Abɛ 28:1-28
28 Yiwutsotsɛmɛ tuɔ fo be mi nɛ nɔ ko fiee we a se,Se dali ngɛ kã kaa jata.*
2 Ke atuã tsɔmi* ngɛ ma ko mi ɔ, a tsakeɔ ma nɔ yeli ɔmɛ nɔtonɔto,Se ga wolɔ nɛ kɔɔ nɔ́ se, nɛ́ e ngɛ nile ɔ ma ha nɛ ma nɔ yelɔ* se maa kɛ.
3 Ohiatsɛ nɛ e fiaa nɔ nɛ e ní ngɛ mɔbɔ ojo ɔNgɛ kaa hiɔmi nɛ kpataa niye ní tsuo hɛ mi.
4 Nihi nɛ a kuaa mlaa jeɔ yiwutsotsɛmɛ a yi,Se nihi nɛ a yeɔ mlaa nɔ ɔ mi mi fuɔ mɛ.
5 Nimli yayamihi be nyɛe maa nu dami sane yemi sisi,Se nihi nɛ a hlaa Yehowa se blɔ ɔ ma nyɛ maa nu nɔ́ fɛɛ nɔ́ sisi.
6 Ohiatsɛ nɛ nyɛɛɔ ngɛ e we anɔkuale yemi miHi pe niatsɛ nɛ e blɔhi dɛ.
7 Bi nɛ nuɔ nɔ́ sisi ɔ yeɔ mlaa nɔ,Se bi nɛ e kɛ jiklɔɔtsɛmɛ bɔɔ ɔ pueɔ e tsɛ hɛ mi si.
8 Nɔ nɛ guɔ hekpa hemi nɔ kɛ sisiɔ nihi, nɛ́ e náa he se kɛ náa e he ɔ,E ngɛ níhi a nya buae ha nɔ nɛ e naa ohiatsɛmɛ mɔbɔ ɔ.
9 Nɔ nɛ sume kaa e yeɔ mlaa nɔ ɔ,E sɔlemi po ji ní hiemi ní.*
10 Nɔ nɛ e sisiɔ dali nɛ lɔ ɔ haa nɛ a ya nyɛɛɔ blɔ yaya nɔ ɔ maa nɔ lɛ nitsɛ e muɔ mi,Se nihi nɛ sane ko be a he ɔ, a nine maa su nɔ́ kpakpa nɔ.
11 Niatsɛ buɔ e he juɛmitsɛ,Se ohiatsɛ nɛ kɔɔ nɔ́ se ma nyɛ maa na bɔ nɛ e ngɛ ha.
12 Ke dali ye kunimi ɔ, hɛ mi nyami babauu baa,Se ke yiwutsotsɛmɛ ba ye tsɛ ɔ, nihi laa a he.
13 Nɔ nɛ laa e tɔmihi a nɔ ɔ be manye yee,Se nɔ fɛɛ nɔ nɛ e jajeɔ e tɔmihi, nɛ e yuɔ e he ngɛ a he ɔ, a maa na lɛ mɔbɔ.
14 Adesa nɛ e hɛ ngɛ e he nɔ* be fɛɛ be ɔ ngɛ bua jɔmi,Se nɔ fɛɛ nɔ nɛ kpliiɔ e tsui maa sɛ haomi mi.
15 Bɔ nɛ jata nɛ e ngɛ huãe kɛ osisiblisi nɛ e hɛ mi wo la ngɛ ɔ,Jã nɛ nɔ yelɔ yiwutsotsɛ nɛ e ngɛ nihi nɛ a be yemi kɛ bualɔ nɔ yee ɔ hu ngɛ.
16 Hɛ mi nyɛɛlɔ nɛ be nɔ́ se kɔmi ɔ ngɔɔ e he wami ɔ kɛ tsuɔ ní ngɛ blɔ yaya nɔ,Se nɔ nɛ sume ní nɛ a náa kɛ guɔ sisimi blɔ nɔ ɔ, e wami se maa kɛ ha lɛ.
17 Adesa nɛ e ye muɔ he fɔ akɛnɛ e gbe nɔ ko ɔ* maa hi fo nɔ hluu kɛ yaa si e ma ya sɛ yɔkɔ* mi.
Nɔ ko nɛ ko ye bua lɛ.
18 Nɔ nɛ nyɛɛɔ nɛ sane ko be e he ɔ, a ma he e yi wami,Se nɔ nɛ e blɔhi dɛ ɔ maa nɔ si tlukaa.
19 Nɔ nɛ huɔ e zugba a ma ná niye ní babauu,Se nɔ nɛ diɔ níhi nɛ se nami be a he se ɔ, e we ohia maa kle.
20 Adesa nɛ yeɔ anɔkuale ɔ ma ná jɔɔmihi babauu,Se nɔ nɛ e yeɔ oya kɛ náa ní ɔ be e he yee.
21 Nɔ hɛ mi hyɛmi hí;Se abolo bɔɔ ko he je ɔ, adesa ma nyɛ maa pee nɔ́ nɛ dɛ.
22 Adesa nɛ e hɛ kɔ̃ɔ* ɔ suɔ wawɛɛ kaa e ná ní,Se e li kaa e ma ba ye ohia.
23 Nɔ fɛɛ nɔ nɛ e kãa nɔ hɛ mi ɔ, pee se ɔ, e hɛ mi maa ba nyamiPe nɔ nɛ ngɔɔ e lilɛ kɛ gbeɔ nɔ yi mi.
24 Nɔ fɛɛ nɔ nɛ e juɔ e tsɛ kɛ e nyɛ nɛ e deɔ ke, “Tɔmi be he” ɔ,
E huɛ ji nɔ nɛ kpataa níhi a hɛ mi.
25 Nɔ nɛ e hɛ tsuɔ* woɔ pɛ,Se nɔ fɛɛ nɔ nɛ ngɔɔ e hɛ kɛ fɔɔ Yehowa nɔ ɔ, níhi a mi maa hi ha lɛ.*
26 Nɔ fɛɛ nɔ nɛ ngɔɔ e hɛ kɛ fɔɔ lɛ nitsɛ e tsui nɔ ɔ, kuasia ji lɛ,Se nɔ nɛ peeɔ e ní ngɛ nile mi ɔ maa ye e he.
27 Nɔ fɛɛ nɔ nɛ e haa ohiatsɛmɛ nɔ́ ɔ, nɔ́ ko be lɛ hiae,Se nɔ nɛ e maa e hɛ kɛ fɔɔ a nɔ ɔ, gbiɛmi fuu maa ba e nɔ.
28 Ke yiwutsotsɛmɛ ba ye tsɛ ɔ, nihi laa a he,Se ke a hɛ mi kpata a, dali a he hiɛɔ.
Sisi Ningmahi
^ Aloo “jata nɛ e he wa.”
^ Aloo “mlaa nɔ tɔmi.”
^ Ngɛ Hebri gbi mi ɔ, “e.”
^ Aloo “ní hiɔmi ní.”
^ Aloo “Adesa nɛ yeɔ gbeye.”
^ Aloo “akɛnɛ e pue klaa ko muɔ si.”
^ Aloo “muɔ.”
^ Aloo “nɛ e hɛ tsuɔ.”
^ Baiblo komɛ de ke, “Klaa nɛ woɔ e he nɔ.”
^ Ngɛ Hebri gbi mi ɔ, “e maa wo zɔ.”
