La 77:1-20
Kɛ ha la nɔ hyɛlɔ ɔ; ngɛ Yedutun* nɔ. La nɛ a Asaf po.
77 Ma kpa ngmlaa kɛ tsɛ Mawu;Ma wo ye gbi nɔ kɛ tsɛ Mawu, nɛ e maa nu ye he.
2 I hlaa Yehowa se blɔ ngɛ ye haomi ligbi nɔ.
Nyɔ mi ɔ, i yaa nɔ nɛ i woɔ ye nine nɔ kɛ tsɔɔ lɛ.*
Ye* bua hí womi.
3 Ke i kai Mawu ɔ, i kɛmɛɔ;I haoɔ nɛ ye he wami taa.* (Sela)
4 O ha we nɛ ma ma ye hɛngmɛ;I haoɔ nɛ i nyɛ we munyu tumi.
5 I kai blema lokoo,Jehahi nɛ be blema lokoo ɔ.
6 Nyɔ mi ɔ, i kaiɔ ye la a;*I susuɔ níhi a he ngɛ ye tsui mi;I* hlaa níhi a mi saminya.
7 Anɛ Yehowa ma sake wɔ kɛ fɔ he kɛ ya neneene lo?
Anɛ e be wɔ mɔbɔ nae hu lo?
8 E suɔmi nɛ se pui ɔ se po kɛ yaa neneene lo?
E si womi ɔ maa pee yaka kɛ ha yi nɔhi tsuo lo?
9 Anɛ Mawu hɛ je nɔ kaa e maa na wɔ mɔbɔ lo?Aloo e we abofu ɔ ha nɛ e mɔbɔ nami ɔ se po? (Sela)
10 I yaa nɔ nɛ i deɔ ke: “Nɔ́ nɛ haoɔ* mi ji:
Nɔ Nɛ E Nɔ Kuɔ Pe Kulaa a piɛɛ we wa he hu.”*
11 Ma kai Yah ní tsumi ɔmɛ;Ma kai nyakpɛ níhi nɛ o pee blema lokoo ɔ.
12 Nɛ ma pue ye yi mi tɛ ngɛ o ní tsumi ɔmɛ tsuo a he,Nɛ ma susu níhi nɛ o pee ɔmɛ a he.
13 Oo Mawu, o blɔ ɔmɛ ngɛ klɔuklɔu.
Oo Mawu, mawu te nɛɛ lɛ kle kaa mo?
14 Mo ji anɔkuale Mawu ɔ, nɔ nɛ peeɔ nyakpɛ níhi ɔ nɛ.
O je o he wami ɔ kpo kɛ tsɔɔ ma amɛ.
15 O kɛ o he wami* ɔ kpɔ̃ o we bi ɔmɛ,Yakob bimɛ ɔmɛ kɛ Yosef bimɛ ɔmɛ. (Sela)
16 Oo Mawu, nyu ɔmɛ na mo;Nyu ɔmɛ na mo nɛ a hao.
Nɛ nyuhi nɛ a mi kuɔ ɔ gli.
17 Bɔku ɔmɛ nɛ nyu kɛ pue si.
Hiɔwe bɔku ɔmɛ si,Nɛ o kɛ̃ɛ̃ mi bi ɔmɛ te kɛ be ngɛ kɔɔhiɔ mi.
18 O hiɔwe simi ɔ pɛɛ kaa ta zugba lɛhi a nane nya pɛmi;Oslabai la a ha nɛ je ɔ mi* pee heii;Zugba a mimiɛ nɛ e hoso.
19 O blɔ ɔ gu wo ɔ mi,O nane blɔ ɔ gu nyu ɔmɛ a mi;Se a nɛ o nane nya.
20 O gu Mose kɛ Aaron nɔ*Kɛ nyɛɛ o we bi ɔmɛ a hɛ mi kaa to kuu.
Sisi Ningmahi
^ Ngɛ Hebri gbi mi ɔ, “i woɔ ye nine nɔ kɛ tsɔɔ lɛ nɛ ye nine gbo we.”
^ Aloo “Ye klaa.”
^ Ngɛ Hebri gbi mi ɔ, “ye mumi baa si.”
^ Aloo “ye saku la a.”
^ Ngɛ Hebri gbi mi ɔ, “Ye mumi ɔ.”
^ Aloo “Nɔ́ nɛ gbɔɔ.”
^ Ngɛ Hebri gbi mi ɔ, “Nɔ Nɛ E Nɔ Kuɔ Pe Kulaa a tsake bɔ nɛ e kɛ e hiɔ nine yeɔ kɛ buaa wɔ ha a.”
^ Ngɛ Hebri gbi mi ɔ, “o kɔni.”
^ Aloo “zugba a nɔ.”
^ Ngɛ Hebri gbi mi ɔ, “O gu Mose kɛ Aaron nine nɔ.”
