Benɛ Yehowa bɔ adesahi ɔ, e fã ke “[a] hyi zugba a nɔ tsuo, nɛ [a] ye zugba a tsuo nɔ.” Enɛ ɔ tsɔɔ kaa, Yehowa suɔ kaa adesahi nɛ a dla zugba a nɔ konɛ bɔɔbɔɔbɔɔ ɔ, zugba a tsuo nɛ plɛ pee paradeiso. (1 Mose 1:28) Nihi nɛ a maa hi zugba a nɔ ɔ lɛ a ma tsu fami nɛ ɔ he ní. Se sisije ɔ, zugba a be paradeiso pee ejakaa jamɛ a be ɔ mi ɔ, Eden abɔɔ ɔ be si hie. Ngɛ Harmagedon se pɛ ɔ, e he maa hia nɛ wa tsu ní wawɛɛ kɛ dla zugba a nɔ hehi nɛ puɛɔ. E ngɛ heii kaa ní tsumi nɛ ɔ pi ní tsumi nyafii kulaa!

Enɛ ɔ ha nɛ wa kaiɔ ní tsumi nɛ e he ba hia nɛ Israel bi ɔmɛ nɛ a tsu benɛ a je Babilon kɛ ho a ma a mi ya a. A zugba a fɔ si jeha 70 sɔuu nɛ nɔ ko be nɔ. Se Yesaya gba kaa Yehowa maa ye bua mɛ nɛ a zugba a ma ba pee fɛu ekohu. E de ke: “Zugba a pee nga kplanaa lɛɛ, se ma ha e ma plɛ pee ngmɔ kaa ngmɔ ɔ nɛ i pee ngɛ Eden ɔ.” (Yes. 51:3) Jã pɛpɛɛpɛ nɛ e ba mi. Yehowa ye bua Israel bi ɔmɛ nɛ a zugba a pee fɛu ekohu. Jã  nɔuu nɛ Yehowa maa ye bua nihi nɛ́ a nine maa su zugba a nɔ ɔ konɛ a dla zugba a nɛ e pee paradeiso. Amlɔ nɛ ɔ po ɔ, níhi ngɛ nɛ o ma nyɛ maa pee kɛ tsɔɔ kaa o suɔ nɛ o tsu ní tsumi nɛ ɔ eko.

Níhi nɛ o ma nyɛ maa pee amlɔ nɛ ɔ eko ji kaa o ma ha nɛ o we ɔ mi kɛ o we ɔ he ma tsɔ. O ma nyɛ maa pee jã ke nihi nɛ a ngɛ o kpɔ ɔ mi ɔ dla we a we ɔmɛ a mi saminya po. Jehanɛ hu ɔ, o ma nyɛ maa ye bua kɛ dla nyɛ Matsɛ Yemi Asa a kɛ Kpe Peemi Asa a nɔ. Ke o si fɔfɔɛ maa ngmɛ mo blɔ ɔ, o ma nyɛ maa ngma blɔ bimi womi nɔ ní konɛ ke oslaa ko ba a, o nyɛ nɛ o ya ye bua. Ke o pee jã a, lɔ ɔ tsɔɔ kaa o suɔ nɛ o ye bua o nyɛmimɛ nyumuhi kɛ yihi. Mo bi o he ke: ‘Anɛ ma nyɛ kase ní tsumi ko nɛ ke Yehowa ngmɛ mi blɔ nɛ i ya je ehe ɔ mi ɔ, e he maa ba se nami lo?’

Benɛ Yesu tle Yairo biyo ɔ si pɛ nɛ e de ni ɔmɛ ke a ha jokuɛ ɔ nɔ́ ko nɛ e ye. (Maak. 5:42, 43) Eko ɔ, e be yee kaa a maa ná ní nɛ jamɛ a jokuɛ ɔ nɛ e ye jeha 12 ɔ maa ye. Se mo susu he nɛ o hyɛ. Ke si nɛ Yesu wo kaa “nihi tsuo nɛ a ngɛ kaimi yɔkɔ ɔmɛ a mi ɔ maa nu e gbi nɛ a maa je kpo” ɔ ba mi ɔ, hyɛ ní tsumi abɔ nɛ e ma bi nɛ wa tsu. (Yoh. 5:28, 29) E ngɛ mi kaa Baiblo ɔ de we bɔ nɛ níhi maa ya nɔ ha fitsofitso mohu lɛɛ, se ke wa susu he ɔ, wa maa na kaa nihi nɛ a ma tle mɛ si ɔ maa hia niye ní, hwɔ he, kɛ tadehi. Amlɔ nɛ ɔ po ɔ, mɛni o ma nyɛ maa pee kɛ tsɔɔ kaa o pee klaalo kaa o maa ye bua? O ma nyɛ ma bi o he sanehi nɛ nyɛɛ se nɛ ɔmɛ.

Ke a fia adafi kaa kpɔ mi nɔ hyɛlɔ ɔ ma nyɛ asafo ɔ slaami ɔ, anɛ o fɔɔ lɛ nine kɛ haa ní yemi lo? Ke a tsake nɔ ko nɛ e ngɛ sɔmɔe ngɛ Betel ɔ ní tsumi nɛ e ba je o we asafo ɔ mi, aloo a tsake kpɔ mi nɔ hyɛlɔ ní tsumi nɛ e sɔmɔ we hu kaa kpɔ mi nɔ hyɛlɔ ɔ, anɛ o ma nyɛ maa ye bua kɛ hla hwɔ he ha lɛ lo? Ke a ma kpokpa nɔ kpe loo kpe klɛdɛɛ ko peemi ngɛ o kpɔ ɔ mi ɔ, anɛ o ma nyɛ maa ngɔ o he kɛ ha kɛ tsu ní loko kpe ɔ nɛ je sisi loo ke a kpa kpe ɔ lo? Anɛ o ma nyɛ maa ngɔ o he kɛ ha nɛ o nya nibwɔ ɔmɛ nɛ a maa ba a he lo?

Kaa bɔ nɛ Ní Tsumi 24:15 ɔ tsɔɔ ɔ, wa ngɛ blɔ hyɛe kaa a ma tle nihi ayɔ akpehi abɔ si. Nimli nɛ ɔmɛ a kpɛti nihi fuu ná we he blɔ kɛ kase Yehowa he ní loko a gbo. Se ke a tle mɛ si ɔ, a ma ná he blɔ kɛ kase Yehowa he ní. a Mawu sɔmɔli anɔkualetsɛmɛ nɛ a le ní tsɔɔmi ɔ maa ye bua kɛ tsɔɔ mɛ ní. (Yes. 11:9) Nyɛmiyo Charlotte nɛ e fiɛɛ ngɛ Yuropa, South Amerika, kɛ Afrika a ngɛ blɔ hyɛe kaa e kɛ e he maa wo ní tsumi nɛ ɔ mi. E kɛ bua jɔmi de ke: “I ngɛ blɔ hyɛe kaa ma tsɔɔ nihi nɛ a ma tle mɛ si ɔ ní. Ke i kane nɔ ko nɛ e hi si blema a he ní ɔ, behi fuu ɔ, i deɔ ye he ke: ‘Kaa asimasi nɛ ɔ le Yehowa a, jinɛ e ko ba e je mi saminya.’ I ngɛ blɔ hyɛe kaa ma tsɔɔ nihi nɛ a ma tle mɛ si ɔ Yehowa he ní, nɛ ma tsɔɔ mɛ bɔ nɛ a si himi maa pee kpakpa ha ke a sɔmɔ lɛ.”

Yehowa sɔmɔli anɔkualetsɛmɛ nɛ a gbo loko Yesu ba zugba a nɔ po ɔ, níhi fuu ngɛ nɛ e he maa hia nɛ a kase. Hyɛ bɔ nɛ e maa pee bua jɔmi ha kaa wa ma ná he blɔ kaa wa maa tsɔɔ Daniel bɔ nɛ gbamihi nɛ e ngma se e nui sisi ɔ ba mi ha. (Dan. 12:8) Nɛ Rut kɛ Naomi hu nɛɛ? Hyɛ bɔ nɛ wa bua maa jɔ ha ke wa ye bua mɛ nɛ a ba na kaa Mesia a ji a nina. Waa kɛ bua jɔmi maa tsɔɔ nihi ní ngɛ zugba a nɔ he fɛɛ he, nɛ haomi kɛ níhi nɛ gblaa wa juɛmi ngɛ je yaya nɛ ɔ mi ɔ be si hie hu!

Mɛni o ma nyɛ maa pee amlɔ nɛ ɔ kɛ tsɔɔ kaa o pee klaalo kaa o maa tsɔɔ nihi nɛ a ma tle mɛ si ɔ ní? Nɔ́ kake nɛ o ma nyɛ maa pee ji kaa o maa ya o hɛ mi ngɛ ní tsɔɔmi mi, nɛ o kɛ o he nɛ wo fiɛɛmi ní tsumi ɔ mi be fɛɛ be. (Mat. 24:14) Ke o wa ngɛ jeha mi loo si fɔfɔɛ kpa ko ha we nɛ o nyɛ nɛ o pee babauu po ɔ, o ma nyɛ ma tsu fiɛɛmi ní tsumi ɔ bɔ nɛ o si fɔfɔɛ maa ngmɛ mo blɔ amlɔ nɛ ɔ kɛ tsɔɔ kaa o pee klaalo kaa o maa tsɔɔ nihi nɛ a ma tle mɛ si ɔ ní.

E maa hi kaa wa ma bi wa he sanehi nɛ nyɛɛ se nɛ ɔmɛ. Anɛ i ngɛ blɔ hyɛe niinɛ kaa ma hi zugba a nɔ lo? Anɛ i ngɛ blɔ hyɛe kaa ma ye bua kɛ dla zugba a nɔ, nɛ ma ye bua nihi nɛ a ma tle mɛ si ɔ lo? Anɛ i ngɛ blɔ hyɛe kaa ma tsɔɔ nihi nɛ a ma tle mɛ si ɔ ní lo? Ní tsumihi fuu ngɛ amlɔ nɛ ɔ nɛ a ngɛ kaa ní tsumihi nɛ wa ma tsu ngɛ je ehe ɔ mi ɔ. Ke o ngɔ o he kɛ wo jamɛ a ní tsumi ɔmɛ a mi amlɔ nɛ ɔ, lɔ ɔ tsɔɔ kaa o pee klaalo kaa o maa hi je ehe ɔ mi!