Hiob 14:1-22
14 Nɔmlɔ adesa nɛ yo fɔ lɛ ɔ,E wami ngɛ kpiti, se e mi haomi* hiɛ babauu.
2 E puɛɔ kaa mɔmɔ kɛkɛ e ngla;*E tuɔ fo kaa nini nɛ e laa.
3 Ee, o ngɔ o hɛngmɛ kɛ ma e nɔ,Nɛ mo nitsɛ o kɛ lɛ* ngɛ sane yee.
4 Anɛ nɔ ko nɛ he tsɔ ma nyɛ maa je nɔ ko nɛ he tsɔ we mi kɛ ba lo?
Nɔ ko nɔ ko be!
5 Ke a to e ligbi ɔmɛ kɛ fɔ si ɔ,Nyɔhiɔ abɔ nɛ e maa ye ɔ ngɛ o dɛ mi;O to huzu ha lɛ nɛ e be nyɛe maa be he.
6 Mo je o hɛngmɛ ngɛ e nɔ konɛ e ná he jɔmi bɔɔ,Kɛ ya si be nɛ e maa gbe e ligbi ɔmɛ a nya, kaa bɔ nɛ apaatsɛ peeɔ ɔ.
7 Ejakaa tsohi po ngɛ hɛnɔkami.
Ke a po fɔ si ɔ, e ma tsɛ̃ ekohu,Nɛ e kɔnihi nɛ tsɛ̃ ɔ maa ya nɔ maa wa.
8 Ke e sipoku ɔ se kɛ ngɛ zu miNɛ tso kpoku ɔ gbo ngɛ zu mi,
9 Nɛ e ná nɛ e nu nyu he pɛ, kɛkɛ e tsɛ̃;Nɛ e ma tsɛ̃ kɔnihi kaa tso ehe.
10 Se nɔmlɔ gboɔ, nɛ e fɔɔ si nɛ e nyɛ we nɔ́ ko nɔ́ ko peemi;Ke nɔmlɔ gbo ɔ, jije e ngɛ?
11 Nyu laa ngɛ wo mi,Nɛ pahi a mi nyu miiɔ nɛ a gbliɔ
12 Nɔmlɔ hu hwɔɔ si nɛ e ti si hu.
Kɛ yaa si be nɛ hiɔwe be hu ɔ, mɛ hu a be si tee hu,Loo kaa a maa tsɛ̃ɛ mɛ kɛ je a mahe ɔ mi.
13 Ao, i ná jinɛ o maa laa ye nɔ ngɛ Yɔkɔ* mi,Nɛ o maa laa ye nɔ kɛ ya si o we abofu ɔ maa be,I ná jinɛ o maa to be ha mi nɛ́ o kɛ ma kai mi!
14 Ke nɔmlɔ gbo ɔ, e maa kpale kɛ ba wami mi ekohu lo?
Be abɔ nɛ i ngɛ nyɔguɛ tso mi nɛ ɔ,Ma mlɛ kɛ ya si be nɛ a maa ngmɛɛ ye he.
15 O ma tsɛ, nɛ ma he nɔ.
O maa suɔ wawɛɛ kaa o maa na o nine nya ní tsumi ɔ.*
16 Se amlɔ nɛ ɔ lɛɛ, o yaa nɔ nɛ o kaneɔ ye nane hiami ɔmɛ tsuo;Ye he yayami ɔ pɛ lɛ o hyɛɔ.
17 O nga ye tɔmi ɔmɛ a nya kɛ wo baagi mi.Nɛ o kɛ gluu sɔu ye tɔmi ɔmɛ a nya.
18 Kaa bɔ nɛ yokuhi huleɔ kɛ pueɔ si nɛ́ a jeɔ a blɔhehiNɛ́ tɛsa amɛ kpɛneɔ kɛ jeɔ a blɔhehi,
19 Nɛ́ nyu haa nɛ tɛ he yeɔNɛ nyu nɛ ngɛ bee wawɛɛ fɔɔ zugba a nɔ zu kɛ jeɔ ɔ,Jã kɛ nɛ o puɛɔ nɔmlɔ adesa hɛnɔkami.
20 O yaa nɔ nɛ o yeɔ e nɔ kunimi kɛ ya siɔ benɛ e hɛ mi kpataa;O tsakeɔ bɔ nɛ e ngɛ ha kɛkɛ o wo lɛ blɔ.
21 A woɔ e bimɛ a hɛ mi nyami se e li;A pueɔ a hɛ mi si se e yɔse we.
22 Ke e ngɛ wami mi pɛ loko e naa nɔ́;Nɛ ke e ngɛ wami mi pɛ loko e* yeɔ kɔmɔ.
Sisi Ningmahi
^ Aloo “nyagbahi.”
^ Baiblo komɛ de ke “kɛkɛ a po ya fɔ he.”
^ Ngɛ Hebri gbi mi ɔ, “mi.”
^ Ngɛ Hebri gbi mi ɔ, “Sheol.” Hyɛ Munyu Komɛ A Sisi Tsɔɔmi.
^ Aloo “O hɛ ma ja ngɛ o nine nya ní tsumi ɔ he.”
^ Aloo “e klaa.”
