La 55:1-23
Kɛ ha la nɔ hyɛlɔ ɔ; á fia kpã sakuhi kɛ to he. Maskil.* David la.
55 Ao Mawu, moo bu ye sɔlemi tue,Nɛ pɛɛ nɛ i ngɛ kpae kaa o na mi mɔbɔ ɔ, ko ma o hɛ kɛ fɔ nɔ.*
2 Mo ta tue ha mi nɛ o he mi nɔ.
Ye haomi ɔ ha nɛ ye he mi jɔɛ mi,Nɛ i pee basaa
3 Ngɛ nɔ́ nɛ he nyɛlɔ ɔ ngɛ dee,Kɛ yi mi nɛ yiwutsotsɛ ɔ ngɛ mi wae ɔ he je.
Ejakaa a kɛ haomi babauu baa ye nɔ,Nɛ a kɛ abofu ná ye he ninyɛ.
4 Ye tsui ngɛ mi yee ngɛ ye mi,Nɛ gbenɔ he gbeye nu mi.
5 Gbeye nu mi, nɛ ye he do blibliibli,Nɛ i hoso.
6 I yaa nɔ nɛ i deɔ ke: “Ke i ngɛ pɛli kaa beleku lahuɛ ɔ,
Jinɛ i ko te kɛ ho, nɛ i ko ya hi he ko nɛ ngɛ slɔkee.
7 Hyɛ! I ko te kɛ ho he ko tsitsaa lokoo ya.
I ko ya hi nga a nɔ. (Sela)
8 I ko ya sa we ngɛ he ko esɔesɔKɛ je kɔɔhiɔ vuguvugu ɔ nya, kɛ je ahumi nɛ nya wa wawɛɛ ɔ nya.”
9 Oo Yehowa, mo futu a yi mi, nɛ́ o puɛ a yi mi tomi ɔmɛ,*Ejakaa i na basabasa peemi kɛ pɛ ngɛ ma a mi.
10 A nyɛɛɔ ma a gbogbo ɔmɛ a yi mi kɛ bɔleɔ si nyɔ kɛ pia;Yayami kɛ haomi ngɛ ma a mi.
11 Haomi ngɛ ma a mi;Yi mi wami kɛ nɔ sisimi se pui ngɛ ma a he nya buami he ɔ.
12 Pi he nyɛlɔ nɛ ngɛ mi ahlua bɔe ɔ;Kaa he nyɛlɔ ɔ, jinɛ i ko da nya.
Pi he nyɛlɔ nɛ te si kɛ wo mi ɔ;Kaa he nyɛlɔ ɔ, jinɛ i ko laa ye he ngɛ e he.
13 Se e ya pee mo, ye juã nyumu,*Imi nitsɛ ye huɛ nɛ i le lɛ saminya.
14 Jinɛ wa ji huɛmɛ nɛ nyu bi ngɛ wa kpɛti;Jinɛ wa piɛɛɔ nihi babauu a he, nɛ wa nyɛɛɔ kɛ yaa Mawu we ɔ.
15 Ha nɛ a hɛ mi nɛ kpata!
Ha nɛ á kple kɛ ho Yɔkɔ* mi ya hɛ ngmengmle;Ejakaa yayami kɛ mɛ ngɛ, nɛ e ngɛ a mi.
16 Se imi lɛɛ, ma kpa ngmlaa kɛ tsɛ Mawu,Nɛ Yehowa ma he ye yi wami.
17 Mɔtu, piani, kɛ gbɔkuɛ ɔ, i haoɔ nɛ i kɛmɛɔ,*Nɛ e nuɔ ye gbi.
18 E ma kpɔ̃ mi, nɛ e ma ha mi* tue mi jɔmi ngɛ nihi nɛ a kɛ mi ngɛ hwue ɔ a he,Ejakaa nimli babauu ba tua mi.
19 Mawu maa nu ye kue fami ɔ, nɛ e kɛ mɛ maa hwu,Lɛ nɛ e hii si ngɛ matsɛ sɛ nɔ kɛ je blema lokoo. (Sela)
Nihi nɛ a yi Mawu gbeye ɔMa kua kaa a maa pee tsakemi.
20 E* tua nihi nɛ tue mi jɔmi ngɛ e kɛ mɛ a kpɛti ɔ;E yi somi nɛ e kɛ mi so ɔ nɔ.
21 E munyuhi ngɛ tlotlootlo pe bɔta,Se pɛ ngɛ e tsui mi.
E munyuhi haa nɛ nɔ he jɔɔ lɛ pe nu,*Se a ngɛ kaa klaatehi nɛ a hia.
22 Ngɔɔ o tlomi ɔ kɛ fɔ Yehowa nɔ,Nɛ e maa baa o yi.
E be hae nɛ dalɔ nɛ nɔ si* kɔkɔɔkɔ.
23 Se mo Mawu, o maa tsɛ̃ yiwutsotsɛmɛ kɛ wo muɔ nɛ mi kuɔ pe kulaa mi.
Muɔ he fɔ yeli kɛ nɔ sisili nɛ ɔmɛ be a wami ligbi ɔ mi fã po yee.
Se imi lɛɛ, i kɛ ye hɛ maa fɔ o nɔ.
Sisi Ningmahi
^ Aloo “Nɛ ke i sɔle kɛ bi yemi kɛ buami ɔ, koo ngɔ o he kɛ laa mi.”
^ Ngɛ Hebri gbi mi ɔ, “o gba a lilɛ mi.”
^ Aloo “nyumu kaa imi.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “i peeɔ yeyeeye.”
^ Aloo “ye klaa.”
^ Lɛ ji nɔ nɛ be ko nɛ be ɔ, e ji e huɛ nɛ a tu e he munyu ngɛ kuku 13 kɛ 14 ɔ mi ɔ nɛ.
^ Ngɛ Hebri gbi mi ɔ, “E munyuhi ngɛ bɔdɔɔ pe nu.”
^ Aloo “dalɔ nɛ e dede.”
