Kɛ Ya Ha Roma Bi Ɔmɛ 10:1-21
10 Nyɛmimɛ, ngɛ anɔkuale mi ɔ, a yi wami hemi ji nɔ́ nɛ ye tsui suɔ nɛ i kpaa Mawu pɛɛ wawɛɛ kɛ haa mɛ ngɛ he.
2 Ejakaa i yeɔ a he odase kaa a hɛ dɔɔ ngɛ Mawu he, se a li lɛ saminya.
3 Ejakaa akɛnɛ a li Mawu dami ɔ, se mohu a ngɛ hlae nɛ a ngɔ mɛ nitsɛmɛ a nɔ́ kɛ ma si he je ɔ, a bɛ a he si kɛ ha we Mawu dami ɔ.
4 Ejakaa Kristo ji Mlaa a nyagbe, konɛ nɔ fɛɛ nɔ nɛ e heɔ yeɔ ɔ nɛ e ná dami.
5 Ejakaa Mose ngma ngɛ dami nɛ jeɔ Mlaa a mi ɔ he ke: “Adesa nɛ peeɔ ní nɛ ɔmɛ ɔ maa hi wami mi kɛ gu a nɔ.”
6 Se dami nɛ je hemi kɛ yemi mi ɔ deɔ ke: “Ko de ngɛ o tsui mi ke, ‘Mɛnɔ maa kuɔ kɛ ya hiɔwe?’ lɔ ɔ ji kaa a, konɛ e ya ngɔ Kristo kɛ kple si kɛ ba,
7 aloo, ‘Mɛnɔ ma kple si kɛ ya muɔ voo ɔ mi?’ lɔ ɔ ji kaa a, konɛ e ya ngɔ Kristo kɛ je gbeje kɛ kuɔ kɛ ba.”
8 Se mɛni e ngɛ dee? “Munyu ɔ ngɛ o kasa nya haa, ngɛ mo nitsɛ o nya mi kɛ mo nitsɛ o tsui mi”; lɔ ɔ ji, hemi kɛ yemi “munyu ɔ” nɛ wa ngɛ fiɛɛe ɔ nɛ.
9 Ejakaa ke o kɛ o nya jajeɔ ngɛ ma hɛ mi kaa Yesu ji Nyɔmtsɛ, nɛ o heɔ yeɔ ngɛ o tsui mi kaa Mawu tle lɛ si kɛ je gbeje ɔ, a ma he o yi wami.
10 Ejakaa tsui nɛ nɔ kɛ heɔ yeɔ kɛ yaa dami mi, se nya nɛ nɔ kɛ jajeɔ ngɛ ma hɛ mi kɛ yaa yi wami hemi mi.
11 Ejakaa ngmami ɔ deɔ ke: “Nɔ ko be nɛ e ngɔɔ e hemi kɛ yemi ɔ kɛ fɔɔ e nɔ nɛ e nine maa nyɛ si.”
12 Ejakaa slɔɔto ko be Yuda no kɛ Hela no a kpɛti. Nyɔmtsɛ kake lɛ mɛ tsuo a ngɛ, nɛ e ji niatsɛ kɛ ha nihi tsuo nɛ a tsɛɔ lɛ ɔ.*
13 Ejakaa “nɔ fɛɛ nɔ nɛ e tsɛɔ Yehowa* biɛ ɔ, a ma he e yi wami.”
14 Se ke a ná we hemi kɛ yemi ngɛ e mi ɔ, kɛ a ma plɛ kɛ tsɛ lɛ kɛɛ? Jehanɛ ɔ, kɛ a ma plɛ kɛ ná hemi kɛ yemi ngɛ nɔ nɛ a nui e he sane ko hyɛ ɔ mi kɛɛ? Jehanɛ ɔ, ke nɔ ko be nɛ e maa fiɛɛ ɔ, kɛ a ma plɛ kɛ nu kɛɛ?
15 Nɛ jehanɛ ɔ, ke a tsɔ we mɛ ɔ, kɛ a ma plɛ kɛ ya fiɛɛ kɛɛ? Kaa bɔ nɛ a ngma ke: “Hyɛ bɔ nɛ ní kpakpahi a he sane kpakpa jajeli ɔmɛ a nanehi a he ngɛ fɛu ha!”
16 Se mɛ tsuo a bui sane kpakpa a tue. Ejakaa Yesaya de ke: “Yehowa,* mɛnɔ he nɔ́* nɛ a nu kɛ je wa ngɔ ɔ ye?”
17 Enɛ ɔ he ɔ, hemi kɛ yemi nyɛɛɔ nɔ́ nɛ a nu ɔ se. Nɛ nɔ́ nɛ a nu ɔ guɔ Kristo he munyu ɔ nɔ.
18 Se i ngɛ bie ke, Anɛ nuimi nɛ a nui lo? Hyɛ, ngɛ anɔkuale mi ɔ, “a gbi ɔ jije kɛ kpa zugba a tsuo nɔ, nɛ a sɛ gbi ɔ ya su zugba a* nyagbe he ɔmɛ.”
19 Se i ngɛ bie ke, anɛ limi nɛ Israel li lo? Kekleekle ɔ, Mose de ke: “Ma gu nɔ́ ko nɛ pi je ma ko ɔ nɔ kɛ ha nɛ nyɛɛ je hunga; nɛ ma gu ma nɛ be juɛmi nɔ kɛ wo nyɛ abofu wawɛɛ.”
20 Se Yesaya náa kã wawɛɛ nɛ e deɔ ke: “Nihi nɛ a hla we ye se blɔ ɔ, a na mi; nihi nɛ a bi we ye si ɔ, a ba le mi.”
21 Se e deɔ ngɛ Israel he ke: “Ngɛ ligbi mluku ɔ tsuo mi ɔ, i gbɛ ye dɛ mi ha nihi nɛ a tue gbo nɛ a tsui hu kplii ɔ.”
Sisi Ningmahi
^ Aloo “nɛ e haa nihi tsuo nɛ a tsɛɔ lɛ ɔ nɔ́ faa.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “amaniɛ bɔmi.”
^ Hela, “zugba a nɔ hehi nɛ nimli ngɛ ɔ.”
