Hiob 7:1-21
7 Nɔmlɔ adesa wami ngɛ zugba a nɔ ngɛ kaa nɔ ko nɛ́ a nyɛɔ e nɔ kaa e tsu ní wawɛɛ.Nɛ e ligbi ɔmɛ ngɛ kaa apaatsɛ ligbihi.
2 E ngɛ kaa nyɔguɛ, e ná nɛ ligbi ɔ ba nyagbe,Nɛ e mlɛɔ e hiɔwo kaa bɔ nɛ apaatsɛ peeɔ ɔ.
3 Jã nɔuu kɛ̃ nɛ nyɔhiɔhi babauu ji nɛ ɔ nɛ́ se nami ko be ye wami he,A ha mi nyɔ mi babauu nɛ haomi hyi lɛ tɔ.
4 Ke i hwɔ si ɔ, i biɔ ke, ‘Mɛni be ma te si?’
Se ke nyɔ ɔ se kɛ ɔ, i hii plɛe ngɛ sa mi hluu kɛ ya siɔ makɛ.
5 Ye he womi tsuo wo gɔgɔ nɛ ye he tsuo pee kɛ mu kpɔbikpɔbi.Ye he tsuo pee kɛ pahi nɛ a hɛ mi gbli nɛ́ a mi ngɛ nyu jee.
6 Ye ligbi ɔmɛ ngɛ bee mlamlaamla kaa bo lolɔ kplɛ,Nɛ a baa nyagbe nɛ́ hɛnɔkami ko be.
7 Kai kaa ye wami ngɛ kaa kɔɔhiɔ,Nɛ ye hɛngmɛ be bua jɔmi* nae hu.
8 Hɛngmɛ nɛ́ ngɛ mi nae mwɔnɛ ɔ be mi nae hu;O ma hla mi, se jamɛ a be ɔ mi ɔ, i je.
9 Kaa bɔ nɛ bɔku gbɛɔ bɔɔbɔɔbɔɔ nɛ e laa a,Jã nɔuu nɛ nɔ nɛ yaa Yɔkɔ* mi ɔ kpale we kɛ bɛ hu.
10 E be kpalee kɛ ba e we mi hu,Nɛ e hi he ɔ be lɛ kaie hu.
11 Enɛ ɔ he ɔ, i be ye nya mae.
Ma tu munyu akɛnɛ ye tsui* ngɛ mi yee ɔ he je;Ma tu munyu ngɛ ye amanehlu ɔ mi!*
12 Anɛ wo ji mi aloo wo mi lohwe ngua ko ji mi,Nɛ lɔ ɔ he je e sa nɛ o to bulɔ ngɛ ye he lo?
13 Ke i de ke, ‘Ye satso maa wo ye bua;Nɛ he nɛ i hwɔɔ ɔ ma ha nɛ ye haomi ɔ maa ba si ɔ,’
14 Kɛkɛ o ha i nla nlamihi gbeyegbeyeNɛ o kɛ ninahi hu woɔ ye he gbeye,
15 Enɛ ɔ he ɔ, i ná nɛ i gbo* ejakaa ye mumi nya ta,Ee, i suɔ gbenɔ mohu pe ye nɔmlɔ tso nɛ ɔ.*
16 Ye wami gbe ye nya; I sume nɛ ma ya nɔ nɛ ma hi wami mi.
Ngmɛɛ ye he, ejakaa ye ligbi ɔmɛ ngɛ kaa mumi womi.
17 Mɛnɔ ji nɔmlɔ adesa nɛ o susuɔ e heNɛ o kɛ o juɛmi* maa e nɔ?
18 Mɛni he je nɛ o kɛ o hɛ maa e nɔ daa mɔtuNɛ o kaa lɛ be fɛɛ be ɔ?
19 O be o hɛ jee kɛ je ye heNɛ́ o ngmɛɛ ye he bɔɔ nɛ ma mi ye kuɔ mi nyu lo?
20 Ke i pee yayami po ɔ, kɛ ma plɛ kɛ ye mo awi kɛɛ, mo nɛ o hɛngmɛ ngɛ nimli adesahi a he?
Mɛni he je nɛ o je o hɛ kɛ pi mi ɔ?
Anɛ i plɛ pee tlomi ha mo lo?
21 Mɛni he je nɛ o kɛ ye yayami ɔmɛ ki miNɛ o ma we o hɛ kɛ fɔ ye tɔmi ɔmɛ a nɔ ɔ?
Ejakaa e be kɛe nɛ ma ya hwɔ si ngɛ zu mi,Nɛ o ma hla mi, se jamɛ a be ɔ mi ɔ, i je.
Sisi Ningmahi
^ Ngɛ Hebri gbi mi ɔ, “nɔ́ kpakpa.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “mumi.”
^ Aloo “ngɛ ye klaa nɛ dooɔ mi.”
^ Aloo “ye klaa ná nɛ e gbo.”
^ Ngɛ Hebri gbi mi ɔ, “mohu pe ye wuhi.”
^ Ngɛ Hebri gbi mi ɔ, “o kɛ o tsui.”
