Ezekiel 4:1-17
4 “Nɛ mo, nɔmlɔ bi, yaa ngɔ bliikisi nɛ o kɛ fɔ o hɛ mi; nɛ o tɛni Yerusalem ma a ngɛ nɔ.
2 Mo sa ma a yi, moo fia gbogbo kɛ sa yi, nɛ o fia ta hwumi kpoku* kɛ wo he, nɛ o pee tabuli a sito hehi kɛ bɔle lɛ, nɛ o ngɔ tsohi nɛ a kɛ kuɔ gbogbohi kɛ pueɔ si ɔ kɛ bɔle lɛ.
3 Ngɔɔ dade pɛtɛɛ ko nɛ o kɛ pee dade gbogbo ngɛ o kɛ ma a nyɛ kpɛti. Lɔ ɔ se ɔ, plɛ o hɛ mi kɛ kpee ma a, nɛ o tsɔɔ bɔ nɛ a ma sa ma a yi ha. Enɛ ɔ maa pee okadi kɛ ha Israel we ɔ.
4 Jehanɛ ɔ, moo hwɔ o muɔ nɔ nɛ o ngɔ Israel we ɔ he yayami ɔ kɛ fɔ o nɔ.* O maa tloo a he yayami ɔmɛ ligbi abɔ nɛ o hwɔɔ si ngɛ o muɔ nɔ ɔ.
5 Nɛ i kɛ ligbi 390 maa fɔ o nɔ, ngɛ jeha abɔ nɛ a kɛ pee yayami ɔ nya, nɛ o maa tloo Israel we ɔ he yayami ɔ.
6 Moo bɔ mɔde nɛ o gbe nya.
“Lɔ ɔ se ɔ, o maa hwɔ o hiɔ nɔ, nɛ o maa tloo Yuda we ɔ he yayami ɔ ligbi 40. I ngɔ ligbi kake fɛɛ ligbi kake kɛ pee jeha kake kɛ ha mo.
7 Jehanɛ ɔ, plɛ o hɛ mi kɛ tsɔɔ Yerusalem ma a nɛ a sa yi ɔ, koklo o tade ɔ nya ngɛ o kɔni he, nɛ o gba kɛ si ma a.
8 Hyɛ! Ma ngɔ kpa kɛ fi mo bɔ nɛ pee nɛ o ko nyɛ nɛ o plɛ o he kɛ je o kasa fã kake kɛ ya o kasa fã kpa kɛ ya si be nɛ o kɛ ma sa ma a yi ɔ maa ba nyagbe.
9 Nɛ o ngɔ hwiit, barli,* amɔtlamɔ,* yɔ, ngma kɛ spɛlt* kɛ wo nɔ́ kake mi nɛ o kɛ pee abolo ha o he. Ejakaa ligbi 390 nɛ o maa hwɔ o kasa nɔ ɔ, nɔ́ nɛ o maa ye ji nɛ ɔ nɛ.
10 Daa ligbi ɔ, o ma susu niye ní nɛ e jiɔmi ji shekel 20* nɛ o ye. O maa ye ngɛ be pɔtɛɛ komɛ a mi.
11 Nɛ o ma susu nyu nɛ o maa nu ɔ lita fã.* O maa nu ngɛ be pɔtɛɛ komɛ a mi.
12 “O maa ye kaa bɔ nɛ o maa ye barli abolo ɔ; o maa sã ngɛ a hɛ mi, nɛ o kɛ nɔmlɔ fĩ nɛ gbli lɛ maa sã.”
13 Yehowa ya nɔ nɛ e de ke: “Kikɛ ji bɔ nɛ Israelbi ɔmɛ maa ye a we abolo nɛ he tsɔ we ɔ ngɛ je ma amɛ a kpɛti, he nɛ ma fiee mɛ kɛ ho ɔ.”
14 Kɛkɛ nɛ i de ke: Nyɔmtsɛ Matsɛ Yehowa! Enɛ ɔ lɛɛ e he wa. Kɛ je ye jokuɛwi a si hluu kɛ ba si amlɔ nɛ ɔ, i yi lohwe ko nɛ gbo, loo lohwe ko nɛ a tsɔtslɔɔ e mi hyɛ kɛ ble ye he,* nɛ lo nɛ he tsɔ we hu sɛ ye nya hyɛ.
15 Lɔ ɔ he ɔ, e de mi ke: “Saminya! Ma ha o maa ngɔ na fĩ kɛ sã abolo ɔ, se pi nɔmlɔ fĩ.”
16 Kɛkɛ nɛ e de mi ke: “Nɔmlɔ bi, ma ha nɛ niye ní he maa hia* ngɛ Yerusalem, nɛ a kɛ tsui yemi maa ye niye ní nɛ a susu ha mɛ ɔ, nɛ a kɛ gbeye yemi maa nu nyu nɛ a susu ha mɛ ɔ.
17 Niye ní kɛ nyu he maa hia hluu kaa a nya maa kpɛ a he nɛ a maa hyɛ a sibi hɛ mi gaa, nɛ a maa flãã kanyakanya ngɛ a tɔmi ɔmɛ a he je.
Sisi Ningmahi
^ E ji kpoku loo gbogbo nɛ a daa nɔ kɛ hwuɔ ta, aloo a kɛ poɔ ma he piɛ.
^ Ngɛ Hebri gbi mi ɔ, “kɛ fɔ nɔ,” nɛ ji, Ezekiel muɔ nɔ.
^ E ji ngma henɔ ko.
^ Aloo “abɔtlamɔ; akɔtɔmɔ.”
^ E ji hwiit henɔ ko nɛ a duɔ ngɛ blema Egipt.
^ Maa pee gram 230 (oz t 7.3). Hyɛ Mi Tsɔɔmi Munyu B14.
^ Ngɛ Hebri gbi mi ɔ, “susumi nɔ́ nɛ ji hin mi dlami ekpa mi kake.” Hyɛ Mi Tsɔɔmi Munyu B14.
^ Aloo “ye klaa.”
^ Ngɛ Hebri gbi mi ɔ, “i ngɛ o we abolo tso ɔmɛ kue.” Eko ɔ, a ji tsohi nɛ a toɔ abolohi ngɛ nɔ.
