1. Mɛni nɛ nyɛmimɛ fuu ngɛ mɔde bɔe kaa a maa pee ngɛ Yehowa sɔmɔmi mi?

 AKƐNƐ nyagbe ɔ su si ta he je ɔ, ní tsumi fuu ngɛ nɛ wa ma tsu. (Mat. 24:14; Luka 10:2; 1 Pet. 5:2) Wɔ tsuo wa suɔ nɛ waa kɛ wa nyɛmi tsuo nɛ sɔmɔ Yehowa. Nyɛmimɛ fuu ngɛ a sɔmɔmi ní tsumi ɔ mi blie. Ni komɛ suɔ nɛ a sɔmɔ kaa daa blɔ gbali. Ni komɛ hu suɔ nɛ a sɔmɔ ngɛ Betel loo a kɛ a he nɛ wo teokrase tsu mami ní tsumi ɔ mi. Nyɛmimɛ nyumuhi fuu ngɛ a he mɔde bɔe konɛ a nyɛ nɛ a sɔmɔ kaa asafo mi sɔmɔli loo asafo mi nikɔtɔmahi. (1 Tim. 3:1, 8) Ke Yehowa na kaa e sɔmɔli ngɛ mɔde bɔe kaa a maa je a tsui mi kɛ sɔmɔ lɛ ɔ, e bua jɔɔ wawɛɛ!—La 110:3; Yes. 6:8.

2. Ke wa sui oti komɛ nɛ waa kɛ ma wa hɛ mi ɔ a he ɔ, kɛ wa ma nyɛ maa nu he ha kɛɛ?

² Se ke jehahi babauu be nɛ loloolo ɔ, wa sui otihi nɛ waa kɛ ma wa hɛ mi ɔ eko he ɔ, wa kɔni mi ma nyɛ ma jɔ̃. Aloo eko ɔ, ke wa wa ngɛ jeha mi loo si fɔfɔɛ komɛ ha we nɛ waa pee babauu ngɛ Yehowa sɔmɔmi mi ɔ, wa kɔni mi ma nyɛ ma jɔ̃. (Abɛ 13:12) Jã nɛ e ba ngɛ Melissa blɔ fa mi. * E suɔ nɛ e ya sɔmɔ ngɛ Betel loo e ya Sukuu Kɛ Ha Matsɛ Yemi Sane Kpakpa Fiɛɛli ɔ eko, se e de ke: “Akɛnɛ i wa ngɛ jeha mi he je ɔ, ye nine be nyɛe maa su he blɔ nɛ ɔmɛ a nɔ. Enɛ ɔ haa nɛ ye kɔni mi jɔ̃ɔ be komɛ.”

3. Mɛni nɛ eko ɔ, e he maa hia nɛ nyɛmimɛ komɛ nɛ a pee konɛ a nine nɛ su sɔmɔmi he blɔhi a nɔ?

 ³ Eko ɔ, e he maa hia nɛ nihewi kɛ yihewi nɛ a ngɛ nɔmlɔ tso mi he wami ɔ nɛ a ná su komɛ loko a nine ma nyɛ maa su he blɔ komɛ a nɔ. Kaa nɔ hyɛmi nɔ́ ɔ, eko ɔ, a kpɛti ni komɛ le ní, a le bɔ nɛ a mwɔɔ yi mi kpɔ ngɛ níhi a he mla ha, nɛ a pee klaalo kɛ ha ní tsumi fɛɛ ní tsumi, se e he maa hia nɛ a kase bɔ nɛ a toɔ tsui si wawɛɛ ha, bɔ nɛ a ma tsu a ní tsumi saminya ha, loo bɔ nɛ a ma je bumi kpo wawɛɛ ha. Ke o bɔ mɔde nɛ o kase su kpakpahi nɛ e sa nɛ o ná a, nyɛmimɛ ɔmɛ maa ngɔ ní tsumi kɛ wo o dɛ be mi nɛ o hɛ be nɔ po. Mo susu Nick nɔ hyɛmi nɔ́ ɔ he nɛ o hyɛ. Benɛ e ye jeha 20 nɛ a hlɛ lɛ kaa asafo mi sɔmɔlɔ ɔ, e kɔni mi jɔ̃. E de ke: “I nu he kaa nɔ́ ko ngɛ nɛ i bɔɛ he mɔde.” Se Nick kɔni mi jɔ̃ we. E bɔ e he mɔde wawɛɛ ngɛ fiɛɛmi ní tsumi ɔ kɛ asafo ɔ mi, nɛ amlɔ nɛ ɔ, e ngɛ sɔmɔe kaa Asafo ɔ Ní Tsumi Kɔni ɔ Ajla Toli ɔmɛ a kpɛti nɔ kake.

4. Mɛni he wa ma susu ngɛ ní kasemi nɛ ɔ mi?

⁴ Anɛ o kɔni mi jɔ̃ akɛnɛ o nine sui mumi mi oti ko nɛ o kɛ ma o hɛ mi ɔ nɔ ɔ he je lo? Ke jã a, lɛɛ moo sɔle kɛ ha Yehowa nɛ o de lɛ bɔ nɛ o ngɛ he nue ha. (La 37:5-7) Jehanɛ hu ɔ, mo bi nyɛmimɛ nyumuhi nɛ a nane pi si ɔ nɛ a tsɔɔ mo níhi nɛ o ma nyɛ maa pee konɛ o ya o hɛ mi ngɛ Mawu jami mi. Ke a tsɔɔ mo ɔ, bɔɔ mɔde nɛ o kɛ a ga womi ɔ nɛ tsu ní. Ke o pee jã a, o ma nyɛ maa su otihi nɛ o kɛ ma o hɛ mi ɔ a he. Se kaa bɔ nɛ e ji ngɛ Melissa nɛ wa tu e he munyu kɛ sɛ hlami ɔ blɔ fa mi ɔ, eko ɔ, o be nyɛe maa pee nɔ́ nɛ o ngɛ hlae nɛ o pee ngɛ Yehowa sɔmɔmi mi ɔ amlɔ nɛ ɔ. Se kɛ o maa pee kɛɛ nɛ o ya nɔ nɛ o ná bua jɔmi? Bɔ nɛ pee nɛ o na heto ɔ, ní kasemi nɛ ɔ maa ye bua mo nɛ (1) o le nɔ́ nɛ ma ha mo bua jɔmi, (2) nɔ́ nɛ o ma nyɛ maa pee konɛ o bua nɛ jɔ wawɛɛ, kɛ (3) Otihi nɛ o kɛ ma nyɛ maa ma o hɛ mi konɛ o bua jɔmi ɔ nɛ pue nɔ.

5. Loko wa bua maa jɔ ɔ, mɛni nɔ nɛ e sa nɛ waa ngɔ wa juɛmi kɛ ma? (Fiɛlɔ 6:9)

⁵ Fiɛlɔ 6:9 ɔ tsɔɔ nɔ́ nɛ ma nyɛ maa ye bua wɔ nɛ wa ná bua jɔmi. (Kane.) Nɔ nɛ ngɔɔ e juɛmi kɛ maa ‘nɔ́ nɛ e ngɛ ɔ’ nɔ ɔ bua jɔɔ si fɔfɔɛ mi nɛ e ngɛ, kɛ ní kpahi nɛ e ngɛ ɔ a he. Se nɔ nɛ daa nɛ ɔ, e suɔ nɛ e ná nɔ́ kpa a nyɛɛɔ níhi nɛ e nine be nyɛe maa su a nɔ gblee ɔ a se. Mɛni wa kaseɔ ngɛ ngmami nɛ ɔ mi? Loko wa ma ná bua jɔmi ɔ, jã wa ngɔ wa juɛmi kɛ ma níhi nɛ wa ngɛ amlɔ nɛ ɔ nɔ, se pi níhi nɛ wa nine be nyɛe maa su a nɔ.

6. Mɛni nɔ́ he tomi nɔ́ he wa ma susu, nɛ mɛni nɛ wa ma nyɛ maa kase ngɛ mi?

⁶ Se anɛ e ji anɔkuale kaa nɔ ko bua ma nyɛ maa jɔ níhi nɛ e ngɛ momo ɔ a he lo? Nihi fuu susu kaa jã be hie peemi ejakaa adesahi suɔ nɛ a kase ní hehi daa ligbi. Se ngɛ anɔkuale mi ɔ, jã maa hi peemi. Wa bua ma nyɛ maa jɔ ‘níhi nɛ wa ngɛ ɔ’ a he. Ngɛ mɛni blɔ nɔ? Nyɛ ha nɛ wa susu Yesu nɔ́ he tomi nɔ́ nɛ kɔɔ talɛnt ɔ he nɛ ngɛ Mateo 25:14-30 ɔ he nɛ waa hyɛ. Wa maa na blɔ nɔ nɛ wa maa gu kɛ ná bua jɔmi nɛ wa bua nɛ jɔ wawɛɛ ngɛ si fɔfɔɛ nɛ wa ngɛ mi amlɔ nɛ ɔ he.

7. Moo tsɔɔ Yesu nɔ́ he tomi nɔ́ nɛ kɔɔ talɛnt ɔ he ɔ mi kpiti.

⁷ Ngɛ Yesu nɔ́ he tomi nɔ́ ɔ mi ɔ, nyumu ko to kaa e maa hia blɔ. Se loko e maa je ɔ, e tsɛ e nyɔguɛ ɔmɛ tsuo nɛ e ha mɛ talɛnt nɛ a kɛ tsu ní. * E ha mɛ ngɛ a ti nɔ fɛɛ nɔ nyɛmi nya. E ha kekleekle nyɔguɛ ɔ talɛnt enuɔ, e ha nɔ enyɔne ɔ enyɔ, nɛ e ha nɔ etɛne ɔ kake. Nyɔguɛ enyɔ tsu ní wawɛɛ nɛ a ná sika fuu kɛ ha a nyɔmtsɛ ɔ. Nyɔguɛ etɛne ɔ lɛɛ e kɛ e sika a tsu we nɔ́ ko, enɛ ɔ he ɔ, e nyɔmtsɛ ɔ fiee lɛ.

8. Mɛni nɛ e ko ha nɛ kekleekle nyɔguɛ ɔ ngɛ nɔ́ he tomi nɔ́ ɔ mi ɔ bua ko jɔ wawɛɛ?

 ⁸ Eko ɔ, kekleekle nyɔguɛ ɔ bua jɔ kaa e nyɔmtsɛ ɔ he lɛ ye nɛ e ha lɛ talɛnt enuɔ. Sika nɛ ɔ hiɛ wawɛɛ, nɛ enɛ ɔ ji odase nɛ tsɔɔ kaa e nyɔmtsɛ ɔ he lɛ ye wawɛɛ! Se nyɔguɛ enyɔne ɔ hu nɛɛ? E kɔni mi ko nyɛ ko jɔ̃ akɛnɛ e talɛnt ɔ sui kekleekle nɔ ɔ nɔ́ ɔ he je. Se kɛ e pee e ní ha kɛɛ?

9. Mɛni nɛ Yesu de we ngɛ nyɔguɛ enyɔne ɔ he? (Mateo 25:22, 23)

⁹ Kane Mateo 25:22, 23. Yesu de we ke nyɔguɛ enyɔne ɔ mi mi fu nɛ e ngɔ e nyɔmtsɛ ɔ he abofu kɛ wo e mi akɛnɛ a ha lɛ talɛnt enyɔ pɛ ɔ he je. Nɛ Yesu tu we munyu ko nɛ tsɔɔ kaa nyɔguɛ ɔ de ke: ‘Mɛni he je nɛ enɛ ɔ pɛ nɛ i ná a? I tsuɔ ní kaa nɔ nɛ a ha lɛ talɛnt enuɔ ɔ nɔuu! Ke ye nyɔmtsɛ ɔ bua jɔɛ ye ní tsumi he ɔ, lɛɛ ma nyɛ ma ya pu e sika a nɛ ma ya tsu ní ngɛ ye dɛ he.’

10. Mɛni nɛ nyɔguɛ enyɔne ɔ kɛ e talɛnt ɔ pee?

¹⁰ Kaa bɔ nɛ kekle nyɔguɛ ɔ pee ɔ, nyɔguɛ enyɔne ɔ na nɔ́ nɛ a kɛ wo e dɛ ɔ kaa e he hia, nɛ e kɛ hɛdɔ tsu ní wawɛɛ kɛ ha e nyɔmtsɛ ɔ. Enɛ ɔ ha nɛ e ná talɛnt enyɔ kɛ piɛɛ he. Nyɔmtsɛ ɔ je nyɔguɛ nɛ ɔ yi kaa e tsu ní wawɛɛ. Nyɔmtsɛ ɔ bua jɔ e he, nɛ e ngɔ ní tsumi fuu kɛ wo e dɛ!

11. Kɛ o maa pee kɛɛ kɛ ná bua jɔmi wawɛɛ?

¹¹ Jã kɛ̃ nɛ wɔ hu wa ma nyɛ ma ná bua jɔmi wawɛɛ ke wa bua jɔ nɔ́ nɛ wa ngɛ tsue ngɛ Yehowa sɔmɔmi mi ɔ he. Moo ngɔ o “be tsuo” kɛ tsu fiɛɛmi ní tsumi ɔ nɛ o ngɔ o he kɛ wo asafo ɔ ní tsumihi a mi. (Níts. 18:5; Heb. 10:24, 25) Dla o he saminya loko o ya asafo mi kpehi konɛ o nyɛ nɛ o ha hetohi nɛ woɔ nɔ he  wami. Moo na ní tsumi nɛ a kɛ maa wo o dɛ ngɛ otsi kpɛti kpe ɔ mi ɔ kaa e he hia saminya. Ke a ngɔ ní tsumi ko kɛ wo o dɛ ngɛ asafo ɔ mi ɔ, tsu ngɛ be nya nɛ a na kaa a ma nyɛ maa ngɔ hɛ kɛ fɔ o nɔ. Ke a ngɔ ní tsumi ko kɛ wo o dɛ ɔ, koo bu lɛ kaa e he hia we lɔ ɔ, o be be pue ngɛ he. Bɔɔ mɔde kaa o ma tsu lɛ saminya. (Abɛ 22:29) Ke o tsu ní wawɛɛ kɛ ha Yehowa a, lɔ ɔ ma ha nɛ o ma ba pee e huɛ nɛ o bua maa jɔ wawɛɛ. (Gal. 6:4) Ke ni kpahi a nine su he blɔ ko nɛ o kɛ ma hɛ mi ɔ nɔ po ɔ, e be yee ha mo kaa o kɛ mɛ ma nya.—Rom. 12:15; Gal. 5:26.

12. Mɛni lɛ ye bua Melissa kɛ Nick nɛ a ya nɔ nɛ a ná bua jɔmi wawɛɛ ɔ?

¹² Anɛ o kai Melissa nɛ wa tu e he munyu kɛ sɛ hlami ngɛ kuku 2 ɔ mi, nɛ e suɔ nɛ e ya sɔmɔ ngɛ Betel loo e ya Sukuu Kɛ Ha Matsɛ Yemi Sane Kpakpa Fiɛɛli ɔ eko ɔ lo? E ngɛ mi kaa e nyɛ we nɛ e su jamɛ a oti ɔmɛ a he mohu lɛɛ, se e de ke: “I bɔ mɔde kaa ma tsu ye blɔ gba mi ní tsumi ɔ saminya, nɛ i kɛ ye he wo fiɛɛmi ní tsumi ɔ fã slɔɔto ɔmɛ a mi. Enɛ ɔ ha nɛ i ná bua jɔmi wawɛɛ.” Kɛ Nick plɛ kɛ da e kɔni mi nɛ e jɔ̃ ɔ nya ha kɛɛ be mi nɛ a hlɛ lɛ kaa asafo mi sɔmɔlɔ ɔ? E de ke: “I kɛ ye juɛmi ma he blɔhi nɛ i ngɛ kaa ma fiɛɛ nɛ ma ha sane hetohi nɛ woɔ nɔ he wami ngɛ asafo mi kpehi a sisi ɔ nɔ. Jehanɛ hu ɔ, i ngma Betel blɔ bimi womi ɔ nɔ ní, nɛ ngɛ jeha kake se ɔ, a tsɛ mi.”

13. Mɛni se o ma ná ke o ngɔ o nyɛmi tsuo kɛ tsu ní tsumi nɛ a kɛ wo o dɛ ɔ? (Fiɛlɔ 2:24)

¹³ Ke o tsuɔ ní tsumihi nɛ a kɛ woɔ o dɛ ɔ amlɔ nɛ ɔ a he ní saminya a, anɛ o nine ma nyɛ maa su he blɔhi fuu a nɔ hwɔɔ se lo? E ma nyɛ maa ba mi jã kaa bɔ nɛ e ba ngɛ Nick blɔ fã mi ɔ. Se ke o si fɔfɔɛ ɔ ngɛ kaa Melissa nɔ ɔ hu ɔ, o ma nyɛ maa ya nɔ ma ná bua jɔmi wawɛɛ nɛ o bua nɛ jɔ nɔ́ nɛ o ngɛ tsue ɔ hu he. (Kane Fiɛlɔ 2:24.) Nɔ́ nɛ pe kulaa a, o bua maa jɔ wawɛɛ ejakaa o le kaa o ngɛ o Nyɔmtsɛ Yesu Kristo hɛ mi sae.

14. Mɛni nɛ e sa nɛ e hi wa juɛmi mi ke wa ngɛ otihi nɛ wa kɛ ma wa hɛ mi ngɛ Yehowa sɔmɔmi mi ɔ he susue?

¹⁴ Ke waa kɛ wa nyɛmi tsuo ngɛ ní tsumi nɛ a kɛ wo wa dɛ amlɔ nɛ ɔ tsue po ɔ, anɛ lɔ ɔ tsɔɔ kaa e sɛ nɛ waa pee babauu kɛ piɛɛ he lo? Dɛbi kulaa! E sa nɛ waa ngɔ otihi nɛ maa ye bua wɔ nɛ waa pee fiɛɛli kɛ tsɔɔli nɛ a he be ɔ kɛ ma wa hɛ mi, nɛ waa ye bua wa nyɛmimɛ nyumuhi kɛ yihi hulɔ. Wa ma nyɛ maa su oti nɛ ɔmɛ a he ke waa kɛ nile tsu ní, wa pee wa he humi, nɛ wa ngɔ wa nyɛmimɛ a hiami níhi kɛ ye kekle blɔ he.—Abɛ 11:2; Níts. 20:35.

15. Mɛni ji oti komɛ nɛ ma nyɛ ma ha nɛ o ná bua jɔmi wawɛɛ?

¹⁵ Mɛni otihi nɛ o kɛ ma nyɛ maa ma o hɛ mi? Mo bi Yehowa nɛ e ye bua mo nɛ o na otihi nɛ o ma nyɛ maa su a he. (Abɛ 16:3; Yak. 1:5) Anɛ o kɛ otihi nɛ wa tu a he munyu ngɛ  kekleekle kuku nɛ ngɛ ní kasemi nɛ ɔ mi ɔ eko ma nyɛ maa ma o hɛ mi lo? Oti nɛ ɔmɛ ekomɛ ji blɔ gbali a wami ní tsumi ɔ, daa blɔ gbami ní tsumi ɔ, Betel sɔmɔmi, loo asafo ɔ tsu mami ní tsumi ɔ. Aloo eko ɔ, o ma nyɛ maa kase gbi kpa nɛ o fiɛɛ kɛ ha nihi nɛ a ngɛ ma kpahi a nɔ ɔ. O ma nyɛ maa kase oti nɛ ɔmɛ ekomɛ a he ní ngɛ womi nɛ ji, Organized to Do Jehovah’s Will ɔ yi 10 mi, nɛ o kɛ o we asafo mi nikɔtɔma amɛ nɛ sɛɛ ní. * Ke o ngɛ mɔde bɔe kaa o maa su oti nɛ ɔmɛ a he ɔ, ni kpahi maa na kaa o ngɛ o hɛ mi yae, nɛ o bua hu maa jɔ wawɛɛ.

16. Mɛni o ma nyɛ maa pee ke amlɔ nɛ ɔ, o nyɛ we nɛ o su oti pɔtɛɛ ko nɛ o kɛ ma o hɛ mi ɔ he?

 ¹⁶ Se ke o be nyɛe nɛ o su otihi nɛ a tu a he munyu ngɛ ní kasemi nɛ ɔ mi ɔ a he amlɔ nɛ ɔ hu nɛɛ? Ke jã a, ngɔɔ oti kpa nɛ o ma nyɛ maa su he kɛ ma o hɛ mi. Mo susu níhi nɛ nyɛɛ se nɛ o ma nyɛ maa pee ɔ a he nɛ o hyɛ.

17. Ngɛ 1 Timoteo 4:13, 15 ɔ nya a, mɛni nyɛminyumu ko ma nyɛ maa pee konɛ e ba pee tsɔɔlɔ kpakpa?

¹⁷ Kane 1 Timoteo 4:13, 15. Ke o ji nyɛminyumu nɛ a baptisi mo ɔ, lɛɛ o ma nyɛ maa ya o hɛ mi ngɛ magbɛ nɔ munyu tumi kɛ ní tsɔɔmi mi. Mɛni he je? Ejakaa ke o ba pee nɔ ko nɛ le ní kanemi saminya, o le munyu tumi saminya, nɛ o le ní tsɔɔmi saminya a, o ma nyɛ maa ye bua o tue buli ɔmɛ. Kɛ pee oti kaa o maa kane womiyo nɛ ji, Yaa O Hɛ Mi Ngɛ Ní Kanemi Kɛ Ní Tsɔɔmi Mi ɔ nɛ o kɛ e mi ga womi ɔ eko fɛɛ eko nɛ tsu ní. Moo kase munyuyi kake ngɛ be kake mi, moo ka ngɛ we mi nɛ o hyɛ, nɛ o bɔ mɔde kaa o kɛ ma tsu ní ke a ha mo ní peemi ko. Mo bi yemi kɛ buami ngɛ ga wolɔ walɔ loo asafo mi nikɔtɔmahi nɛ a he be “wawɛɛ ngɛ munyu tumi kɛ ní tsɔɔmi mi ɔ” a ngɔ. * (1 Tim. 5:17) Koo ngɔ o juɛmi kɛ ma otihi nɛ ngɛ womiyo ɔ mi ɔ pɛ nɔ, mohu ɔ, moo ye bua o tue buli ɔmɛ nɛ a wo a hemi kɛ yemi ɔ mi he wami aloo nɛ a ngɔ nɔ́ nɛ a ngɛ kasee ɔ kɛ tsu ní. Ke o pee jã a, o bua maa jɔ wawɛɛ nɛ o tue buli ɔmɛ hu a bua maa jɔ.

18. Mɛni ma nyɛ maa ye bua wɔ nɛ waa su oti nɛ waa kɛ ma wa hɛ mi ngɛ wa fiɛɛmi ní tsumi ɔ mi ɔ he?

¹⁸ Wɔ tsuo wa blɔ nya ní tsumi ji kaa wa maa fiɛɛ nɛ waa pee nihi kaseli. (Mat. 28:19, 20; Rom. 10:14) Anɛ o suɔ nɛ o he nɛ be ngɛ ní tsumi nɛ he hia pe kulaa nɛ ɔ mi lo? Moo kase Ní Tsɔɔmi womiyo ɔ nɛ o kɛ pee oti kaa o kɛ nɔ́  nɛ o ngɛ kasee ɔ ma tsu ní ngɛ o si himi mi. O ma nyɛ maa na ní kpahi nɛ maa ye bua mo ngɛ Kristofohi A Si Himi Kɛ Sɔmɔmi Ní Tsumi ɔ—Ní Kasemi Womi ɔ mi kɛ ní sɛɛmi he nɔ hyɛmi níhi he video ɔmɛ nɛ a jeɔ ngɛ otsi kpɛti kpe ɔmɛ a mi ɔ mi. Moo bɔ mɔde nɛ o kɛ oti slɔɔto ɔmɛ nɛ tsu ní nɛ o hyɛ nɔ́ nɛ maa ye manye. Ke o kɛ blɔ tsɔɔmi nɛ ɔmɛ tsu ní ɔ, o he maa be ngɛ fiɛɛmi ní tsumi ɔ mi nɛ o ma ná bua jɔmi babauu.—2 Tim. 4:5.

19. Mɛni o ma nyɛ maa pee konɛ o ná Kristofohi a suhi?

¹⁹ O hɛ ko je nɔ kaa otihi nɛ a he hia nɛ o ma nyɛ kɛ ma o hɛ mi ji kaa o ma ná suhi nɛ maa ye bua mo nɛ o sa Yehowa hɛ mi. (Gal. 5:22, 23; Kol. 3:12; 2 Pet. 1:5-8) Mɛni o ma nyɛ maa pee konɛ o su jamɛ a oti ɔ he? Kaa nɔ hyɛmi nɔ́ ɔ, eko ɔ, o suɔ nɛ o hemi kɛ yemi ɔ mi nɛ wa. O ma nyɛ maa kane munyuhi nɛ ngɛ wa womi ɔmɛ a mi, nɛ tsɔɔ níhi nɛ o ma nyɛ maa pee konɛ o hemi kɛ yemi ɔ mi nɛ wa. Nɛ ke o hyɛ video komɛ nɛ ngɛ JW Brɔɔdkastin ɔ nɔ, nɛ tsɔɔ bɔ nɛ nyɛmimɛ komɛ je hemi kɛ yemi nɛ mi wa kpo ha benɛ a kɛ ka slɔɔtohi kpe ɔ, e maa ye bua mo wawɛɛ. Lɔ ɔ se ɔ, moo hyɛ blɔhi a nɔ nɛ o maa gu nɛ o kɛ a nɔ hyɛmi ní ɔmɛ nɛ tsu ní ngɛ o si himi mi.

20. Mɛni wa ma nyɛ maa pee konɛ wa ná bua jɔmi wawɛɛ nɛ wa ko hao tsɔ?

²⁰ Ngɛ anɔkuale mi ɔ, wɔ tsuo wa ná nɛ wa pee babauu ha Yehowa pe bɔ nɛ wa ngɛ pee amlɔ nɛ ɔ. Ngɛ Mawu je ehe ɔ mi ɔ, waa kɛ wa nyɛmi tsuo ma sɔmɔ Yehowa. Se loko jamɛ a be ɔ maa su ɔ, ke wa bɔ mɔde nɛ wa pee nɔ́ fɛɛ nɔ́ nɛ wa ma nyɛ amlɔ nɛ ɔ, wa bua maa jɔ wawɛɛ nɛ wa be haoe tsɔ. Se nɔ́ nɛ pe kulaa a, e maa wo wa “bua jɔmi Mawu,” nɛ ji Yehowa a hɛ mi nyami. (1 Tim. 1:11) Enɛ ɔ he ɔ, nyɛ ha nɛ wa bua nɛ jɔ he blɔhi nɛ wa ngɛ amlɔ nɛ ɔ a he!