La 34:1-22
La nɛ David la benɛ e bua pee e he godotsɛ ngɛ Abimelek hɛ mi, nɛ́ Abimelek fiee lɛ nɛ e je ɔ.
א [Alef]
34 Ma je Yehowa yi be fɛɛ be;Ye nya ma je e yi daa.
ב [Bet]
2 Ma* fĩa ngɛ Yehowa mi;Nihi nɛ a he jɔ ɔ maa nu, nɛ a ma nya.
ג [Gimel]
3 Nyɛɛ piɛɛ ye he nɛ wa wo Yehowa nɔ gojoo;Nyɛ ha nɛ waa pee kake kɛ wo e biɛ ɔ nɔ gojoo.
ד [Dalet]
4 I bi Yehowa nɔ́ nɛ ma pee, nɛ e tsɔɔ mi.
E kpɔ̃ mi kɛ je níhi tsuo nɛ woɔ ye he gbeye ɔ mi.
ה [He]
5 Nihi nɛ a ngɔ a hɛ kɛ fɔ e nɔ ɔ ná bua jɔmi;A hɛ mi be si puee kɔkɔɔkɔ.
ז [Zayin]
6 Nɔ nɛ pi nɔ ko ji lɛ* nɛ ɔ tsɛ Yehowa, nɛ e nu.
E he e yi wami ngɛ e haomi ɔmɛ tsuo a mi.
ח [Het]
7 Yehowa bɔfo ɔ poɔ nihi tsuo nɛ yeɔ Mawu gbeye ɔ a he piɛ,Nɛ e kpɔ̃ɔ mɛ.
ט [Tet]
8 Nyɛɛ ka* nɛ nyɛɛ hyɛ, nɛ nyɛ maa na kaa Yehowa hi;Nɔ nɛ saa we ngɛ e ngɔ ɔ ngɛ bua jɔmi.
י [Yod]
9 Nyɛɛ ye Yehowa gbeye, nyɛ e ni klɔuklɔu ɔmɛ tsuo,Ejakaa nihi nɛ yeɔ lɛ gbeye ɔ, nɔ́ ko hia we mɛ.
כ [Kaf]
10 Jatahi nɛ a he wa* po, hwɔ yeɔ mɛ,Se nihi nɛ hlaa Yehowa se blɔ ɔ, nɔ́ kpakpa ko be mɛ bɔe.
ל [Lamed]
11 Ye bimɛ, nyɛɛ ba nɛ nyɛ ba bu mi tue;Ma tsɔɔ nyɛ Yehowa gbeye yemi.
מ [Mem]
12 Ke o suɔ kaa o ná bua jɔmi ngɛ si himi mi,Nɛ́ o se nɛ kɛ ngɛ je mi, nɛ o bua nɛ jɔ ɔ,
נ [Nun]
13 Lɛɛ mo kudɔ o lilɛ ngɛ nɔ́ yayami he,Nɛ́ o hyɛ o nya nɔ ngɛ lakpa yemi he.
ס [Samek]
14 Je o he ngɛ nɔ́ yayami he, nɛ́ o pee nɔ́ kpakpa;Hla tue mi jɔmi se blɔ, nɛ o di se.
ע [Ayin]
15 Yehowa hɛngmɛ ngɛ dali a he,Nɛ e tue nuɔ ya nɛ a foɔ kɛ biɔ yemi kɛ buami ɔ.
פ [Pe]
16 Se nihi nɛ peeɔ ní yayamihi ɔ, Yehowa jeɔ e hɛ kɛ piɔ mɛ,Konɛ e ha nɛ a biɛ nɛ laa ngɛ zugba a nɔ.
צ [Tsade]
17 Dali kpa ngmlaa, nɛ Yehowa nu;E kpɔ̃ mɛ ngɛ a haomi ɔmɛ tsuo a mi.
ק [Kof]
18 Yehowa ngɛ nihi nɛ a tsui ku ɔ a kasa nya haa;E heɔ nihi nɛ a kɔni mi jɔ̃* ɔ a yi wami.
ר [Resh]
19 Dalɔ nɔ́ nami* hiɛ babauu,Se Yehowa kpɔ̃ɔ lɛ kɛ jeɔ lɛ tsuo mi.
ש [Shin]
20 E buɔ e wu ɔmɛ tsuo a he;Kake ngmelu po ku we.
ת [Taw]
21 Haomi maa gbe yiwutsotsɛ;Nihi nɛ a nyɛɔ dalɔ ɔ, a maa bu mɛ fɔ.
22 Yehowa baa e sɔmɔli a wami yi;*Nihi nɛ saa we ngɛ e ngɔ ɔ, a be a ti nɔ ko fɔ bue.
Sisi Ningmahi
^ Aloo “Ye klaa.”
^ E ngɛ heii kaa la tsɛ ɔ.
^ Ngɛ Hebri gbi mi ɔ, “Nyɛɛ sa nyɛ nya.”
^ Aloo “Jata ku wawi kɛ a kuɛ he bwɔmi.”
^ Aloo “nɛ a mumi ba si.”
^ Aloo “haomihi.”
^ Ngɛ Hebri gbi mi ɔ, “Yehowa kpɔ̃ɔ e sɔmɔli a klaa.”
