Ester 9:1-32
9 Ngɛ nyɔhiɔ 12 ɔ, nɛ ji Adar* nyɔhiɔ ɔ we ligbi 13 ɔ nɔ, benɛ a kɛ ma tsu matsɛ ɔ munyu ɔ kɛ e mlaa a he ní, nɛ ji ligbi nɛ Yuda bi ɔmɛ a he nyɛli ɔmɛ hyɛ blɔ kaa a maa ye a nɔ kunimi ɔ, níhi tsake nɛ Yuda bi ɔmɛ mohu ye a he nyɛli ɔmɛ a nɔ kunimi.
2 Yuda bi ɔmɛ bua a he nya ngɛ a ma amɛ a mi ngɛ Matsɛ Ahasuerus kpokpa amɛ tsuo* a nɔ konɛ a kɛ nihi nɛ a ngɛ hlae kaa a maa ye mɛ awi ɔ nɛ to ní, nɛ nɔ ko nɔ ko nyɛ we nɛ e da a hɛ mi, ejakaa a he gbeye nu ni ɔmɛ tsuo.
3 Nɛ kpokpa amɛ* a nɔ nikɔtɔma amɛ tsuo, kpokpa nɔ hyɛli ɔmɛ, amlaalo ɔmɛ, kɛ nihi nɛ a tsuɔ ní kɛ haa matsɛ ɔ fĩ Yuda bi ɔmɛ a se, ejakaa a ngɛ Mordekai gbeye yee.
4 Mordekai ba ná blɔ nya ngua ngɛ matsɛ we ɔ, nɛ e ba he biɛ ngɛ kpokpa amɛ tsuo* a nɔ, ejakaa blɔ nya nɛ Mordekai ngɛ ɔ nɔ ngɛ kuɔe.
5 Yuda bi ɔmɛ fiaa a he nyɛli ɔmɛ tsuo klaate, a gbe mɛ, nɛ a kpata a hɛ mi; a pee a he nyɛli ɔmɛ nɔ́ fɛɛ nɔ́ nɛ a suɔ.
6 Ngɛ Shushan,* nɛ ji matsɛ ma a* mi ɔ, Yuda bi ɔmɛ gbe nyumuhi 500, ee, a kpata a hɛ mi.
7 Jehanɛ hu ɔ, a gbe Parshandata, Dalfon, Aspata,
8 Porata, Adalia, Aridata,
9 Parmashta, Arisai, Aridai, kɛ Vaizata,
10 nɛ́ a ji Hamedata binyumu Haman, Yuda bi ɔmɛ a he nyɛlɔ ɔ binyumuhi nyɔngma amɛ. Se benɛ a gbe mɛ se ɔ, a hɛ ní.
11 Jamɛ a ligbi ɔ, a bɔ matsɛ ɔ amaniɛ kɛ kɔ nimli abɔ nɛ a gbe ngɛ Shushan,* nɛ ji matsɛ ma a* mi ɔ he.
12 Matsɛ ɔ de Manyɛ Ester ke: “Ngɛ Shushan,* nɛ ji matsɛ ma a* mi ɔ, Yuda bi ɔmɛ gbe nyumuhi 500, kɛ Haman binyumuhi nyɔngma amɛ, nɛ a kpata a hɛ mi. Mɛni lɛ ya nɔ ngɛ matsɛ ɔ kpokpa kpa amɛ* hu a nɔ? Amlɔ nɛ ɔ, mɛni ji o ní bimi ɔ? A ma ha mo. Nɛ mɛni hu o ngɛ hlae? A maa pee ha mo.”
13 Ester de ke: “Ke e sa matsɛ ɔ hɛ mi ɔ, e ngmɛ Yuda bi nɛ a ngɛ Shushan* ɔ blɔ konɛ hwɔɔ hu a pee kaa bɔ nɛ mlaa a ha nɛ a pee mwɔnɛ ɔ; nɛ́ e ha nɛ a sɛu Haman binyumuhi nyɔngma amɛ ngɛ tso nɔ.”
14 Lɔ ɔ he ɔ, matsɛ ɔ fã kaa a pee jã. A wo mlaa ngɛ Shushan,* nɛ a sɛu Haman binyumuhi nyɔngma amɛ.
15 Yuda bi nɛ a ngɛ Shushan ɔ* bua a he nya ekohu ngɛ Adar nyɔhiɔ ɔ we ligbi nɛ ji 14 ɔ nɔ, nɛ a gbe nyumuhi 300 ngɛ Shushan,* se a hɛ ní.
16 Yuda bi kpahi nɛ a ngɛ matsɛ ɔ kpokpa amɛ* a nɔ ɔ hu bua a he nya, nɛ a fã a wami* he. A kpata a he nyɛli ɔmɛ a hɛ mi. A gbe nihi nɛ sume mɛ ɔ 75,000; se a hɛ ní.
17 Nɔ́ nɛ ɔ ya nɔ ngɛ Adar nyɔhiɔ ɔ we ligbi nɛ ji 13 ɔ nɔ, nɛ a jɔɔ a he ngɛ ligbi nɛ ji 14 ɔ nɔ, nɛ a pee jamɛ a ligbi ɔ ní yemi kɛ ní numi kɛ nyami ligbi.
18 Yuda bi ɔmɛ nɛ a ngɛ Shushan ɔ* bua a he nya ngɛ ligbi nɛ ji 13 ɔ kɛ ligbi nɛ ji 14 ɔ nɔ, nɛ a jɔɔ a he ngɛ ligbi nɛ ji 15 ɔ nɔ, nɛ a pee jamɛ a ligbi ɔ ní yemi kɛ ní numi kɛ nyami ligbi.
19 Lɔ ɔ he je nɛ Yuda bi nɛ a ngɛ ma tsɔwi ɔmɛ a mi ngɛ kpokpa kpa amɛ a nɔ ɔ pee Adar nyɔhiɔ ɔ we ligbi nɛ ji 14 ɔ ní yemi kɛ ní numi kɛ nyami ligbi, kɛ be nɛ a kɛ gbaa niye ní kɛ haa a sibi ɔ nɛ.
20 Mordekai ngma ní nɛ ɔmɛ nɛ ya nɔ ɔ kɛ fɔ si, nɛ e tsɔ nɛ a kɛ sɛ womihi ya ha Yuda bi tsuo nɛ a ngɛ Matsɛ Ahasuerus kpokpa amɛ tsuo* a nɔ ɔ, nihi nɛ a ngɛ kpo nya, kɛ nihi nɛ a ngɛ tsitsaa a tsuo.
21 E fã mɛ kaa daa jeha a, a ye gbijlɔ ngɛ Adar nyɔhiɔ ɔ we ligbi nɛ ji 14, kɛ ligbi nɛ ji 15 ɔ nɔ,
22 ejakaa jamɛ a ligbi ɔmɛ a nɔ nɛ Yuda bi ɔmɛ ye a he kɛ je a he nyɛli ɔmɛ a dɛ mi, nɛ jamɛ a nyɔhiɔ ɔ mi nɛ a kɔmɔ yemi ɔ tsake kɛ pee bua jɔmi, nɛ a we aywilɛho yemi ɔ tsake kɛ pee nyami ligbi ɔ nɛ. E sa nɛ a ye jamɛ a ligbi ɔmɛ kaa ní yemi kɛ ní numi, kɛ nyami ligbihi, kɛ be nɛ a kɛ gbaa niye ní kɛ haa a sibi, nɛ́ a kɛ keɔ ohiatsɛmɛ ní.
23 Nɛ Yuda bi ɔmɛ kplɛɛ kaa a ma tsa gbijlɔ nɛ a je sisi ɔ nɔ, nɛ a maa pee kaa bɔ nɛ Mordekai ngma kɛ ba ha mɛ ɔ.
24 Ejakaa Agag no Hamedata binyumu Haman, nɛ ji Yuda bi ɔmɛ tsuo a he nyɛlɔ ɔ to ga kaa e ma kpata Yuda bi ɔmɛ a hɛ mi, nɛ e fɔ̃ Sɔ,* konɛ e kɛ wo a he gbeye, nɛ́ e kpata a hɛ mi.
25 Se benɛ Ester ba matsɛ ɔ hɛ mi ɔ, matsɛ ɔ wo mlaa, nɛ a ngma ke: “Ga yaya nɛ e to ngɛ Yuda bi ɔmɛ a he ɔ nɛ kpa bu lɛ nitsɛ e yi”; nɛ a sɛu e kɛ e binyumu ɔmɛ ngɛ tso nɔ.
26 Enɛ ɔ he je nɛ a tsɛɛ ligbi nɛ ɔmɛ ke Purim, nɛ ji Sɔ ɔ* nɛ. Lɔ ɔ he ɔ, ngɛ níhi tsuo nɛ a ngma ngɛ sɛ womi nɛ ɔ mi, kɛ nɔ́ nɛ a na ngɛ sane nɛ ɔ mi, kɛ nɔ́ nɛ ba a nɔ ɔ he je ɔ,
27 Yuda bi ɔmɛ ngɔ kɛ fɔ a kɛ a nina amɛ, kɛ nihi tsuo nɛ ma ba piɛɛ a he ɔ nɔ kaa a maa ye gbijlɔ ngɛ ligbi enyɔ nɛ ɔmɛ a nɔ nɛ a be kpae, nɛ a maa pee níhi nɛ a ngma kɛ kɔ jamɛ a ligbi ɔmɛ a he ɔ ngɛ be nɛ a to ɔ nya daa jeha.
28 Ngɛ yi nɔhi tsuo a mi ɔ, e sa nɛ weku fɛɛ weku, kpokpa fɛɛ kpokpa,* kɛ ma fɛɛ ma nɛ kai ligbi nɛ ɔmɛ, nɛ́ a ye gbijlɔ ngɛ jamɛ a ligbi ɔmɛ a nɔ; nɛ Purim gbijlɔ ɔ se nɛ ko po ngɛ Yuda bi ɔmɛ a kpɛti, nɛ a ko kpa yemi ngɛ a nina amɛ a kpɛti.
29 Kɛkɛ nɛ Manyɛ Ester, nɛ ji Abihail biyo ɔ kɛ Mordekai, nɛ ji Yuda no ɔ ngɔ blɔ nya nɛ a ngɛ ɔ kɛ ngma womi kɛ ma sɛ womi enyɔne nɛ kɔɔ Purim gbijlɔ ɔ he ɔ nɔ mi.
30 E tsɔ nɛ a kɛ sɛ womihi nɛ tue mi jɔmi kɛ anɔkuale munyuhi ngɛ mi ɔ ya ha Yuda bi tsuo nɛ a ngɛ kpokpahi 127* ɔ a nɔ, ngɛ Ahasuerus nɔ yemi he ɔmɛ
31 kɛ ma nɔ mi kaa a ye Purim ligbi ɔmɛ ngɛ behi nɛ a to ɔ mi, kaa bɔ nɛ Mordekai nɛ ji Yuda no ɔ, kɛ Manyɛ Ester fã mɛ ke a pee ɔ, kɛ bɔ nɛ mɛ nitsɛmɛ a ngɔ kɛ fɔ a* nɔ kaa a kɛ a ninahi maa pee ɔ pɛpɛɛpɛ. Á ngɔ hwɔ hami kɛ pɛɛ kpami nɛ mi wa hu kɛ piɛɛ he.
32 Nɛ Ester fami ɔ ma Purim ɔ he sane nɛ ɔmɛ a nɔ mi, nɛ a ngma kɛ wo womi mi.
Sisi Ningmahi
^ Hyɛ Mi Tsɔɔmi Munyu B15.
^ Aloo “kpokpahi tsuo nɛ a ngɛ e nɔ yemi ɔ sisi ɔ.”
^ Aloo “kpokpahi nɛ a ngɛ e nɔ yemi ɔ sisi ɔ.”
^ Aloo “kpokpahi tsuo nɛ a ngɛ nɔ yemi ɔ sisi ɔ.”
^ Aloo “Susa.”
^ Aloo “matsɛ we ɔ; gbogbo nɛ he wa a.”
^ Aloo “Susa.”
^ Aloo “matsɛ we ɔ; gbogbo nɛ he wa a.”
^ Aloo “Susa.”
^ Aloo “matsɛ we ɔ; gbogbo nɛ he wa a.”
^ Aloo “kpokpa kpahi nɛ ngɛ nɔ yemi ɔ sisi ɔ.”
^ Aloo “Susa.”
^ Aloo “Susa.”
^ Aloo “Susa a.”
^ Aloo “Susa.”
^ Aloo “kpokpahi nɛ a ngɛ e nɔ yemi ɔ sisi ɔ.”
^ Aloo “klaa.”
^ Aloo “Susa a.”
^ Aloo “kpokpahi tsuo nɛ a ngɛ e nɔ yemi ɔ sisi ɔ.”
^ Ngɛ Hebri gbi mi ɔ, “Pur.“ Pur sisi ji “Sɔ.” Pur hiɛhiɛɛ peemi, nɛ ji “Purim” ɔ ba pee biɛ nɛ a kɛ tsɛɛ gbijlɔ nɛ Yuda bi ɔmɛ yeɔ ngɛ a jami mi nyɔhiɔ nɛ ji 12 ɔ mi. Hyɛ Mi Tsɔɔmi Munyu B15.
^ Aloo “kpokpa fɛɛ kpokpa nɛ ngɛ e nɔ yemi ɔ sisi ɔ.”
^ Aloo “kpokpahi 127 nɛ a ngɛ e nɔ yemi ɔ sisi.”
^ Aloo “a susuma.”
