Mateo Sane Kpakpa a 3:1-17
3 Jamɛ a be ɔ mi ɔ, Yohane Nɔ Baptisilɔ ɔ ba ngɛ fiɛɛe ngɛ Yudea nga a nɔ,
2 nɛ e ngɛ dee ke: “Nyɛ tsake nyɛ tsui, ejakaa hiɔwe Matsɛ Yemi ɔ su si ta.”
3 Ngɛ anɔkuale mi ɔ, nɔmlɔ nɛ ɔ he munyu nɛ Mawu tu kɛ gu gbalɔ Yesaya nɔ ɔ nɛ. E de ke: “Nɔ ko gbi ngɛ pɛe wawɛɛ ngɛ nga a nɔ ke: ‘Nyɛ dla Yehowa* blɔ ɔ! Nyɛ ha nɛ e gbɛjegbɛ ɔmɛ nɛ a da tlɔmɔɔ.’”
4 Jamɛ a be ɔ mi ɔ, tade nɛ Yohane wo ɔ, afukpɔngɔ he bwɔmi nɛ a kɛ lo, nɛ e mlɛ mi fimi nɔ́ ɔ hu lohwe he womi nɛ a kɛ pee. Ní nɛ e yeɔ ji baalɛhi kɛ nga nɔ hwo.
5 Nɛ nihi jeɔ Yerusalɛm kɛ Yudea kɛ mahi tsuo nɛ ngɛ Yɔdan Pa a he ɔ mi kɛ yaa e ngɔ
6 nɛ e baptisiɔ* mɛ ngɛ Yɔdan Pa a mi, nɛ a jajeɔ a he yayami ɔmɛ ngɛ ma hɛ mi.
7 Benɛ e na Farisi bi kɛ Saduki bi babauu nɛ a ma he nɛ e ngɛ nihi baptisie ngɛ ɔ, e de mɛ ke: “Nyɛ sinɔ duɔtsɛmɛ a nina, mɛnɔ bɔ nyɛ kɔkɔ ke nyɛɛ tu abofu nɛ ma a nya fo?
8 Lɛɛ nyɛɛ wo yiblii nɛ tsɔɔ kaa nyɛ tsake nyɛ tsui mɔ.
9 Nyɛ ko si nyɛ gugue nɛ nyɛ de nyɛ he ke, ‘Wɔɔ lɛɛ wa tsɛ ji Abraham.’ Ejakaa i ngɛ nyɛ dee ke Mawu ma nyɛ ma je bimɛ kɛ je tɛ nɛ ɔmɛ a mi kɛ ha Abraham.
10 Gbiɛ ɔ fɔɔ si ngɛ tso ɔmɛ a sipoku ɔ nɔ momo. Lɔ ɔ he ɔ, tso fɛɛ tso nɛ e wui yiblii nɛ hi ɔ, a maa po kɛ fɔ si, nɛ a ma sake kɛ fɔ la mi.
11 Imi lɛɛ, i ngɔɔ nyu kɛ baptisiɔ nyɛ ngɛ nyɛ tsui nɛ nyɛ tsake ɔ he je, se nɔ nɛ e ma ngɛ ye se ɔ nɔ kuɔ pe mi, nɛ e tokota tete po, i sɛ nɔ nɛ e jeɔ. Lɛɛ lɛɛ e maa ngɔ mumi klɔuklɔu, kɛ la kɛ baptisi nyɛ.
12 E hɛɛ e ngma mi sami nɔ́ ɔ ngɛ e dɛ mi, nɛ e maa bɛɛ e ngma mi sami he ɔ nyaii nɛ e ma bua e ngma a nya kɛ wo nito he ɔ, se tsakati ɔ lɛɛ, e maa ngɔ la nɛ be hie gbemi ɔ kɛ maa sã.”
13 Lɔ ɔ se ɔ, Yesu je Galilea kɛ ba Yohane ngɔ ngɛ Yɔdan Pa a nya konɛ Yohane nɛ e baptisi lɛ.
14 Se Yohane ka kaa e maa tsi lɛ blɔ. E de lɛ ke: “Mɛni he je nɛ o ma ye ngɔ ɔ? Imi mohu nɛ e he hia kaa o baptisi mi.”
15 Yesu de lɛ ke: “Amlɔ nɛ ɔ lɛɛ moo kplɛɛ kɛkɛ, ejakaa ja jã loko wa maa gbe níhi tsuo nɛ a da a peemi nya.” Kɛkɛ nɛ Yohane kplɛɛ.
16 Benɛ e baptisi Yesu ta a, amlɔ nɔuu nɛ e je kpo ngɛ nyu ɔ mi; nɛ hyɛ! hiɔwe nya bli, nɛ e na Mawu mumi ɔ nɛ ngɛ si kplee kɛ ma e nɔ kaa lahuɛ.
17 Hyɛ! Gbi ko hu pɛ kɛ je hiɔwe ke: “Ye Bi ji nɛ ɔ nɛ, i suɔ lɛ, nɛ ye bua jɔ e he.”
