Sika nɛ a puɛɔ kɛ nihi nɛ a gboɔ kɛ nyagba kpahi nɛ ta hwumi ngɔɔ kɛ baa a hiɛ wawɛɛ nitsɛ.

•   “Jeha nɛ be ɔ, sika nɛ nɔ yemihi nɛ a ngɛ je kɛ wɛ ɔ puɛ ngɛ tahi slɔɔtohi nɛ ya nɔ ɔ he ɔ maa su dɔla ayɔ akpe enyɔ kɛ se. Enɛ ɔ ji sika nɛ hiɛ wawɛɛ nɛ a puɛ ngɛ ta hwumi mi pe jehahi nɛ be ɔ.”​—The Washington Post, February 13, 2024.

 Pi sika babauu pɛ nɛ́ a puɛɔ ngɛ ta hwumi mi. Nihi babauu hu a hɛ mi kpataa. Moo hyɛ nɔ hyɛmi nɔ́ kake ko: Ta nɛ ngɛ nɔ yae ngɛ Ukraine.

•   Ta buli. Akɔtaa bumi tsɔɔ kaa ta buli nɛ a gbo loo a plaa kɛ je be nɛ ta a je sisi jeha enyɔ nɛ be ɔ a yibɔ maa su 500,000.

•   Ma bi. United Nations ɔ bɔ amaniɛ kaa ma bi nɛ a gbo loo a plaa a he hiɛ pe 28,000. Se kɛ̃ ɔ, UN nɔkɔtɔma ko de ke: “Ma bi abɔ nɛ a gbo ngɛ ta hwumi nɛ ɔ mi ɔ a yibɔ be hie kalemi.” a

 Bɔ nɛ ta hwumi kɛ basabasa peemi ha nɛ adesahi ngɛ nɔ́ nae ha a, nya wa wawɛɛ.

•   Nihi ayɔ 114. Yibɔ nɛ ɔ tsɔɔ nihi abɔ nɛ ta kɛ basabasa peemi ha nɛ a tu fo kɛ je a wehi a mi benɛ e ke suu September 2023 ɔ.

•   Nihi ayɔ 783. Yibɔ nɛ ɔ tsɔɔ nihi abɔ nɛ hwɔ yeɔ mɛ wawɛɛ. “Ta kɛ basabasa peemi ji nɔ́ titli nɛ haa nɛ hwɔ baa, nɛ nihi nɛ hwɔ yeɔ mɛ ngɛ je kɛ wɛ maa pee lafa mi nyingmi kpaago ɔ ngɛ hehi nɛ ta kɛ basabasa peemi ya nɔ ngɛ.”​—World Food Programme.

 Anɛ ta se maa po ligbi ko lo? Anɛ hɛ nɔ kami ko ngɛ kaa wa ma ná tue mi jɔmi lo? Anɛ be ko maa su nɛ a kɛ ní kpakpahi babauu nɛ je ɔ náa a be ní tsue ngɛ ta hwumi mi hu, se mohu a kɛ ma tsu ní kɛ po hwɔ kɛ ohia se lo? Mɛni Baiblo ɔ de?

 Baiblo ɔ gba kɛ fɔ si kaa a maa hwu ta ngɛ je kɛ wɛ, nɛ e kale lɛ kaa nɔ ko nɛ e hii si ngɛ okpɔngɔ ko se mi.

•   “Ekpa ko je kpo, okpɔngɔ tsutsuutsu kaa la, nɛ a ha nɔ nɛ e hii si ngɛ nɔ ɔ he blɔ kaa e je tue mi jɔmi kɛ je zugba a nɔ konɛ a gbe a sibi, nɛ a ha lɛ klaate ngua ko.”​—Kpo Jemi 6:4.

 Okadi peemi okpɔngɔ nɔ hili enyɔ nɛ a daa si ha hwɔ kɛ gbenɔ nɛ́ hiɔ kɛ ní kpahi maa ngɔ kɛ ba a, nyɛɛ okpɔngɔ nɔ hilɔ nɛ ɔ se. (Kpo Jemi 6:5-8) Ke o suɔ nɛ o kase babauu kɛ kɔ Baiblo gbami nɛ ɔ kɛ nɔ́ he je nɛ wa ngɛ nɔ mi mami kaa a ngɛ mi bae ngɛ wa be nɛ ɔ mi ɔ he ɔ, moo kane munyu nɛ ji “Okpɔngɔ Nɔ Hili Eywiɛ Ɔmɛ​—Mɛnɔmɛ Ji Mɛ?”

 E be kɛe nɛ a kɛ ní kpakpahi nɛ je ɔ náa a be ní tsue ngɛ ta hwumi mi hu. Se kɛ̃ ɔ, pi adesahi a mɔde bɔmi nɛ ma tsu enɛ ɔ he ní. Baiblo ɔ de ke:

•   Mawu ma ha nɛ ‘tahi a se maa po ngɛ zugba a nɔ tsuo.’​—La 46:9.

•   Mawu ma dla nɔ́ fɛɛ nɔ́ nɛ tahi puɛ ɔ. “E ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu. Blema ní ɔmɛ be kɛ ho.”​—Kpo Jemi 21:4.

•   Mawu ma ha nɛ tue mi jɔmi maa hi si kɛ maa ya neneene. “Haomi ko haomi ko be ye ma a nya gbae, nɛ tue mi jɔmi kɛ he jɔmi maa hi a we ɔmɛ a mi.”​—Yesaya 32:18.

 Baiblo ɔ gba kɛ fɔ si kaa, tahi kɛ ní kpahi nɛ a ngɛ nɔ yae mwɔnɛ ɔ tsɔɔ kaa e be kɛe nɛ tue jɔmi be nɛ a wo ta nɛ ɔ maa ba.

 Mɛni blɔ nɔ Mawu maa gu kɛ ha nɛ tue mi jɔmi nɛ ɔ nɛ ba hwɔɔ se? E maa pee enɛ ɔ kɛ gu e hiɔwe Matsɛ Yemi ɔ loo e nɔ yemi ɔ nɔ. (Mateo 6:10) Ke o suɔ nɛ o le nɔ́ nɛ Matsɛ Yemi nɛ ɔ ji kɛ bɔ nɛ o ma ná he se ha a, moo hyɛ video kpiti nɛ ji Mɛni Ji Mawu Matsɛ Yemi ɔ?