La 145:1-21
David yi jemi la.
א [Alef]
145 Oo ye Mawu kɛ ye Matsɛ, ma wo o nɔ gojoo,Ma je o biɛ ɔ yi kɛ ya neneene.
ב [Bet]
2 Ma je o yi ligbi ɔ tsuo;Ma je o biɛ ɔ yi kɛ ya neneene.
ג [Gimel]
3 Yehowa kle nɛ e sa nɛ a je e yi wawɛɛ;E kle pe bɔ nɛ juɛmi ma nyɛ maa kpe he.*
ד [Dalet]
4 A ma je o ní tsumi ɔmɛ a yi kɛ ya yi nɔhi tsuo;A maa tu níhi nɛ o kɛ o he wami pee ɔmɛ a he munyu.
ה [He]
5 A maa tu o we agboje kɛ o hɛ mi nyami ɔ he munyu,Nɛ ma pue ye yi mi tɛ ngɛ o nyakpɛ ní tsumi ɔmɛ a he.
ו [Waw]
6 A maa tu nyakpɛ níhi nɛ o pee ɔmɛ a he munyu,*Nɛ ma jaje bɔ nɛ o kle ha a.
ז [Zayin]
7 Ke a kai o kpakpa peemi babauu ɔ, a ma je o yi wawɛɛ,Nɛ a kɛ bua jɔmi ma la ngɛ o dami ɔ he je.
ח [Het]
8 Yehowa mi mi sãã lɛ ngɛ nɔ he* nɛ e naa nɔ mɔbɔ,E mi mi fu we mla, nɛ e suɔmi nɛ se pui ɔ hiɛ babauu.
ט [Tet]
9 Yehowa peeɔ nihi tsuo kpakpa,Nɛ e mɔbɔ nami ɔ jeɔ kpo ngɛ e ní tsumi ɔmɛ tsuo a mi.
י [Yod]
10 Oo Yehowa, o ní tsumi ɔmɛ tsuo maa wo o hɛ mi nyami,Nɛ nihi nɛ a yeɔ mo anɔkuale ɔ ma je o yi.
כ [Kaf]
11 A maa jaje o matsɛ yemi nɛ hɛ mi ngɛ nyami ɔ,Nɛ a maa tu o he wami ɔ he munyu,
ל [Lamed]
12 Konɛ adesahi nɛ a le níhi nɛ o kɛ o he wami pee ɔmɛ,Kɛ o matsɛ yemi nɛ hɛ mi ngɛ nyami ɔ.
מ [Mem]
13 O matsɛ yemi ɔ ji neneene matsɛ yemi,Nɛ o nɔ yemi ɔ ngɛ kɛ yaa yi nɔhi tsuo.
ס [Samek]
14 Yehowa yeɔ kɛ buaa nihi tsuo nɛ a ngɛ si nɔɔe ɔ,Nɛ e woɔ nihi tsuo nɛ a miɔ nɛ a maa nɔ si ɔ a nɔ.
ע [Ayin]
15 O nɔ lɛ nihi tsuo ngɔɔ a hɛ kɛ fɔɔ;O haa mɛ niye ní ngɛ be nɛ sa mi.
פ [Pe]
16 O bliɔ o dɛ miNɛ o haa nɔ́ fɛɛ nɔ́ nɛ ngɛ wami mi ɔ nɔ́ nɛ e hia.
צ [Tsade]
17 Yehowa peeɔ nɔ́ nɛ da be fɛɛ be,Nɛ e yeɔ anɔkuale ngɛ nɔ́ fɛɛ nɔ́ nɛ e peeɔ ɔ mi.
ק [Kof]
18 Yehowa ngɛ nihi tsuo nɛ a tsɛɔ lɛ ɔ a kasa nya,Nihi tsuo nɛ a tsɛɔ lɛ ngɛ anɔkuale mi ɔ.
ר [Resh]
19 E haa nihi nɛ a yeɔ lɛ gbeye ɔ nɔ́ nɛ a hia;E nuɔ ya nɛ a foɔ kɛ biɔ yemi kɛ buami ɔ, nɛ e kpɔ̃ɔ mɛ.
ש [Shin]
20 Yehowa buɔ nihi tsuo nɛ a suɔ lɛ ɔ a he,Se yiwutsotsɛmɛ tsuo lɛɛ, e ma kpata a hɛ mi.
ת [Taw]
21 Ye nya maa jaje Yehowa yi jemi ɔ;Nɔ́ fɛɛ nɔ́ nɛ ngɛ wami mi ɔ* nɛ je e biɛ klɔuklɔu ɔ yi kɛ ya neneene.
Sisi Ningmahi
^ Aloo “pe bɔ nɛ a ma nyɛ maa nu sisi.”
^ Aloo “A maa tu o he wami ngua a he munyu.”
^ Aloo “Yehowa dlooɔ nɔ.”
^ Aloo “He lohi tsuo.”
