Yohane Sane Kpakpa a 20:1-31
20 Ngɛ otsi ɔ we kekleekle ligbi ɔ nɔ mɔtu mla benɛ je mi tsɔ we lolo ɔ, Maria Magdalena ba yɔkɔ* ɔ he, nɛ e na kaa a je tɛ ɔ kɛ je yɔkɔ* ɔ nya momo.
2 Lɔ ɔ he ɔ, e tu fo kɛ ba Simon Petro kɛ kaselɔ kaketsɛ ɔ nɛ Yesu suɔ e sane ɔ a ngɔ nɛ e ba de mɛ ke: “A ngɔ Nyɔmtsɛ ɔ kɛ je yɔkɔ ɔ mi kɛ ho, nɛ wa li he nɛ a ya to lɛ ngɛ.”
3 Kɛkɛ nɛ Petro kɛ kaselɔ kaketsɛ ɔ a ma blɔ nɔ kɛ yaa yɔkɔ ɔ he.
4 Mɛ ni enyɔ ɔmɛ tsuo a bɔni fo tumi, se kaselɔ kaketsɛ ɔ fo mi wa pe Petro, nɛ e ya su yɔkɔ ɔ he kekle.
5 E kɔkɔ e yi si nɛ e na klala amɛ nɛ a pueɔ si ngɛ lejɛ ɔ, se e sɛ we mi.
6 Lɔ ɔ se ɔ, Simon Petro hu nyɛɛ e se kɛ ba, nɛ lɛɛ e sɛ yɔkɔ ɔ mi. Nɛ e na klala amɛ nɛ a pueɔ si ngɛ lejɛ ɔ.
7 Bo ɔ nɛ jinɛ a kɛ fĩ e yi ɔ piɛɛ we bo kpa amɛ a he ngɛ he kake, mohu ɔ, a koklo lɛ kɛ fɔ he ko banee.
8 Kɛkɛ nɛ kaselɔ kaketsɛ ɔ nɛ e su yɔkɔ ɔ he kekle ɔ hu sɛ mi, nɛ e na nɛ e he ye.
9 Ejakaa loloolo ɔ, a nui ngmami ɔ sisi kaa e sa nɛ e te si kɛ je gbeje.
10 Enɛ ɔ he ɔ, kaseli ɔmɛ kpale a se kɛ ho a wehi a mi ya.
11 Se loloolo ɔ, Maria lɛɛ e daa si ngɛ kpo ɔ nya ngɛ yɔkɔ ɔ he, nɛ e ngɛ ya foe. Benɛ e ngɛ ya a foe ɔ, e kɔkɔ e yi si nɛ e hyɛ yɔkɔ ɔ mi,
12 nɛ e na bɔfohi enyɔ kɛ a he tade hiɔ nɛ a hii si ngɛ he nɛ jinɛ a ngɔ Yesu gbogboe ɔ kɛ fɔ ɔ, nɔ kake ngɛ e yi tetle mi je, nɛ nɔ kake hu ngɛ e nane si je.
13 Nɛ a bi lɛ ke: “Yo, mɛni he je nɛ o ngɛ ya foe ɔ?” E de mɛ ke: “A ba ngɔ ye Nyɔmtsɛ ɔ kɛ ho, nɛ i li he nɛ a ya to lɛ ngɛ.”
14 Benɛ e de enɛ ɔ se ɔ, e plɛ e he nɛ e na Yesu nɛ e daa si ngɛ lejɛ ɔ, se e li kaa Yesu.
15 Yesu bi lɛ ke: “Yo, mɛni he je nɛ o ngɛ ya foe ɔ? Mɛnɔ o ngɛ hlae?” Akɛnɛ Maria susu kaa nɔ ɔ ji abɔɔ ɔ nɔ hyɛlɔ he je ɔ, e de lɛ ke: “Etsɛ, ke mo lɛ o ba ngɔ lɛ kɛ je hiɛ ɔ, lɛɛ tsɔɔ mi he nɛ o ya to lɛ ngɛ, konɛ ma ya ngɔ lɛ kɛ ho.”
16 Yesu de lɛ ke: “Maria!” Benɛ Maria plɛ e he ɔ, e de lɛ ngɛ Hebri gbi mi ke: “Rabboni!” (e sisi ji, “Tsɔɔlɔ!”)
17 Yesu de lɛ ke: “Jɔɔ ye he kplami, ejakaa i kuɛ kɛ yɛ Tsɛ ɔ ngɔ lolo, mohu ɔ, yaa ye nyɛminyumu ɔmɛ a ngɔ nɛ o ya de mɛ ke, ‘I ngɛ kuɔe kɛ yaa ye Tsɛ ɔ kɛ nyɛ hu nyɛ Tsɛ ɔ, kɛ ye Mawu ɔ kɛ nyɛ hu nyɛ Mawu ɔ ngɔ.’”
18 Maria Magdalena ba nɛ e ba bɔ kaseli ɔmɛ amaniɛ. E de mɛ ke: “I na Nyɔmtsɛ ɔ!” Nɛ e de mɛ nɔ́ nɛ Nyɔmtsɛ ɔ de lɛ ɔ.
19 Jamɛ a ligbi ɔ gbɔkuɛ ɔ, nɛ ji otsi ɔ we kekleekle ligbi ɔ nɔ ɔ, akɛnɛ kaseli ɔmɛ ngɛ Yuda bi ɔmɛ gbeye yee he je ɔ, a ngmɛ sinya amɛ a mi ngɔ wo a yi ngɛ he nɛ a ngɛ ɔ, Yesu ba nɛ e ba da si ngɛ a kpɛti nɛ e de mɛ ke: “Tue mi jɔmi ha nyɛ.”
20 Benɛ e de nɔ́ nɛ ɔ se ɔ, e ngɔ e dɛ mi kɛ e kasa mi ɔ kɛ tsɔɔ mɛ. Kɛkɛ nɛ e kaseli ɔmɛ nya kaa a na Nyɔmtsɛ ɔ.
21 Yesu de mɛ ekohu ke: “Tue mi jɔmi ha nyɛ. Kaa bɔ nɛ ye Tsɛ ɔ tsɔ mi ɔ, jã kɛ̃ nɛ imi hu i ngɛ nyɛ tsɔe.”
22 Benɛ e de nɔ́ nɛ ɔ se ɔ, e mu pue a nɔ nɛ e de mɛ ke: “Nyɛ nine nɛ e su mumi klɔuklɔu ɔ nɔ.”
23 Ke nyɛ ngɔ nɔ ko he yayamihi kɛ pa lɛ ɔ, a kɛ pa lɛ; ke nyɛ ngmɛɛ we nɔ ko yayamihi a he ɔ, a ngmɛɛ we he.
24 Se Toma, Ni Nyɔngma Kɛ Enyɔ ɔmɛ a kpɛti nɔ kake, nɔ nɛ a tsɛɛ lɛ ke Hayo ɔ piɛɛ we a he benɛ Yesu ba a.
25 Lɔ ɔ he ɔ, kaseli ɔmɛ de lɛ ke: “Wa na Nyɔmtsɛ ɔ!” Se e de mɛ ke: “Ke i nɛ plɛɛko pa amɛ a nya ngɛ e dɛ mi, nɛ́ ma ngɔ ye nine nguɛ kɛ ta plɛɛko pa amɛ* a he, nɛ́ ma ngɔ ye nine kɛ hɔ e kasa mi ɔ, i be hee ma ye gblegbleegble.”
26 Maa pee ligbi kpaanyɔ se ɔ, e kaseli ɔmɛ ngɛ tsu mi ekohu, nɛ Toma hu piɛɛ a he. E ngɛ mi kaa a ngmɛ sinya a mi mohu lɛɛ, se Yesu ba nɛ e ba da si ngɛ a kpɛti nɛ e de ke: “Tue mi jɔmi ha nyɛ.”
27 Lɔ ɔ se ɔ, e de Toma ke: “Ngɔɔ o nine nguɛ kɛ ba wo hiɛ ɔ, nɛ hyɛ ye dɛ mi, nɛ ngɔɔ o nine kɛ ba hɔ ye kasa mi, konɛ o he ye nɛ o yi mi nɛ jɔɔ mo enyɔɔnyɔ peemi.”*
28 Toma he nɔ nɛ e de lɛ ke: “Ye Nyɔmtsɛ kɛ ye Mawu!”
29 Yesu de lɛ ke: “Nami nɛ o na mi ɔ he je nɛ o he ye ɔ lo? Nihi nɛ a nɛ, se kɛ̃ ɔ, a heɔ yeɔ ɔ ngɛ bua jɔmi.”
30 Ngɛ anɔkuale mi ɔ, Yesu pee okadi kpahi fuu ngɛ kaseli ɔmɛ a hɛ mi nɛ́ a ngmɛ ngɛ womi kpo nɛ ɔ mi.
31 Se enɛ ɔmɛ lɛɛ a ngma kɛ fɔ si konɛ nyɛ he ye kaa Yesu ji Kristo ɔ, Mawu Bi ɔ nɛ, nɛ ke nyɛ he ye ɔ, nyɛ ma ná wami kɛ gu e biɛ ɔ nɔ.
Sisi Ningmahi
^ Aloo “kaimi yɔkɔ.”
^ Aloo “kaimi yɔkɔ.”
^ Aloo “pa doku ɔmɛ.”
^ Hela, “kpa atsinyɛ jemi.”
