Hiob 3:1-26
3 Enɛ ɔ se ɔ, Hiob bɔni munyu tumi nɛ e gbiɛ ligbi nɛ a fɔ lɛ ɔ.*
2 Hiob de ke:
3 “Ha nɛ ligbi nɛ a fɔ mi ɔ hɛ mi nɛ kpata,Kɛ jehanɛ se hu ɔ, nyɔ mi nɛ nɔ ko de ke: ‘A ngɔ binyumu hɔ ɔ!’
4 Ha nɛ jamɛ a ligbi ɔ nɛ plɛ pee diblii.
Mawu nɛ ngɛ hiɔwe ɔ nɛ ko susu jamɛ a ligbi ɔ he;La nɛ ko kpɛ ngɛ nɔ.
5 Ha nɛ diblii kpii* nɛ ngɔ jamɛ a ligbi ɔ.
Ha nɛ bɔku tuu nɛ ha nɔ.
Ha nɛ diblii nɛ ngɛ gbeye ɔ nɛ ye e la a nɔ kunimi.
6 Ha nɛ diblii kpii nɛ ngɔ jamɛ a nyɔ ɔ.E ko nya kɛ piɛɛ ligbi ɔmɛ a he ngɛ jeha a mi.Nɛ e ko piɛɛ ligbi ɔmɛ a he ngɛ nyɔhiɔ ɔ mi.
7 Ee! Ha nɛ jamɛ a nyɔ ɔ nɛ pee yosa;A ko nu bua jɔmi gbi ngɛ jamɛ a nyɔ ɔ mi.
8 Ha nɛ nihi nɛ a gbiɛɔ ligbi ɔ nɛ a gbiɛ jamɛ a nyɔ ɔ,Nɛ ha nɛ nihi nɛ́ a nyɛɔ tsɛ̃ɛ̃ɔ Leviatan* ɔ nɛ́ a gbiɛ jamɛ a nyɔ ɔ.
9 Ha nɛ dodoehi nɛ a ngɛ jamɛ a gbɔkuɛ enyɔ ɔmɛ a kpɛti ɔ nɛ wo diblii;Ha nɛ e mlɛ jamɛ a ligbi ɔ la a yaka gu.Nɛ ko ha nɛ e na mɔtu la a.
10 Ejakaa e nga we ye yayo fɔmi kotoku ɔ nya sinya a;Nɛ e ngɔɛ haomi kɛ laa konɛ ye hɛngmɛ nɛ ko na.
11 Mɛni he je nɛ i gbo we benɛ a fɔ mi ɔ?
Mɛni he je nɛ ye hɛ mi kpataa we benɛ i je fɔmi kotoku mi kɛ ba a.
12 Mɛni he je yayo ngɔ mi kɛ fɔ e tɛ nɔNɛ e ha mi nyɔ nɛ i pupɔ ɔ?
13 Kaa i gbo jamɛ a be ɔ, jinɛ be nɛ ɔ mi ɔ, i hwɔɔ si nɛ ye tue mi jɔ mi;Jinɛ i hwɔɔ si nɛ ye he mi jɔ mi
14 Jinɛ i kɛ zugba a nɔ matsɛmɛ kɛ a ga woli,Nihi nɛ a po mahi kɛ ha a he nɛ́ amlɔ nɛ ɔ a hɛ mi kpata,*
15 Aloo i kɛ ma nikɔtɔmahi nɛ a ngɛ sika tsu,Nɛ a we ɔmɛ a mi hyi kɛ sika hiɔ ɔ hwɔɔ si nɛ ye he mi jɔ mi.
16 Aloo mɛni he je nɛ i gbo we ngɛ ye nyɛ mi mi loko a fɔ mi,Kaa bimɛ nɛ a nɛ pu la gblee ɔ?
17 Ngɛ lejɛ ɔ, yiwutsotsɛmɛ po a haomi se poɔ;Nihi nɛ pɔ tɔ mɛ ɔ jɔɔ a he.
18 Ngɛ lejɛ ɔ, nihi tsuo nɛ a wo mɛ tsu ɔ a he mi jɔɔ mɛ;Nɛ nɔ ko nyɛ we a nɔ kaa a tsu ní.
19 Ngɛ lejɛ ɔ, slɔɔto ko be nimli nguahi kɛ nimli guhi a kpɛti,Nɛ nyɔguɛhi yeɔ a he ngɛ a nyɔmtsɛmɛ a dɛ mi.
20 Mɛni he je nɛ e haa nɔ nɛ ngɛ nɔ́ nae ɔ laNɛ e haa nihi nɛ a ngɛ aywilɛho yee wawɛɛ* ɔ wami ɔ?
21 Mɛni he je nɛ a hlaa kaa a ma gbo se a gbo we ɔ?
A tsuaa si kɛ hlaa lɛ wawɛɛ pe bɔ nɛ a hlaa juetli po,
22 Nihi nɛ a nyaa wawɛɛ,Nɛ́ a bua jɔɔ ke a na yɔkɔ.
23 Mɛni he je lɛ nɔmlɔ nɛ laa blɔ ɔ, e haa lɛ la a,Nɔ nɛ Mawu po piɛ kɛ wo e he ɔ?
24 Kɔmɔ yemi ba pee kaa ye niye ní,Nɛ ye kɛmɛmi ɔ pueɔ si kaa nyu.
25 Nɔ́ nɛ sawale nuɔ mi ngɛ he ɔ nɔuu lɛ ba ye nɔ ɔ nɛ,Nɛ nɔ́ nɛ i ngɛ gbeye yee ɔ ba ye nɔ.
26 I ná we tue mi jɔmi, he mi jɔmi kɛ mumi womi he,Nɛ ye haomi ɔmɛ hu a se pui.”
Sisi Ningmahi
^ Ngɛ Hebri gbi mi ɔ, “e gbiɛ e ligbi ɔ.”
^ Aloo “diblii kɛ gbenɔ nini.”
^ Nihi susuɔ kaa e ji nyaka aloo wo mi lohwe ngua ko nɛ ngɛ he wami.
^ Baiblo komɛ de ke “a po mahi nɛ́ amlɔ nɛ ɔ a pee ma dokuhi ɔ.”
^ Aloo “nihi nɛ a klaa hao wawɛɛ nitsɛ.”
