La 27:1-14
David la.
27 Yehowa ji ye la kɛ ye yi wami helɔ.
Mɛnɔ gbeye ma ye?
Yehowa ji nɔ nɛ poɔ ye wami he piɛ.
Mɛnɔ gbeye ma ye?
2 Benɛ nimli yayamihi nɛ a ji ye he nyɛli ba tua mi konɛ a ngɔ ye wami ɔ,Mɛ nitsɛmɛ a tɛ si nɛ a nɔɔ si.
3 Ke tabo ba tua mi po,Ye tsui be poe.
Ke ta ba ná mi ɔ,Lɔ ɔ po ma ya nɔ nɛ ma ngɔ ye hɛ kɛ fɔ Mawu nɔ.
4 Nɔ́ kake lɛ i bi ngɛ Yehowa dɛ—Lɔ ɔ nɛ ma hyɛ blɔ—Kaa ma hi Yehowa we ɔ ye wami ligbi ɔmɛ tsuo,Konɛ ma na bɔ nɛ Yehowa hi ha a,Nɛ́ i kɛ bua jɔmi nɛ hyɛ e sɔlemi we* ɔ.*
5 Ejakaa e maa ngɔ mi kɛ laa ngɛ e gba a sisi ngɛ haomi ligbi ɔ nɔ;E maa ngɔ mi kɛ laa ngɛ e bo tsu ɔ mi;E maa ngɔ mi kɛ da tɛsa nɛ ya hiɔwe nɔ.
6 Amlɔ nɛ ɔ, i ye ye he nyɛli nɛ a bɔle mi kɛ kpe ɔ nɔ kunimi;I kɛ bua jɔmi ngmlaa maa sã afɔlehi ngɛ e bo tsu ɔ mi;Ma la yi jemi lahi* kɛ ha Yehowa.
7 Oo Yehowa, ke i wo ye gbi nɔ kɛ tsɛ mo ɔ, moo bu mi tue;Moo na mi mɔbɔ nɛ o he mi nɔ.
8 I kai ngɛ ye tsui mi kaa o de ke:
“Nyɛ hla ye se blɔ.”*
Oo Yehowa, ma hla o se blɔ.*
9 Koo ngɔ o hɛ mi kɛ laa mi.
Koo fiee o sɔmɔlɔ ɔ kɛ ho ngɛ o we abofu ɔ mi.
Mo ji ye yemi kɛ bualɔ;Ye Mawu nɛ heɔ ye yi wami, ko kua mi, nɛ ko si mi hulɔ.
10 Ke imi nitsɛ ye tsɛ kɛ ye nyɛ kua mi po ɔ,Yehowa maa ngɔ mi.
11 Oo Yehowa, moo tsɔɔ mi ní ngɛ o blɔ ɔ nɔ,Ye he nyɛli ɔmɛ a he je ɔ, moo tsɔɔ mi dami blɔ ɔ.
12 Koo ngɔ mi kɛ wo ye he nyɛli ɔmɛ a* dɛ mi,Ejakaa lakpa odase yeli te si kɛ wo mi,Nɛ a ngɛ hlae nɛ a ye mi awi.
13 Ke i be hemi kɛ yemi kaa ma na Yehowa kpakpa peemi ɔNgɛ hɛ kali a zugba a nɔ ɔ, jinɛ jije i ko hi?*
14 Ngɔɔ o hɛ kɛ fɔ Yehowa nɔ;Moo pee kã, nɛ́ o he nɛ wa.
Ee, ngɔɔ o hɛ kɛ fɔ Yehowa nɔ.
Sisi Ningmahi
^ Aloo “jami he.”
^ Aloo “Nɛ ma hyɛ sɔlemi we ɔ nɛ ma pue ye yi mi tɛ ngɛ he.”
^ Aloo “Ma fia la.”
^ Ngɛ Hebri gbi mi ɔ, “Nyɛ hla ye hɛ mi nɛ́ nyɛɛ na.”
^ Ngɛ Hebri gbi mi ɔ, “ma hla o hɛ mi nɛ́ ma na.”
^ Aloo “ye he nyɛli ɔmɛ a klaa.”
^ Baiblo komɛ de ke “I ngɛ hemi kɛ yemi kaa ma na Yehowa kpakpa peemi ɔ ngɛ hɛ kali a zugba a nɔ kokooko.”
