔ, ní kasemi nɛ ɔ maa ye bua mo nɛ o ko ya wo su momo ɔ ekohu.

4. Ke “su momo ɔ” ngɛ nɔ ko kudɔe ɔ, kɛ e peeɔ e ní ha kɛɛ?

⁴ Ke “su momo ɔ” ngɛ nɔ ko kudɔe ɔ, behi fuu ɔ, nɔ ɔ susuɔ ní yayahi a he nɛ e peeɔ ní yayahi. Eko ɔ, e foɔ lɛ pɛ e nɔ́ mi, e mi mi fuɔ mla, e je we hɛ sa kpo, nɛ e woɔ e he nɔ. Eko ɔ, e bua jɔ bɔmi nami he fonihi kɛ videohi a hyɛmi he, nɛ e hyɛɔ videohi nɛ awi yemi ní peepeehi ngɛ mi. Atsinyɛ jemi ko be he kaa e ngɛ su kpakpa komɛ, nɛ e ma nyɛ ma pia e he ngɛ níhi nɛ e peeɔ aloo e deɔ nɛ a dɛ ɔ he. Se e be kã nɛ e kɛ ma tsake e susumi kɛ e ní peepee.​—Gal. 5:19-21; 2 Tim. 3:2-5.

5. Anɛ wa ma nyɛ ma je su momo ɔ ngɛ wa he kulaa lo? Moo tsɔɔ nya. (Ní Tsumi 3:19)

⁵ Akɛnɛ wɔ tsuo wa yi mluku he je ɔ, wa be nyɛe ma je susumi kɛ he numi yayahi tsuo kɛ je wa tsui kɛ wa juɛmi mi. Be komɛ ɔ wa ma de nɔ́ ko loo wa maa pee nɔ́ ko nɛ pee se ɔ wa ma pia wa he. (Yer. 17:9; Yak. 3:2) Se ke wa je su momo ɔ kɛ fɔ he ɔ, suhi kɛ ní peepeehi nɛ dɛ ɔ be wa nɔ he wami náe hu. E haa nɛ wa ba peeɔ nihi nɛ a je ekpa.​—Yes. 55:7; kane Ní Tsumi 3:19.

6. Mɛni he je nɛ Yehowa woɔ wɔ he wami kaa wa je susumi yayami kɛ je wa juɛmi mi nɛ wa kua je mi bami yaya a?

⁶ Akɛnɛ Yehowa suɔ wɔ wawɛɛ nɛ e suɔ nɛ wa bua nɛ jɔ ngɛ si himi mi he je ɔ, e woɔ wɔ he wami kaa wa je susumi yayami kɛ je wa juɛmi mi nɛ wa kua je mi bami yaya. (Yes. 48:17, 18) E le kaa ke wa ha nɛ susumi yayami ná wa nɔ he wami ɔ, e ma nyɛ maa ye wɔ nitsɛmɛ kɛ ni kpahi awi. Ke wa ye wɔ nitsɛmɛ wa he awi loo ni kpahi awi ɔ, e dɔɔ lɛ.

7. Kaa bɔ nɛ Roma Bi 12:1, 2 ɔ tsɔɔ ɔ, mɛni he blɔ wa ngɛ?

⁷ Eko ɔ, be komɛ ɔ, wa huɛmɛ kɛ wa weku li maa ye wa he fɛu akɛnɛ wa ngɛ tsakemi komɛ pee ɔ he je. (1 Pet. 4:3, 4) Eko ɔ, a ma de ke wa ngɛ he blɔ nɛ wa peeɔ nɔ́ nɛ wa suɔ, nɛ e sɛ nɛ nɔ ko nɛ tsɔɔ wɔ nɔ́ nɛ waa pee. Se ngɛ anɔkuale mi ɔ, nihi nɛ a kɛ Yehowa mlaa tsu we ní ɔ be he yemi nitsɛnitsɛ. Anɔkuale sane ji kaa a ha nɛ je ɔ nɛ Satan ngɛ nɔ yee ɔ ngɛ mɛ kudɔe. (Kane Roma Bi 12:1, 2.) Wɔ tsuo wa ngɛ he blɔ nɛ  wa hlaa nɔ́ nɛ wa suɔ. Wa ma nyɛ maa hla kaa wa maa wo su momo ɔ nɛ yayami kɛ Satan je ɔ ngɛ lɛ kudɔe ɔ, aloo wa maa ngmɛ blɔ nɛ Yehowa nɛ e tsake wɔ nɛ waa ba wa je mi saminya amlɔ nɛ ɔ.​—Yes. 64:8.

8. Mɛni maa ye bua wɔ nɛ wa je wa he kɛ je susumi kɛ ní peepeehi nɛ a dɛ ɔ he?

⁸ Yehowa le kaa e ma he be, nɛ e biɔ mɔde bɔmi wawɛɛ loko wa nyɛ ma je wa he kɛ je susumi kɛ ní peepeehi nɛ a dɛ ɔ he. (La 103:13, 14) Se kɛ gu e Munyu ɔ, e mumi ɔ, kɛ e we asafo ɔ nɔ ɔ, Yehowa ha wɔ juɛmi, he wami kɛ yemi kɛ buami nɛ wa hia konɛ wa kɛ pee tsakemi nɛ e sa. E ngɛ heii kaa Yehowa ye bua mo. Amlɔ nɛ ɔ, wa ma susu ní komɛ nɛ o ma nyɛ maa pee konɛ e ye bua mo nɛ o je su momo ɔ konɛ o he nɛ su kɛ wa baptisimi.

9. Mɛni Mawu Munyu ɔ ma nyɛ maa ye bua mo nɛ o pee?

⁹ Moo ngɔ Baiblo ɔ kɛ kpa o mi. Mawu Munyu ɔ ngɛ kaa ahuhuɛ. E ma nyɛ maa ye bua mo nɛ o susu o munyu tumi kɛ o ní peepee he, nɛ e ma nyɛ maa ye bua mo nɛ o hyɛ bɔ nɛ o susuɔ níhi a he ha a saminya. (Yak. 1:22-25) Nɔ nɛ e kɛ mo kaseɔ Baiblo ɔ kɛ nyɛmimɛ nɛ a nane pi si ɔ ma nyɛ maa ye bua mo. A ma nyɛ maa da Baiblo ɔ nɔ kɛ ye bua mo nɛ o na hehi nɛ o bɔɔ mɔde ngɛ kɛ hehi nɛ e sa nɛ o ya o hɛ mi ngɛ. A ma nyɛ maa ye bua mo konɛ o na Baiblo mi nɔ́ hyɛmi nɔ́ ko nɛ e ma ha nɛ o ye su yayami komɛ a nɔ. Yehowa pee klaalo be fɛɛ be kaa e maa ye bua mo. E le blɔ nɛ e hi pe kulaa nɛ e maa gu nɔ kɛ ye bua mo. Nɛ e le nɔ́ nɛ ngɛ o tsui mi. (Abɛ 14:10; 15:11) E sa nɛ e pee o su kaa o maa sɔle ha lɛ be fɛɛ be nɛ o kase e Munyu ɔ daa ligbi.

10. Mɛni o kase ngɛ Elie níhi a si kpami ɔ mi?

¹⁰ Mo ná nɔ mi mami kaa Yehowa mlaa amɛ da kɛ pi si. Wa ma nyɛ ma ná nɔ́ fɛɛ nɔ́ nɛ Yehowa ma de wɔ ke waa pee ɔ he se. Nihi nɛ a kɛ e mlaa amɛ tsuɔ ní ɔ, nihi buu mɛ, a le yi mi tomi he je nɛ a ngɛ si himi mi, nɛ a ngɛ bua jɔmi nitsɛnitsɛ. (La 19:7-11) Se nihi nɛ a kɛ Yehowa mlaa a tsu we ní ɔ ngɔɔ a he kɛ woɔ he lo ɔ ní tsumi mi ɔmɛ a mi nɛ a naa mi nɔ́. Mo kadi nɔ́ nɛ nyumu ko nɛ a tsɛɛ lɛ ke Elie nɛ e kɛ Mawu mlaa amɛ tsu we ní ɔ de. E fɔli nɛ a tsɔse lɛ ɔ suɔ Yehowa. Se benɛ e ye jeha nyɔngma kɛ etɛ ɔ, e bɔni huɛ yayami bɔmi. Lɔ ɔ ha nɛ e kɛ e he ya wo tsopa yaya kɛ ní tsumi mi, je mi bami yaya kɛ jumi mi. Elie tsɔɔ kaa e yɔse kaa e mi mi fuɔ mlamlaamla nɛ e kɛ e he woɔ awi yemi mi. E de ke: “Ngɛ anɔkuale mi ɔ, i pee nɔ́ fɛɛ nɔ́ nɛ a tsɔɔ mi kaa e sɛ nɛ anɔkuale Kristofo no nɛ pee ɔ.” Se Elie hɛ ji níhi nɛ e kase ngɛ e jokuɛwi a si ɔ nɔ. Nyagbenyagbe ɔ, e ba bɔni Baiblo ɔ kasemi ekohu. E bɔ mɔde wawɛɛ nɛ e ngmɛɛ e su yaya amɛ a he nɛ e ha nɛ a Baptisi lɛ ngɛ jeha 2000 mi. Mɛni blɔ nɔ nɛ Yehowa mlaahi nɛ e kɛ ngɛ ní tsue ɔ ye bua lɛ? Elie de ke: “Amlɔ nɛ ɔ, i ngɛ tue mi jɔmi kɛ he nile kpakpa.” * Kaa bɔ nɛ wa na ngɛ e níhi a si kpami ɔ mi ɔ, nihi nɛ a kɛ Yehowa mlaa tsu we ní ɔ, yeɔ mɛ nitsɛmɛ a he awi. Se kɛ̃ ɔ, Yehowa pee klaalo kaa e maa ye bua mɛ nɛ a pee tsakemi.

11. Mɛni níhi nɛ Yehowa hiee?

¹¹ E sa nɛ waa hie níhi nɛ Yehowa hie ɔ. (La 97:10) Baiblo ɔ ha nɛ wa le kaa Yehowa hie “he nɔ womi hɛngmɛ, lakpa lilɛ, kɛ nine nɛ pueɔ nɔ nɛ e pee we nɔ́ ko muɔ si.” (Abɛ 6:16, 17, NW.) Jehanɛ se hu ɔ ‘muɔ si pueli, kɛ  nɔ sisili lɛɛ e hiee mɛ kulaa.’ (La 5:6) Yehowa hiɔ suhi kɛ ní peepee nɛ ɔmɛ, enɛ ɔ he ɔ, e kpata nimli yayamihi tsuo nɛ a ngɛ Noa be ɔ mi ɔ a hɛ mi akɛnɛ a yi mi wa a he je. (1 Mose 6:13) Mo susu nɔ hyɛmi nɔ́ kpa nɛ ɔ he nɛ o hyɛ. Yehowa gu gbalɔ Malaki nɔ nɛ e bɔ e we bi ɔmɛ kɔkɔ kaa e hiɔ nihi nɛ a guɔ sisi mi blɔ nɔ kɛ ngmɛɛɔ a yi ɔmɛ a he be mi nɛ a pee we nɔ́ yaya ko. Mawu kplɛɛ we a jami ɔ nɔ, nɛ e maa kojo mɛ ngɛ a ní peepee ɔ he.​—Mal. 2:13-16; Heb. 13:4.

12. Ke a ke ‘nɔ́ yayami he nɛ pee wɔ tai’ ɔ, mɛni e tsɔɔ?

¹² Yehowa suɔ nɛ “nɔ́ yayami he nɛ pee nyɛ tai.” (Rom. 12:9) A kɛ munyu nɛ ji “he nɛ pee nyɛ tai” ɔ kaleɔ he numi ko nɛ e nya wa. E tsɔɔ nɔ́ ko nɛ a sume sãasãa, aloo nɛ a maa hie nɔ́ ko wawɛɛ. Ke a de mo ke o ye niye ní ko nɛ e puɛ loo tso yiblii ko nɛ sa a, kɛ o maa nu he ha kɛɛ? Lɔ ɔ he susumi kɛkɛ po ma nyɛ ma ha nɛ o wo hiɔ. Jã kɛ̃ nɛ e sa nɛ waa nu he ke wa ngɛ nɔ́ ko nɛ Yehowa sume ɔ he susue.

13. Mɛni he je nɛ e sa nɛ wa kua susumi yayahi?

¹³ Moo po o susumi he piɛ. Wa susumihi náa wa ní peepeehi a nɔ he wami. Enɛ ɔ he je nɛ Yesu de wɔ ke, wa ko susu níhi nɛ ma ha nɛ waa pee yayami nɛ hɛdɔ ngɛ a he ɔ he ɔ nɛ. (Mat. 5:21, 22, 28, 29) Ngɛ anɔkuale mi ɔ, wa suɔ nɛ waa sa wa hiɔwe Tsɛ ɔ hɛ mi. Lɔ ɔ he ɔ, e he hia wawɛɛ kaa wa ma kua susumi yayamihi nɛ baa wa juɛmi mi ɔ oya nɔuu!

14. Kɛ wa munyu tumi haa nɛ a naa wɔ kɛɛ, nɛ mɛni sane bimi nɛ e sa nɛ wa ha heto?

¹⁴ Mo kudɔ o lilɛ. Yesu de ke: “Nɔ́ fɛɛ nɔ́ nɛ jeɔ nɔ nya mi kɛ baa a, nɔ tsui mi nɛ e je ɔ.” (Mat. 15:18) Wa munyu tutui tsɔɔ níhi nɛ ngɛ wa tsui mi. Lɔ ɔ he ɔ, mo bi o he sanehi nɛ nyɛɛ se nɛ ɔ: ‘Anɛ ma tu anɔkuale ke lɔ ɔ maa ngɔ nyagba kɛ ba po lo? Ke i ji nɔ ko nɛ i sɛ gba si himi mi ɔ, anɛ i hyɛɛ saminya konɛ i kɛ yo aloo nyumu kpa ko he numi nɛ ko fiɛ lo? Anɛ i kuaa munyuhi nɛ sɛ tumi he kulaa lo? Ke nɔ ko wo ye mi mi la a, anɛ i toɔ ye tsui si nɛ i kɛ lɛ tuɔ munyu lo?’ Ke o susu sane bimi nɛ ɔmɛ a he saminya a, e maa ye bua mo wawɛɛ. Waa kɛ munyu nɛ sɛ ma nyɛ maa to kpa nɛ a kɛ kpɛɔ tade he. Kaa bɔ nɛ kpa nɛ a kɛ kpɛɛ tade ɔ tsaa bo ɔmɛ kɛ blaa a, munyuhi nɛ sɛ ji nɔ́ nɛ nuɔ su momo ɔmɛ kɛ mɛtɛɔ wa he.  Lɔ ɔ he ɔ, ke wa ngɛ hlae nɛ wa je su momo ɔ, e sa nɛ wa kpa nɔ jɛmi munyuhi, lakpa munyuhi kɛ munyu kpahi nɛ sɛ tsuo tumi.

15. Ke a ke wa ka wa su momo ɔ “kɛ wo tso he” ɔ, mɛni e tsɔɔ?

¹⁵ Moo pee klaalo kaa o maa pee nɔ́ nɛ e he hia. Bɔfo Paulo ngɔ nɔ hyɛmi nɔ́ ko kɛ tsɔɔ wɔ bɔ nɛ e he hia nɛ wa pee tsakemi ngɛ wa ní peepee mi ha. E ngma ke wa ka wa su momo ɔ “kɛ wo tso he.” (Rom. 6:6) Ngɛ blɔ ko nɔ ɔ, wa ngɛ hlae nɛ waa nyɛɛ Kristo nɔ hyɛmi nɔ́ ɔ se. E sa nɛ wa kpa je mi bami kɛ ní peepeehi tsuo nɛ Yehowa hiee. E sa nɛ wa pee ní nɛ ɔmɛ konɛ wa ná he nile kpakpa kɛ hɛ kɛ nɔ fɔmi kaa wa maa hi si kɛ ya neneene. (Yoh. 17:3; 1 Pet. 3:21) Mo kai kaa, Yehowa be e sisi tomi mlaa amɛ tsakee kɔkɔɔkɔ konɛ e kɛ ha nɛ wa ná bua jɔmi. Mohu ɔ, wɔ nɛ e sa nɛ wa tsake wa su konɛ e kɛ Yehowa sisi tomi mlaa amɛ nɛ kɔ.​—Yes. 1:16-18; 55:9.

16. Mɛni he je nɛ e biɔ nɛ o ya nɔ nɛ o hwu kɛ si he lo ɔ gbɔjɔmi ɔ?

¹⁶ Yaa nɔ nɛ o hwu kɛ si he lo ɔ akɔnɔhi. Ke a baptisi mo momo po ɔ, yaa nɔ nɛ o hwu kɛ si he lo ɔ akɔnɔhi. Mo susu nyɛminyumu Maurício níhi a si kpami ɔ he nɛ o hyɛ. Benɛ e ji niheyo ɔ, e kɛ e he wo ɔ nyumu kɛ nyumu a bɔmi nami mi. Pee se ɔ, e kɛ Yehowa Odasefohi kpe nɛ e bɔni Baiblo ɔ kasemi. E pee tsakemihi ngɛ e himi mi, nɛ e ha nɛ a baptisi lɛ ngɛ jeha 2002 ɔ mi. E ngɛ mi kaa e kɛ jeha babauu sɔmɔ Yehowa mohu lɛɛ, se Maurício de ke: “E sa nɛ ma kplɛɛ nɔ kaa be komɛ ɔ, e ma bi nɛ ma hwu kɛ si he lo ɔ akɔnɔhi.” E ha we nɛ enɛ ɔ nɛ jɔ̃ e kɔni mi. Mohu ɔ, nɔ́ nɛ e de ji: “Ye bua jɔ wawɛɛ ejakaa i le kaa ke i hla kaa i be níhi nɛ sɛ pee ɔ, lɔ ɔ ma ha nɛ Yehowa bua nɛ e jɔ.” *

17. Mɛni o na ngɛ Nabiha níhi a si kpami ɔ mi nɛ woɔ mo he wami?

¹⁷ Moo sɔle kɛ ha Yehowa nɛ e ye bua mo nɛ o ngɔ o hɛ kɛ fɔ e mumi ɔ nɔ, se pi mo nitsɛ o nɔ. (Gal. 5:22; Fil. 4:6) E sa nɛ waa bɔ mɔde wawɛɛ nɛ wa je su momo ɔ kɛ fɔ he, nɛ wa ko ya ngɔ hu. Mo susu nyɛmiyo ko nɛ a tsɛɛ lɛ ke Nabiha nɔ hyɛmi nɔ́ ɔ he nɛ o hyɛ. E papaa kua lɛ benɛ e ye jeha ekpa pɛ. Nyɛmiyo ɔ de ke: “Enɛ ɔ ha nɛ i pii wawɛɛ ngɛ si himi mi.” Benɛ Nabiha ngɛ  wae ɔ, e muklii mi fuɔ mlamlaamla. Enɛ ɔ ha nɛ e ngɔ e he kɛ wo tsopa yayami juami mi. Se a nu lɛ nɛ a wo lɛ tsu jehahi abɔ. Odasefohi nɛ a ya slaa a nihi nɛ a wo mɛ tsu ɔ kɛ lɛ bɔni Baiblo ɔ kasemi. Nabiha bɔni tsakemi nguahi peemi ngɛ e si himi mi. E de ke: “E he wɛ ha mi kaa ma kpa ye su yayami ɔ ekomɛ. Se e he wa ha mi kaa ma kpa sigaleti numi.” Nabiha bɔ e he mɔde wawɛɛ nɛ ngɛ jeha kake se ɔ, e nyɛ nɛ e kpa sigaleti numi. Mɛni nɛ ye bua lɛ? E de ke: “Sɔlemi nɛ i sɔle kɛ ha Yehowa a lɛ ye bua mi wawɛɛ nɛ i nyɛ nɛ i kpa.” Amlɔ nɛ ɔ, e deɔ ni kpahi ke: “I ngɛ nɔ mi mami kaa ke i nyɛ nɛ i pee tsakemi bɔ nɛ pee nɛ ma sa Yehowa hɛ mi ɔ, lɛɛ nɔ fɛɛ nɔ ma nyɛ maa pee!” *

18. Ngɛ 1 Korinto Bi 6:9-11 ɔ nya a, mɛni nɛ Mawu sɔmɔli babauu nyɛ nɛ a pee?

¹⁸ Ngɛ kekleekle jeha lafa a mi ɔ, nihi nɛ Yehowa hla kaa a piɛɛ Kristo he kɛ ye matsɛ ɔ hu pee ní yayahi be ko nɛ be. Kaa nɔ hyɛmi nɔ́ ɔ, a kpɛti ni komɛ ngɔ a he kɛ wo gba puɛmi mi, nyumu kɛ nyumu a bɔmi nami mi, kɛ jumi mi. Ngɛ Mawu mumi klɔuklɔu ɔ yemi kɛ buami nya a, a nyɛ nɛ a tsake a subai. (Kane 1 Korinto Bi 6:9-11.) Jã kɛ̃ nɛ mwɔnɛ ɔ Baiblo ɔ ye bua nihi ayɔhi abɔ nɛ a pee tsakemihi ngɛ a si himi mi. * A nyɛ nɛ a kpa su yayahi nɛ he si ngɛ a mi ɔ. A nɔ hyɛmi nɔ́ ɔ tsɔɔ kaa mo hu o ma nyɛ maa pee tsakemihi ngɛ o si himi mi konɛ o ye su yayahi a nɔ nɛ o he nɛ su kɛ ha baptisimi.

19. Mɛni wa ma susu he ngɛ ní kasemi nɛ nyɛɛ se ɔ mi?

¹⁹ Ngɛ su momo ɔ nɛ wa ma je ɔ se ɔ, e sa nɛ nihi nɛ a suɔ nɛ a Baptisi mɛ ɔ nɛ a bɔ mɔde nɛ a wo su ehe ɔ. Ngɛ ní kasemi nɛ nyɛɛ se ɔ mi ɔ, wa ma susu blɔ nɔ nɛ wa maa gu kɛ pee jã, kɛ bɔ nɛ ni kpahi ma plɛ kɛ ye bua wɔ ha a he.