YAA NƆ NƐ O HWƆƆ!
2022: Jeha Nɛ Níhi Pee Basaa Ngɛ Je ɔ Mi—Mɛni Baiblo ɔ De?
Ngɛ jeha 2022 ɔ mi ɔ, wa nu amaniɛ bɔmihi nɛ kɔɔ ta, sika he nyagba, kɛ zugba a nɛ e ngɛ puɛe ɔ he wawɛɛ. Baiblo ɔ pɛ lɛ ha nɛ wa le nɔ́ tutuutu nɛ ní nɛ ɔmɛ nɛ a ngɛ nɔ yae ɔ tsɔɔ.
Nɔ́ tutuutu nɛ níhi nɛ a ya nɔ ngɛ jeha 2022 ɔ mi ɔ tsɔɔ
Níhi nɛ ya nɔ ngɛ jeha nɛ be ɔ mi ɔ ha nɛ e pee heii kaa, wa ngɛ behi nɛ Baiblo ɔ tsɛɛ ke “nyagbe ligbi ɔmɛ” a mi. (2 Timoteo 3:1) Be nɛ ɔ je sisi ngɛ jeha 1914 ɔ mi. Moo hyɛ bɔ nɛ níhi nɛ ngɛ nɔ yae ɔ kɛ nɔ́ nɛ Baiblo ɔ de kaa e maa ba mi ngɛ wa be nɛ ɔ mi ɔ kɔ ha:
“Tahi.”—Mateo 24:6.
“Jeha 2022 ɔ Ji Jeha Nɛ Ta Nɛ Puɛ Ní Wawɛɛ ɔ Kpale Ba Ngɛ Yuropa.” a
Hyɛ munyu nɛ ji “Russia Ya Tua Ukraine.”
“Hwɔ.”—Mateo 24:7.
“Jeha 2022: Jeha Nɛ Hwɔ Nɛ Nya Wa Ba Je ɔ Mi.” b
Hyɛ munyu nɛ ji “Ta Nɛ A Ngɛ Hwue Ngɛ Ukraine ɔ Ha Nɛ Hwɔ Ba Je ɔ Tsuo Nɔ.”
“Gbenɔ hiɔhi nɛ sãa nɔ.”—Luka 21:11.
“Hiɔ nɛ ji polio ɔ kpale ba, nɛ hiɔ nɛ ji monkeypox ɔ hu ba pee nyagba agbo, nɛ COVID-19 ɔ hu ya nɔ nɛ e ngɛ nihi awi yee wawɛɛ. Ní nɛ ɔmɛ ha nɛ e pee heii kaa hiɔhi nɛ sãa nɔ ɔ ngɛ gbeye wawɛɛ, nɛ a ma nyɛ maa ye adesahi awi.” c
Hyɛ munyu nɛ ji “COVID Hiɔ ɔ Gbe Nihi Ayɔ 6 Sɔuu.”
“Gbeye níhi.”—Luka 21:11.
“Kɔɔhiɔ mi nɛ ngɛ la dɔe wawɛɛ, hiɔmi nɛ e nɛ́, la nɛ e puɛɔ ní, kɛ nyu nɛ baa nɛ́ e jeɔ nihi ɔ ngɛ nɔ yae wawɛɛ. A maa ya nɔ ma kai jeha 2022 ɔ wawɛɛ, ejakaa ngɛ jeha nɛ ɔ mi ɔ kɔɔhiɔ mi tsakemi nɛ nya wa wawɛɛ ba si abɔ, nɛ lɔ ɔ kpata níhi babauu a hɛ mi, e ha nɛ nihi akpehi abɔ gbo, nɛ nihi ayɔhi abɔ a wehi bɔ mɛ.” d
Hyɛ munyu nɛ ji “Je ɔ Mi Ngɛ La Dɔe Wawɛɛ Nitsɛ Nɛ A Nɛ́ Eko Hyɛ.”
“Basabasa peemihi.”—Luka 21:9.
“Nihi a mi mi fu wawɛɛ ngɛ sika he nyagbahi nɛ ngɛ bae ɔ he, titli ɔ, ngɛ níhi a he jua nɛ ngɛ wae ɔ he je, nɛ lɔ ɔ ha nɛ a te si kɛ si nɔ yemi ɔmɛ ngɛ jeha 2022 ɔ mi.” e
Hyɛ munyu nɛ ji “Níhi A He Jua Nɛ́ Ngɛ Wae Wawɛɛ.”
Mɛni maa ya nɔ ngɛ jeha nɛ maa nyɛɛ se ɔ mi?
Nɔ ko be nyɛe maa le nɔ́ nɛ maa ya nɔ ngɛ jeha 2023 ɔ mi. Nɔ́ nɛ wa le ji kaa e be kɛe nɛ Mawu Matsɛ Yemi ɔ, aloo hiɔwe nɔ yemi ɔ maa ngɔ tsakemi ngua kɛ ba zugba a nɔ. (Daniel 2:44) Nɔ yemi nɛ ɔ ma je nɔ́ nɛ ha nɛ adesahi ngɛ nɔ́ nae ɔ kɛ je, nɛ e ma ha nɛ́ a pee Mawu suɔmi nya ní ngɛ zugba a nɔ.—Mateo 6:9, 10.
Wa ngɛ mo he wami woe nɛ o kɛ Yesu ga womi ɔ nɛ tsu ní nɛ ‘o ya nɔ nɛ o hwɔɔ’ ngɛ bɔ nɛ níhi nɛ ngɛ nɔ yae ngɛ je ɔ mi ɔ ha nɛ Baiblo gbami ngɛ mi bae ha a he. (Maako 13:37) Wa kpa mo pɛɛ nɛ o su wa he konɛ o kase níhi fuu kɛ kɔ bɔ nɛ Baiblo ɔ maa ye bua mo amlɔ nɛ ɔ, kɛ bɔ nɛ e ma nyɛ ma ha o kɛ o weku ɔ nɛ́ ná hwɔɔ se si himi kpakpa he hɛ nɔ kami nitsɛnitsɛ ha a he.
a AP News, “Jeha 2022 ɔ Ji Jeha Nɛ Ta Nɛ Puɛ Ní Wawɛɛ ɔ Kpale Ba Ngɛ Yuropa,” nɔ nɛ ngma ji Jill Lawless, ngɛ December 8, 2022.
b World Food Programme, “Hwɔ Nɛ Ngɛ Bae Ngɛ Je Kɛ Wɛ.”
c JAMA Health Forum, “Si Himi Ngɛ́ Be Ko Nɛ Hiɔ Nɛ Sãa Nɔ ɔ He Si Ngɛ Mi ɔ Mi—Kɛ Je COVID-19 Nɔ Kɛ Ya Si Monkeypox, Polio, Kɛ Disease X ɔ Nɔ,” nɔ nɛ ngma ji Lawrence O. Gostin, JD, ngɛ September 22, 2022.
d Earth.Org, “Mɛni Lɛ Ha Nɛ Kɔɔhiɔ Mi Tsake Wawɛɛ Nɛ A Nɛ́ Eko Hyɛ Ngɛ Jeha 2022 ɔ Mi ɔ?” nɔ nɛ ngma ji Martina Igini, ngɛ October 24, 2022.
e Carnegie Endowment for International Peace, “Nihi A Mi Mi Nɛ Fu Wawɛɛ Ngɛ Sika He Nyagbahi Nɛ Ngɛ Bae ɔ He ɔ Ha Nɛ Nihi Tsɔ Atuã Wawɛɛ Ngɛ Jeha 2022 ɔ Mi,” nihi nɛ a ngma ji Thomas Carothers kɛ Benjamin Feldman, ngɛ December 8, 2022.
Eko ɔ, O Bua Maa Jɔ Enɛ ɔ Hu He
HWƆƆMI MƆ
E Be Kɛe Nɛ Mawu Maa Po Nɔ́ Nami Tsuo Se
Kɛ wa ma plɛ kɛ le kaa e be kɛe nɛ Mawu maa po nɔ́ nami tsuo se ha kɛɛ?
ESSENTIAL BIBLE TEACHINGS
Mɛni Ji Mawu Matsɛ Yemi ɔ?
Yesu tu Mawu Matsɛ Yemi ɔ he munyu wawɛɛ pe ní kpahi ngɛ e fiɛɛmi ní tsumi ɔ mi. E se nyɛɛli ɔmɛ kɛ jeha babauu sɔle konɛ Matsɛ Yemi ɔ nɛ ɔ nɛ ba.
BAIBLO TSƆƆMIHI NƐ A HE HIA
Mawu Matsɛ Yemi ɔ Bɔni Nɔ Yemi Kɛ Je Jeha 1914 ɔ
Maa pee jeha 2,500 kɛ se ji nɛ ɔ, Mawu ha nɛ matsɛ ko nɛ ngɛ he wami ɔ nla nlami ko nɛ́ e ji gbami, nɛ e ngɛ mi bae mwɔnɛ ɔ.
WA HE SANEHI
Mo Bi Nɛ A Ba Slaa Mo
Nyɛ ma nyɛ ma susu Baiblo mi sane bimi ko he, aloo nyɛ ma nyɛ maa kase Yehowa Odasefohi a he ní.
