Fiɛɛlɔ 3:1-22
3 Nɔ́ fɛɛ nɔ́ kɛ e be,Be ngɛ kɛ ha nɔ́ fɛɛ nɔ́ nɛ a peeɔ ngɛ hiɔwe sisi:
2 Fɔmi be ngɛ, nɛ gbenɔ be ngɛ;Ní dumi be ngɛ, nɛ ní kpami be ngɛ;
3 Gbemi be ngɛ, nɛ tsami be ngɛ;Be ngɛ nɛ a kuɔ nɔ́ kɛ pueɔ si, nɛ be ngɛ nɛ a fiaa nɔ́ kɛ maa si;
4 Ya fomi be ngɛ, nɛ muɔmi be ngɛ;Kɔmɔ yemi be ngɛ, nɛ domi be ngɛ;*
5 Be ngɛ nɛ a sakeɔ tɛhi ngɔ pueɔ he, nɛ be ngɛ nɛ a kɛ buaa tɛhi a nya;Be ngɛ nɛ a fuaa nɔ atuu, nɛ be ngɛ nɛ a fua we nɔ atuu;
6 Be ngɛ nɛ a hlaa nɔ́, nɛ be ngɛ nɛ a buɔ nɔ́ ko kaa e laa;Be ngɛ nɛ a ngɔɔ nɔ́ kɛ toɔ, nɛ be ngɛ nɛ a sakeɔ nɔ́ kɛ fɔɔ he;
7 Be ngɛ nɛ a gbaa nɔ́, nɛ be ngɛ nɛ a kpɛɛ nɔ́;Dii peemi be ngɛ, nɛ munyu tumi be ngɛ;
8 Suɔmi be ngɛ, nɛ ninyɛ be ngɛ;Ta hwumi be ngɛ, nɛ tue mi jɔmi be ngɛ.
9 Mɛni ní tsulɔ náa kɛ jeɔ e dengme gbomi ɔmɛ tsuo a mi?
10 I na ní tsumi nɛ Mawu kɛ ha nimli a bimɛ konɛ e he a juɛmi ɔ.
11 E pee nɔ́ fɛɛ nɔ́ saminyayoo* ngɛ e be mi. E ngɔ neneene po kɛ wo a tsui mi; se kɛ̃ ɔ, ní nɛ anɔkuale Mawu ɔ tsu kɛ je sisije kɛ ya si nyagbe ɔ, adesa be nyɛe maa le kɔkɔɔkɔ.
12 I kpa si nɛ i na kaa nɔ́ ko be nɛ e hi ha adesahi pe nɛ a ma nya nɛ a maa pee nɔ́ kpakpa ngɛ a wami be mi.
13 Jehanɛ se hu ɔ, e sa nɛ nɔ fɛɛ nɔ nɛ́ e ye ní nɛ e nu ní nɛ e ná bua jɔmi ngɛ ní nɛ e tsuɔ wawɛɛ ɔ tsuo mi. E ji Mawu nike ní.
14 I ba ná le kaa nɔ́ fɛɛ nɔ́ nɛ anɔkuale Mawu ɔ peeɔ ɔ maa hi si kɛ ya neneene. Nɔ́ ko be nɛ a kɛ maa piɛɛ he, nɛ nɔ́ ko be nɛ a ma je ngɛ mi. Anɔkuale Mawu ɔ pee lɛ jã, konɛ nihi nɛ a ye lɛ gbeye.
15 Nɔ́ fɛɛ nɔ́ nɛ baa a ba momo, nɛ nɔ́ nɛ maa ba a ba hyɛ; se anɔkuale Mawu ɔ hlaa nɔ́ nɛ adesa di se* ɔ se blɔ.
16 I na nɔ́ nɛ ɔ hu ngɛ pu nɛ ɔ sisi: He nɛ e sa kaa dami sane yemi nɛ hi ɔ, yi wu tso ní peepee mohu lɛ ngɛ lejɛ ɔ, nɛ he nɛ e sa kaa dami ní peemi nɛ hi ɔ, yi wu tso ní peepee mohu lɛ ngɛ lejɛ ɔ.
17 Lɔ ɔ he ɔ, i de ngɛ ye tsui mi ke: “Anɔkuale Mawu ɔ maa kojo dalɔ kɛ yiwutsotsɛ tsuo, ejakaa be ngɛ kɛ ha ní tsumi fɛɛ ní tsumi kɛ nɔ́ fɛɛ nɔ́ nɛ a peeɔ.”
18 Jehanɛ hu ɔ, i de ngɛ ye tsui mi ngɛ nimli a bimɛ a he ke, anɔkuale Mawu ɔ maa ka mɛ, nɛ e ma ha nɛ a le kaa a ngɛ kaa lohwehi,
19 ejakaa adesahi a nyagbe ngɛ, nɛ lohwehi hu a nyagbe ngɛ; mɛ tsuo a nyagbe ngɛ kake. Bɔ nɛ adesa gboɔ ɔ, jã nɛ lohwe hu gboɔ; mumi kake ɔ nɔuu lɛ mɛ tsuo a muɔ. Lɔ ɔ he ɔ, adesa nɔ kuɔ we pi lohwehi, ejakaa nɔ́ fɛɛ nɔ́ peeɔ yaka.
20 Mɛ tsuo a yaa he kake. Mɛ tsuo a je zu mi, nɛ mɛ tsuo a maa kpale kɛ ya zu mi.
21 Mɛnɔ tutuutu lɛ e le ke ji adesahi a mumi kuɔɔ kɛ yaa hiɔwe, nɛ lohwehi a mumi kpleɔ kɛ yaa zugba a sisi?
22 Nɛ i na kaa nɔ́ ko be nɛ e hi pe nɛ adesa ma ná bua jɔmi ngɛ e ní tsumi mi, ejakaa lɔ ɔ ji e hiɔwo;* nɛ mɛnɔ ma nyɛ ma ha nɛ e na nɔ́ nɛ maa ba ngɛ e gbenɔ se?
Sisi Ningmahi
^ Ngɛ Hebri gbi mi ɔ, “tuumi; hluɔ kɛ bɔleɔ si.”
^ Aloo “saminya; pɛpɛɛpɛ.”
^ Baiblo komɛ de ke, “hlaa nɔ́ nɛ be.”
^ Aloo “blɔ fa mi nɔ́.”
