Abɛ 21:1-31
21 Matsɛ tsui ngɛ kaa nyu dɔhi ngɛ Yehowa dɛ mi.
E kudɔɔ lɛ kɛ yaa he fɛɛ he nɛ e suɔ.
2 Adesa blɔhi tsuo da ngɛ e hɛ mi,Se Yehowa hyɛɛ tsuihi* a mi.
3 Nɔ́ nɛ da peemi kɛ dami sane yemiSaa Yehowa hɛ mi wawɛɛ pe afɔle.
4 He nɔ womi hɛngmɛ kɛ he nɔ womi tsuiJi kane nɛ kudɔɔ yiwutsotsɛmɛ; lɛ tsuo ji yayami.
5 Nɔ nɛ bɔɔ mɔde ɔ, e blɔ nya tomihi maa ye manye* kokooko,Nɛ nihi tsuo nɛ a yeɔ oya kɛ peeɔ níhi ɔ maa ye ohia kokooko.
6 Juetlihi nɛ a kɛ lakpa lilɛ náa aNgɛ kaa afua nɛ ngɛ jee, kɛ klama nɛ gbeɔ nɔ.*
7 Yiwutsotsɛmɛ a basabasa peemi ɔ maa bɛɛ mɛ kɛ ho,Ejakaa a kua dami sane yemi.
8 Adesa nɛ e ye fɔ ɔ blɔ dɛ,Se adesa nɛ e tsui mi tsɔ ɔ, e ní peepee da.
9 E hi kaa o ma ya hi tsu yi mi ngɛ kɔ nya he koPe nɛ o kɛ yogbayo nɛ suɔ pɛ* maa hi we mi.
10 Nɔ́ yayami peemi jloɔ yiwutsotsɛ;*E nɛ́ e nyɛmi nɔmlɔ mɔbɔ.
11 Ke a gbla he fɛu yelɔ tue ɔ, nɔ nɛ e be níhi a si kpami ɔ náa juɛmi babauu,Nɛ ke juɛmitsɛ kase níhi fuu ɔ, e náa nile.*
12 Dalɔ ɔ* hɛngmɛ ngɛ yiwutsotsɛ we he;E tsɛ̃ɔ yiwutsotsɛmɛ kɛ fiaa si nɛ a hɛ mi kpataa.
13 Nɔ fɛɛ nɔ nɛ tsiɔ e tue konɛ e ko nu ngmlaa nɛ nɔ nɛ e ní ngɛ mɔbɔ ɔ ngɛ kpae ɔ,Lɛ hu e ma tsɛ nɛ a be lɛ nɔ hee.
14 Ní nɛ a keɔ ngɛ laami mi ɔ jɔɔ abofu he,Nɛ nyɔ mi ní nɛ a ha ngɛ laami mi* jɔɔ abofu nɛ nya wa he.
15 Dalɔ bua jɔɔ kaa e maa ye dami sane,Se dami sane yemi ji ní hiemi ní* kɛ ha nihi nɛ a peeɔ ní yayami.
16 Adesa nɛ tlaa blɔ kɛ jeɔ nɔ́ se kɔmi blɔ nɔ ɔMa ya jɔɔ e he ngɛ nihi nɛ a gbo nɛ a be he wami ko ɔ a kpɛti.
17 Nɔ nɛ e suɔ ngɔɔmi yemi* ɔ maa ye ohia;Nɔ nɛ suɔ wai kɛ nu be ní náe.
18 Yiwutsotsɛ ji kpɔmi nɔ́ kɛ ha dalɔ,Nɛ a maa nu nɔ sisilɔ ngɛ dali a nane mi.
19 E hi kaa o ma ya hi nga nɔPe nɛ o kɛ yogbayo nɛ suɔ pɛ* nɛ e woɔ nɔ mi mi la maa hi si.
20 A naa juetli nɛ he jua wa kɛ nu ngɛ juɛmitsɛ we mi,Se kuasia ma kpata níhi nɛ e ngɛ ɔ hɛ mi.*
21 Nɔ fɛɛ nɔ nɛ diɔ dami kɛ suɔmi nɛ se pui se ɔMaa pee dalɔ, nɛ e ma ná wami, kɛ hɛ mi nyami.
22 Juɛmitsɛ ma nyɛ maa kuɔ he wali a ma,*Nɛ́ e ku he wami nɛ a kɛ a hɛ fɔ nɔ ɔ nya la.
23 Nɔ nɛ e kudɔɔ e nya kɛ e lilɛ ɔYuɔ e he ngɛ haomi he.
24 A ma tsɛ fĩalɔ nɛ peeɔ pupuupu nɛ woɔ e he nɔ ɔ keHe nɔ wolɔ nɛ peeɔ e ní kɛkɛ.
25 Nɔ́ nɛ hejɔtsɛ suɔ kaa e ma ná a maa gbe lɛ,Ejakaa e kua ke e kɛ e ninehi be ní tsue.
26 Ngɛ ligbi ɔ mi tsuo ɔ, e kɛ hɛ tsumi hlaa kaa e ma ná ní babauu,Se dalɔ haa nɔ nɔ́, nɛ e pee we kpɛle.*
27 Yiwutsotsɛmɛ a we afɔle ji ní hiemi ní.*
Hluu nɛ nɔ ɔ kɛ juɛmi yaya* lɛ maa sã!
28 Lakpa odase yelɔ hɛ mi ma kpata,Se nɔ nɛ buɔ sane tue ɔ, odase nɛ e maa ye ɔ maa ye manye.*
29 Yiwutsotsɛ bua peeɔ e ní kaa e ngɛ kã,Se dalɔ ji nɔ nɛ e blɔ yeɔ manye.*
30 Juɛmi ko, loo nɔ́ se kɔmi ko, loo ga womi ko be nɛ maa te si kɛ wo Yehowa.
31 A dlaa okpɔngɔ kɛ haa ta ligbi,Se yi wami hemi ɔ, Yehowa ngɔ e jeɔ.
Sisi Ningmahi
^ Aloo “susumihi.”
^ Aloo “kɛ se nami baa.”
^ Baiblo komɛ de ke, “kɛ ha nihi nɛ a ngɛ gbenɔ se blɔ hlae ɔ.”
^ Aloo “yogbayo nɛ tuɔ níhi a he munyu nyanyaanya.”
^ Aloo “yiwutsotsɛ klaa.”
^ Aloo “e leɔ nɔ́ nɛ e maa pee.”
^ Nɛ ji Yehowa.
^ Ngɛ Hebri gbi mi ɔ, “nyɔ mi ní ngɛ gugue mi.”
^ Aloo “ní hiɔmi ní.”
^ Aloo “hɛja jemi.”
^ Aloo “yogbayo nɛ tuɔ níhi a he munyu nyanyaanya.”
^ Ngɛ Hebri gbi mi ɔ, “maa mii níhi nɛ e ngɛ ɔ.”
^ Aloo “ma nyɛ maa ye he wali a ma nɔ kunimi.”
^ Aloo “e pee we hɔni.”
^ Aloo “ní hiɔmi ní.”
^ Aloo “kɛ zo ní peepee.”
^ Ngɛ Hebri gbi mi ɔ, “Se adesa nɛ buɔ tue ɔ maa tu munyu daa.”
^ Aloo “dalɔ ji nɔ nɛ haa nɛ e blɔ hiɔ slɔkee.”
