Hiob 32:1-22
32 Enɛ ɔ he ɔ, nyumuhi etɛ nɛ ɔmɛ kpa Hiob munyu ɔmɛ a heto hami, ejakaa e he lɛ nitsɛ e he ye kaa dalɔ ji lɛ.*
2 Se Barakel nɛ je Buz ngɛ Ram weku ɔ mi ɔ binyumu Elihu mi mi fu wawɛɛ. E mi mi fu Hiob wawɛɛ kaa e ngɛ hlae nɛ e bu e he* dalɔ mohu pe Mawu.
3 E mi mi fu Hiob huɛmɛ etɛ ɔmɛ hu wawɛɛ ejakaa a nɛ heto kpakpa ko nɛ a ma ha lɛ, se mohu a bu Mawu fɔ.
4 Elihu mlɛ nɛ mɛ tsuo a kɛ Hiob tu munyu ta loko e ha Hiob heto, ejakaa a wa pe lɛ.
5 Benɛ Elihu na kaa nyumuhi etɛ ɔmɛ be heto ko nɛ a ma ha Hiob hu ɔ, e mi mi fu wawɛɛ.
6 Enɛ ɔ he ɔ, Barakel nɛ je Buz ɔ binyumu Elihu bɔni munyu tumi, nɛ e de ke:
“Niheyo kɛkɛ ji mi*Se nyɛ lɛɛ nikɔtɔmahi ji nyɛ.
Enɛ ɔ he ɔ, bumi nɛ i ngɛ kɛ ha nyɛ he je ɔ, i ma ye nya,Nɛ i ye gbeye kaa ma de nyɛ nɔ́ nɛ i le.
7 I de ke, ‘Ha nɛ nihi nɛ a wa a nɛ a tu munyu,*Nɛ ha nɛ nihi nɛ a jeha ya hɛ mi ɔ nɛ a tu munyu kaa juɛmitsɛmɛ.’
8 Se mumi nɛ ngɛ nihi a mi,Ee, Ope ɔ mumi nɛ e woɔ ɔ lɛ haa nɛ a náa nɔ́ sisi numi.
9 Tsa pi wami pɛ* kɛkɛ nɛ peeɔ nɔ ní lelɔ,Nɛ tsa pi nyumuhi nɛ a wa ngɛ jeha mi ɔ pɛ nɛ a le nɔ́ nɛ da.
10 Enɛ ɔ he ɔ, i ngɛ dee ke, ‘Moo bu mi tue,Nɛ imi hu ma de mo nɔ́ nɛ i le.’
11 Hyɛ! I mlɛ konɛ nyɛ de níhi nɛ nyɛ ma de ɔ;I ya nɔ nɛ i bu nyɛ níhi a he susumi ɔmɛ tueBe mi nɛ nyɛ ngɛ nɔ́ nɛ nyɛ ma de ɔ he susue ɔ.
12 I bu nyɛ tue saminya,Se nyɛ ti nɔ ko nɔ ko nyɛ we nɛ e tsɔɔ kaa Hiob sane dɛ*Aloo é ha e sane ɔmɛ a heto.
13 Enɛ ɔ he ɔ, nyɛ ko de ke, ‘Wa ngɛ juɛmi;Mawu ji nɔ nɛ maa tsɔɔ kaa e sane dɛ, pi adesa ko.’
14 Pi imi nɛ e tu munyu kɛ si,Enɛ ɔ he ɔ, pi munyuhi nɛ nyɛ tu ɔ nɛ́ ma kɛ ha lɛ heto.
15 A pee yaa, a be heto ko nɛ a ma ha hu;A be nɔ́ ko nɛ a ma de hu.
16 I mlɛ mɛ hluu, se a pa de we nɔ́ ko hu;A daa si kɛkɛ, a be heto ko nɛ a ma ha hu.
17 Enɛ ɔ he ɔ, imi hu ma de ye nɔ́;Imi hu ma de nɔ́ nɛ i le,
18 Ejakaa munyu hyi ye mi tɔ;Mumi nɛ ngɛ ye mi ɔ ngɛ mi tsitsɛɛe.
19 Ye mi mi blɔ pee kaa wai nɛ a nga nya kpɛkpɛtɛɛ,Kaa wai tɔ ehehi nɛ a miɔ nɛ a ma pɛ́.
20 Nyɛ ha nɛ ma tu munyu konɛ ye he nɛ jɔ mi!
Ma pa ye nya mi nɛ ma ha heto.
21 I be nɔ ko nɔ ko hɛ mi hyɛe;Nɛ i be munyu dɔkɔɔ tue ngɛ adesa ko he hulɔ,*
22 Ejakaa i li bɔ nɛ a tuɔ munyu dɔkɔɔ ha;Ke i pee nɔ́ ko kaa jã a, ye Bɔlɔ* ɔ kɛ oya yemi ma kpata ye hɛ mi.
Sisi Ningmahi
^ Aloo “ejakaa e da ngɛ lɛ nitsɛ e hɛ mi.”
^ Aloo “e klaa.”
^ Ngɛ Hebri gbi mi ɔ, “ligbihi nɛ i ye ɔ pi.”
^ Ngɛ Hebri gbi mi ɔ, “ligbihi nɛ a tu munyu.”
^ Aloo “Tsa pi ligbihi fuu pɛ.”
^ Aloo “e kã Hiob hɛ mi.”
^ Aloo “i kɛ blɔ nya biɛ ko be adesa ko tsɛe hulɔ.”
^ Ngɛ Hebri gbi mi ɔ, “Peelɔ.”
